လၢႆးၵၢၼ်ငဝ်ႈႁၢင်ႈသဵင် ၸၢဝ်းၶိူဝ်း 8 ၸၢဝ်းၶိူဝ်း (ELTV) ဢၼ်ပွႆႇယူႇတီႈႁူင်းပွႆႇငဝ်းႁၢင်ႈသဵင် DVB ၼၼ်ႉ ယွၼ်ႉ မီးလွင်ႈ လႅၵ်ႈလၢႆႈၶၢဝ်းယၢမ်းလႄႈ ၵူႈလၢႆးၵၢၼ် 8 ၸၢဝ်းၶိူဝ်း လႆႈၶၢႆႉလႅၵ်ႈလၢႆႈၸွမ်း ဝႃႈၼႆ။

တႄႇဢဝ် လိူၼ်ၾႅပ်ႊၿိဝ်ႊရီႊ 2019 ၼႆႉမႃး ၽူႈမီးပုၼ်ႈၽွၼ်း တီႈႁွင်ႈၵၢၼ်ၶၢဝ်ႇ DVB Democratic Voice of Burma လႅၵ်ႈလၢႆႈၶၢဝ်းယၢမ်းလၢႆးၵၢၼ်ဢွၵ်ႇငဝ်းႁၢင်ႈသဵင် (TV) လႄႈ လၢႆးၵၢၼ်ငဝ်းႁၢင်ႈသဵင်ၸၢဝ်းၶိူဝ်း မိူၼ်ၼင်ႇ တႆး၊ ၶၢင်၊ ယၢင်းၽိူၵ်ႇ၊ မွၼ်း၊ ရၶႅင်ႇ၊ ၶျၢင်း၊ ယၢင်းလႅင် လႄႈ မၢၼ်ႈ ၸဵမ်ၸိူဝ်းၼႆႉ လႆႈၶၢႆႉလႅၵ်ႈလၢႆႈၸွမ်းၶၢဝ်းယၢမ်း ဝႃႈၼႆ။

ၼၢင်းမူၺ်ၶၢဝ် ၵႅမ်ၽူႈၵုမ်းၾၢႆႇႁဵတ်းဢွၵ်ႇငဝ်းႁၢင်ႈသဵင်ၸၢဝ်းၶိူဝ်း ELTV Assistant Producer လၢတ်ႈဝႃႈ “ ယူႇတီႈ ႁူင်းပွႆႇငဝ်းႁၢင်ႈသဵင် DVB လႅၵ်ႈလၢႆႈၶၢဝ်းယၢမ်း လႄႈ လၢႆးၵၢၼ်ငဝ်းႁၢင်ႈသဵင် ၸၢဝ်းၶိူဝ်းႁဝ်း 8 ၸၢဝ်းၶိူဝ်း ၼၼ်ႉ လႆႈ လႅၵ်ႈလၢႆႈၸွမ်းၶၢဝ်းယၢမ်းမၼ်းမူတ်း။ မီးလွင်ႈ သင်ၵေႃႈဢမ်ႇႁူႉ ယူႇတီႈၽူႈမီးပုၼ်ႈၽွၼ်းတီႈ DVB ၶဝ် တိုၵ်ႉၸႅင်ႈ မႃးတီႈႁဝ်းၶႃႈၵူၺ်း ဝႃႈၶဝ်မီးလွင်ႈလႅၵ်ႈလၢႆႈၶၢဝ်းယၢမ်း” ဝႃႈၼႆ။

မိူဝ်ႈၵူႈပွၵ်ႈလၢႆးၵၢၼ်ငဝ်းႁၢင်ႈသဵင်တႆး ဢၼ်ပွႆႇဝၼ်းဢင်းၵၢၼ်းၼၼ်ႉ ၵၢင်ၼႂ် 7:15 မူင်းလႄႈ ၵၢင်ၶမ်ႈ 9:45 မူင်း။ တႄႇဢဝ်ၼႆႉၵႂႃႇ ဢၼ်ပွႆႇယၢမ်းၵၢင်ၼႂ် 7:15 မူင်း ဝၼ်းဢင်းၵၢၼ်းၼၼ်ႉၵေႃႈ တေပဵၼ်လၢႆးၵၢၼ်တၢင်ႇၸၢဝ်းၶိူဝ်း မႃးပုတ်ႈတႅၼ်းသေ တႆးသမ်ႉတေလႆႈသုတ်ႉၶၢႆႉပွႆႇငဝ်းႁၢင်ႈသဵင်ယၢမ်းၵၢင်ၶမ်ႈ ဝႃႈၼႆ။

ၼၢင်းမူၺ်ၶၢဝ်သိုပ်ႇလၢတ်ႈဝႃႈ “ တွၼ်ႈတႃႇ လၢႆးၵၢၼ် ငဝ်းႁၢင်ႈသဵင် တႆးႁဝ်းၶႃႈ ဢၼ်ပွႆႇတီႈ DVB ဝၼ်းဢင်းၵၢၼ်း ၼိုင်ႈဝၼ်းလႂ် 2 ပွၵ်ႈၼၼ်ႉ တေႃႈလဵဝ် ၶၢႆႉလႅၵ်ႈပဵၼ် ၼိုင်ႈဝၼ်းၼိုင်ႈပွၵ်ႈ ၵူၺ်းၵႃႈတေပွႆႇ 2 ဝၼ်း၊ 2 ပွၵ်ႈ။ တေၶၢႆႉပဵၼ် ဝၼ်းဢင်းၵၢၼ်း ၵၢင်ၶမ်ႈ 9:15 မူင်းလႄႈ ဝၼ်း ပုတ်ႉၵၢင်ၼႂ် 7:15 မူင်း(ၶၢဝ်းယၢမ်းမိူင်းမၢၼ်ႈ)” ဝႃႈၼႆ။

လၢႆးၵၢၼ်ငဝ်းႁၢင်ႈသဵင် Ethnic Language TV ELTV ၼႆႉ ယူႇတီႈ Burma News International (BNI) ၶပ်းၶိုင်ပၼ်သေ တႄႇပွႆႇတီႈႁူင်းပွႆႇသဵင်ငဝ်းႁၢင်ႈသဵင် DVB မႃး မိူဝ်ႈပီ 2015။ လႆႈၶၢဝ်းယၢမ်းပွႆႇငဝ်းႁၢင်ႈသဵင်13 မိၼိတ်ႉ။ ၵမ်ႈၼမ် လၢႆးၵၢၼ်ငဝ်းႁၢင်ႈသဵင်ၸၢဝ်းၶိူဝ်းၼႆႉ တေပိုၼ်ၽႄႈဢွၵ်ႇၼႄ လွင်ႈပဵၼ်တႄႉမီးတႄႉ ဢၼ်ပဵၼ်ယူႇၼႂ်းၸၢဝ်းၶိူဝ်း ၽႂ်မၼ်း။ ငဝ်းႁၢင်ႈသဵင်တႆးသမ်ႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ လႆႈၶပ်းၶိုင်ၸတ်းတတ်းတေႃႇႁဵတ်းဢွၵ်ႇသေသူင်ႇ ပၼ်။