တူဝ်တႅၼ်းၵေႃလိၵ်ႈလၢႆးလႄႈ ၾိင်ႈငႄႈတႆး ၼႂ်းမိူင်းႁူမ်ႈတုမ် ပတ်းပိုၼ်ႉ ၶဝ်ႈႁူမ်ႈပၢင်ၵုမ်လူင်ငဝ်ႈငုၼ်း ဢၼ်ၸတ်း ႁဵတ်း တီႈတိူင်းပႃႇၵိူဝ်။

ဝၼ်းတီႈ 10-11/02/2019 ယူႇတီႈၵေႃလိၵ်ႈလၢႆးလႄႈ ၾိင်ႈငႄႈတႆး တိူင်းပႃႇၵိူဝ်တင်း ငဝ်ႈငုၼ်း ၵေႃလိၵ်ႈလၢႆး ပတ်း ပိုၼ်ႉ ႁူမ်ႈၵၼ်ဢွၼ်ႁူဝ်ၸတ်းႁဵတ်း ပၢင်ၵုမ်လူင် ငဝ်ႈငုၼ်းတီႈႁူင်းႁေႃ ၵေႃလိၵ်ႈလၢႆး လႄႈ ၾိင်ႈငႄႈတႆး တီႈဝဵင်း ၼွင်ၵႂၢႆးထိူၼ်ႇ(တေႃးၵျွႆးဢိၼ်း ) တိူင်းပႃႇၵိူဝ်ႇ။ ၼႂ်းၶၢဝ်းတၢင်း ပၢင်ၵုမ် 2 ဝၼ်းၼၼ်ႉ လႆႈဢုပ်ႇဢူဝ်း တႅပ်းတတ်းၵၼ် ၵႂႃႇလၢႆလၢႆလွင်ႈ မိူၼ်ၼင်ႇ တႃႇတေတမ်းပိူင်ၶွတ်ႇၽွတ်ႈငဝ်ႈငုၼ်း၊ မိၵ်ႈမၢႆ (Logo) လႄႈ လွင်ႈတေ ၸတ်းႁဵတ်းၶွၼ်ႊ ၾရႅၼ်ႊတႆးယူၼ်း ၸိူဝ်းၼႆႉ။

ၸၢႆးတိၼ်ႇ ႁူဝ်ပဝ်ႈ ငဝ်ႈငုၼ်း ၵေႃလိၵ်ႈလၢႆးလႄႈ ၾိင်ႈငႄႈတႆး ပတ်းပိုၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ႁဝ်းၶႃႈ လႆႈဢုပ်ႇဢူဝ်းၵၼ်မႃးၼႂ်းၶၢဝ်းတၢင်း 2 ဝၼ်းၼႆႉ လႆႈၸႂ်တႅပ်းတတ်းၵၼ်လၢႆလၢႆလွင်ႈ။ တေလႆႈဝႃႈ ပၢင်ၵုမ်ဢၼ်လႆႈ ၸတ်း ႁဵတ်းပွၵ်ႈၵမ်းၼႆႉ မီးလွင်ႈၶိုပ်ႈၼႃႈတႄႉတႄႉ။ ႁဝ်းၶႃႈ ပီႈၼွင်ႉတႆး ၵူႈတီႈတီႈလႆႈမႃးႁူပ်ႉထူပ်းၵၼ်၊ ၸမ်ၸႂ် ၵၼ်၊ ပိူင်လူင်မၼ်းၵေႃႈ ၵဵဝ်ႇလွင်ႈလိၵ်ႈလၢႆးလႄႈ ၾိင်ႈငႄႈၼၼ်ႉယဝ်ႉ။ တၢင်းၼႃႈမႃး သင်ၶၸဝ်ႈလႄႈ ၵူၼ်းႁိူၼ်း ၵေႃႈ တေလႆႈႁူမ်ႈသၢၼ် မိုဝ်းၵၼ်သေႁဵတ်းၵၢၼ်ၵႂႃႇ။ ယဝ်ႉၵေႃႈ တေႁႂ်ႈပဵၼ်လိၵ်ႈႁူမ်ႈတူဝ် ၵႂၢမ်းႁူမ်ႈၶေႃႈ။ လိူဝ် ၼၼ်ႉ ၵဵဝ်ႇလူၺ်ႈလွင်ႈ ၾွၼ်ႉတႆးႁဝ်း ႁႂ်ႈလႆႈၸႂ်ႉတိုဝ်း ဢၼ်ၼိုင်ႈဢၼ်လဵဝ်ၵၼ်။ ႁႂ်ႈလႆႈၵပ်းသိုပ်ႇၵပ်းသၢၼ်ၵၼ်ငၢႆႈ ” ဝႃႈၼႆ။

ပၢင်ၵုမ်လူင်ငဝ်ႈငုၼ်း ၵေႃလိၵ်ႈလၢႆးလႄႈ ၾိင်ႈငႄႈတႆး ၵမ်းထူၼ်ႈ 14 ဢၼ်လႆႈၸတ်းႁဵတ်းတီႈတိူင်းပႃႇၵိူဝ် ပဵၼ် ပွၵ်ႈၵမ်းႁႅၵ်ႈၼႆႉ မီးတူဝ်တႅၼ်းၵေႃလိၵ်ႈလၢႆး ပီႈၼွင်ႉတႆးၼႂ်းမိူင်းၶၢင်၊ မိူင်းယၢင်း၊ တႃႈၵုင်ႈ၊ ဝဵင်းလိူဝ်ႇ၊ ၸႄႈၵႅင်း၊ ပျီႇ၊ ၼႂ်းမိူင်းတႆး ဢိၵ်ႇထႅင်ႈလၢႆလၢႆတီႈ ၶဝ်ႈႁူမ်ႈႁူပ်ႉထူပ်းဢုပ်ႇဢူဝ်းၵၼ်ၵႂႃႇ ဢမ်ႇယွမ်း 150 ၵေႃႉ ဝႃႈၼႆ။

ၸၢႆးတိၼ်ႇ လၢတ်ႈဝႃႈ “ တင်းမူတ်း ႁဝ်းၶႃႈ မွၵ်ႇထိုင် ၵေႃလိၵ်ႈလၢႆးလႄႈၾိင်ႈငႄႈတႆး ပတ်ႉပိုၼ်ႉ 90 ၸႄႈဝဵင်းပၢႆ။ မၢင် ဝဵင်းၵေႃႈမႃး၊ မၢင်ဝဵင်းဢမ်ႇတၼ်းမႃးၵေႃႈမီး။ လိူဝ်ၼၼ်ႉ ပီႈၼွင်ႉတႆးႁဝ်း ဢၼ်ယူႇသဝ်းတီႈထုင်ႉလိၼ်ပဵင်း ၵေႃႈ ပဵၼ်ဢၼ်ၸူမ်းသိူဝ်း ။ ၵႂၢမ်းတႆးတႄႉ ၶဝ်ဢမ်ႇပေႃးမေႃလၢတ်ႈယဝ်ႉသေတႃႉ ၶဝ်ယွမ်းႁပ်ႉဝႃႈပဵၼ်တႆးယူႇ ” ဝႃႈၼႆ။

ယူႇတီႈၵေႃလိၵ်ႈလၢႆးလႄႈ ၾိင်ႈငႄႈတႆးပတ်းပိုၼ်ႉၵေႃႈလႆႈၶိုင်ဝူၼ်ႉ ဝႆႉဝႃႈ တေသွၼ်ပၼ် လိၵ်ႈတႆး ၵႂၢမ်းတႆး ပီႈၼွင်ႉ တႆးထုင်ႉပဵင်း။ ႁႂ်ႈမေႃလၢတ်ႈၵႂၢမ်းတႆးၵၼ်ၶိုၼ်းၵူႈၵေႃႉ ဝႃႈၼႆ။

ပၢင်ၵုမ်လူင် ငဝ်ႈငုၼ်း ၵေႃလိၵ်ႈလၢႆး ဢၼ်ၸတ်းႁဵတ်းၵႂႃႇတီႈတိူင်းပႃႇၵိူဝ်ၼႆႉ မီးမေႃၵႂၢမ်းတႆး ၸိုဝ်ႈသဵင်ယႂ်ႇ လၢႆလၢႆ ၵေႃႉ မႃးၶဝ်ႈႁူမ်ႈလဝ်ႇမူၼ်ႈတူၼ်ႈၸႂ်သေဢမ်ႇၵႃး လိူဝ်ၼၼ်ႉ မီးတၢင်းၵႃႈယိူင်း/ ၸိူင်း ၸဵမ်ၸိူဝ်းၼႆႉထႅင်ႈ။

ပီၼႃႈမႃး ပၢင်ၵုမ်လူင် ငဝ်ႈငုၼ်းၵေႃလိၵ်ႈလၢႆးလႄႈ ၾိင်ႈငႄႈတႆး ပွၵ်ႈၵမ်း 15 ၸိုင် တေၸတ်းႁဵတ်းတီႈ ၸႄႈဝဵင်း မိတ်ႉၵျီးၼႃး ၸႄႈမိူင်းၶၢင် ဝႃႈၼႆ။