ဢိင်ၼိူဝ် သိုၵ်းၸၢဝ်းၶိူဝ်း ႁိမ်ၼႃႈတီႈၵၼ်သေ ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸႄႈဝဵင်းၵျွၵ်ႉမႄး ၵူၼ်းမိူင်း ႁဵင်ပၢႆ ပၢႆႈယၢၼ်ဝၢၼ်ႈ၊ ႁိူၼ်းၸဝ်ႈၵဝ်ႇ သွၼ်ႈယူႇတီႈဝတ်ႉဝႃးၽႃသိူဝ်ႇ။

တႄႇဢဝ် ဝၼ်းတီႈ 09/02/2019 ၼႆႉမႃး SSPP လႄႈ TNLA ဢၼ်ပဵၼ်သိုၵ်းဢူၺ်းလီပွတ်းႁွင်ႇ လႆႈပဵၼ်ပၢင်တိုၵ်း ၵၼ်တင်း RCSS ႁၢဝ်ႈႁႅင်း ၼႂ်းဢိူင်ႇပၢင်ႇလေႃႉသေ ၵူၼ်းဝၢၼ်ႈ ႁဵင်ပၢႆ ဢၼ်လႆႈဢွၼ်ၵၼ်ပၢႆႈ မႃးသွၼ်ႈဝႆႉၸွမ်း ဝတ်ႉဝႃးၽႃႇသိူဝ်ႇ မိူၼ်ၼင်ႇ ဝတ်ႉၵျွင်းယွတ်ႈ၊ ဝတ်ႉဢွင်ႇသုပၢၼ်ႇ၊ ဝတ်ႉၼမ်ႉၸဵတ်းလိၼ်း လႄႈ ၸွမ်းႁိူၼ်းပီႈႁိူၼ်း ၼွင်ႉၽႂ်မၼ်း ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ဝႃႈၼႆ။

ၵူၼ်းပၢႆႈသိုၵ်း ဢၼ်ႁွတ်ႈၽႅဝ်ဝႆႉတီႈဝတ်ႉၵျွင်းယွတ်ႈ လၢတ်ႈၽူႈတွႆႇႁွၵ်ႈဝႃႈ “တေႃႈလဵဝ် ပၢင်တိုၵ်းၼႆႉ တိုၵ်ႉပဵၼ် ႁၢဝ်ႈႁႅင်း။ ၶမ်ႈဝႃးၵေႃႈ တိုၵ်ႉပတ်ႉၵၼ်ယူႇ။ တၢင်းၾၢႆႇလႂ်ၵေႃႈ တိုၵ်ႉထႅမ်ႁႅင်း သိုၵ်းၼင်ႇၵၼ်ယူႇ။ ၵူၼ်းဝၢၼ်ႈတိုၵ်ႉ ပၢႆႈဢွၵ်ႇဝၢၼ်ႈမႃးယူႇတိၵ်းတိၵ်း” ဝႃႈၼႆ။

ပၢင်တိုၵ်းၼႆႉ တႄႇပဵၼ်မႃး မိူဝ်ႈဝၼ်းတီႈ 9 သေ ႁၢၼ်ႉတေႃႇထိုင် ဝၼ်းတီႈ 12 ၼႆႉ သဵင်ၵွင်ႈတႅၵ်ႇႁၢဝ်ႈႁႅင်းၵူႈဝၼ်း။ မိူဝ်ႈၼႆႉ ယၢမ်းၸဝ်ႉၵေႃႈ တႅၵ်ႇထႅင်ႈၵမ်းၼိုင်ႈ ဝႃႈၼႆ။

ၵူၼ်းပၢႆႈၽေးသိုၵ်း သိုပ်ႇလၢတ်ႈဝႃႈ “ မိူဝ်ႈၼႆႉၵၢင်ၼႂ် သဵင်ၵွင်ႈတိုၵ်ႉတႅၵ်ႇထႅင်ႈယူႇ။ ၵွပ်ႈပိူဝ်ႈမၼ်းၸမ်ဝၢၼ်ႈၵူၼ်းႁႅင်း ၼႃႇသေ လႆႈႁူႉ ၶၢဝ်ႇတႄႉၵေႃႈ ၶဝ်ဢွၼ်ၵၼ်သုတ်ႉထွႆၶဝ်ႈၵႂႃႇတၢင်းၼမ်ႉၽၢတ်ႇ၊ ဝၢၼ်ႈဢႅၵ်ႉၵီး” ဝႃႈၼႆ။

ၵူၼ်းပၢႆႈၽေးသိုၵ်း ဢၼ်လႆႈပၢႆႈဢွၵ်ႇမႃးသမ်ႉ ပဵၼ်ၵူၼ်းဝၢၼ်ႈၼႃးပုင်ႇ၊ ဝၢၼ်ႈၼႃးပဵင်း၊ ၵွင်းႁုင်း၊ ၼႃးၶွၼ်ႇ၊ လွႆ မူၼ်း၊ ၼမ်ႉ ပႅၼ်ႈ၊ ပၢင်ႇလေႃႉလႄႈ ၶွၵ်ႈဝူဝ်း ၸဵမ်ၸိူဝ်းၼႆႉ။

တၢင်းပွတ်းၸႄႈဝဵင်းၵျွၵ်ႉမႄးၼႆႉ ၸုမ်းယိပ်းၵွင်ႈၵၢင်ႇ ဢၼ်တူင်ႉၼိုင်ၵႂႃႇမႃး မီးမိူၼ်ၼင်ႇ တပ်ႉသိုၵ်းလူင်ပွင်ၸိုင်ႈ မၢၼ်ႈ၊ တပ်ႉသိုၵ်းတဢၢင်း၊ တပ်ႉသိုၵ်းဝၢၼ်ႈႁႆးလႄႈ တပ်ႉသိုၵ်းလွႆတႆးလႅင်း ၸဵမ်ၸိူဝ်းၼႆႉ။