ၵူၼ်းဝၢၼ်ႈ ဢိူင်ႇပၢင်ႇလေႃႉ၊ ၼႃးပဵင်းလႄႈ ၵျွႆးၵုင်း ဢွၼ်ၵၼ် ပၢႆႈဢွၵ်ႇဝၢၼ်ႈႁိူၼ်းၽႂ်မၼ်း ယွၼ်ႉသိုၵ်းၸၢဝ်းၶိူဝ်း ၼင်ႇၵၼ် ပိုတ်းယိုဝ်းၵၼ်ႁၢဝ်ႈႁႅင်း ဝႃႈၼႆ။

တႄႇဢဝ် ဝၼ်းတီႈ 09/02/2019 မႃးၼႆႉ ၵူၼ်းဝၢၼ်ႈၼႃးပုင်ႇ၊ ဝၢၼ်ႈၼႃးပဵင်း၊ ၵွင်းႁုင်း၊ ၼႃးၶွၼ်ႇ၊ လွႆမူၼ်း၊ ၼမ်ႉ ပႅၼ်ႈ၊ ပၢင်ႇလေႃႉလႄႈ ၶွၵ်ႈဝူဝ်း ဢွၼ်ၵၼ်ပၢႆႈမႃးသွၼ်ႈဝႆႉတီႈ ၵျွင်းယွတ်ႈ 400 ပၢႆ၊ ၵျွင်းဢွင်ႇသုပၢၼ်ႇ 300 ပၢႆ၊ ဝတ်ႉၼမ်ႉၸဵတ်းလိၼ်း 60 ပၢႆ လႄႈ ၸွမ်းႁိူၼ်းပီႈၼွင်ႉ ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ ယွၼ်ႉ သိုၵ်း SSPP လႄႈ ၸုမ်းဢူၺ်းလီ ႁူမ်ႈၵၼ် လႆႈပိုတ်းယိုဝ်းၵၼ်တင်းသိုၵ်း RCSS ႁၢဝ်ႈႁႅင်း ဝႃႈၼႆ။

ၸၢႆးထုၼ်းဝိၼ်း ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈမၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်း ဝၢၼ်ႈ ပၢႆႈဢွၵ်ႇမႃး ၶႂ်ႈမီးႁိမ်း 1,000 ၶႃႈယဝ်ႉ။ ပၢင်တိုၵ်းတႄႉ ပဵၼ် ႁိမ်းဝၢၼ်ႈၼမ်ႉပႅၼ်ႈ ဢိူင်ႇ ပၢင်ႇလေႃႉ။ မၢင်ဝၢၼ်ႈ ဢၼ်ၸမ်ၼၼ်ႉၵေႃႈ ဢွၼ်ၵၼ်ငိူင်ႉဝႄႈပၢႆႈဢွၵ်ႇမႃးထႃႈ။ မိူၼ်ၸိူင်ႉ ၼႃးပုင်ႇ၊ ၼႃးပဵင်း၊ ၼႃးၶွၼ်ႇ၊ လွႆမူၼ်းၶဝ် ၸိူဝ်း ၼႆႉ ငိူင်ႉပၢႆႈၸွမ်း ။ လွင်ႈၶဝ်ႈၼမ်ႉတၢင်းၵိၼ်တႄႉ ပေႃးၶိုၵ်ႉၶၵ်ႉပဵၼ်မႃး လႆႈဢဝ်ငိုၼ်းၵွင်ၵၢင်ၸႄႈဝဵင်း ၸႂ်ႉၸၢႆႇ လဵင်ႉ လူ ဝႆႉဢွၼ်တၢင်းၶႃႈ” ဝႃႈၼႆ။

ပၢင်တိုၵ်းဢၼ်ပဵၼ်ယူႇတၢင်းပွတ်းၸႄႈဝဵင်းၵျွၵ်ႉမႄးၼႆႉ ပဵၼ်ၵၼ်မႃး မီးၶၢဝ်းတၢင်း 4 – 5 ဝၼ်းယဝ်ႉ ပႆႇယဵၼ် ။ တင်း သွင်ၾၢႆႇတိုၵ်ႉ ထႅမ်ႁႅင်းသိုၵ်းတေႃႇၵၼ်ယူႇ ဝႃႈၼႆ။

ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈဝဵင်းၵျွၵ်ႉမႄးၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ပၢင်တိုၵ်းၼႆႉ ၶႂ်ႈဝႃႈ ပဵၼ် ႁိမ်း 5 ဝၼ်းယဝ်ႉ။ မိူဝ်ႈၼႆႉ ၵေႃႈတိုၵ်ႉပဵၼ်ၵၼ်ထႅင်ႈယူႇ ၼႂ်းဝူင်ႈၵၢင်ၼႃးပုင်ႇလႄႈ ၼမ်ႉပႅၼ်ႈ။ ၶဝ်ယိုဝ်းၵၼ် တေ လႆႈၼိုင်ႈၸူဝ်ႈမူင်းယဝ်ႉ။ ဢၼ်ယိုဝ်းၵၼ်ၵေႃႈ ပဵၼ်ႁဝ်းတေႃႇႁဝ်းၼင်ႇၵၼ်ၵူၺ်း လိူဝ်ၼၼ်ႉ သိုၵ်း မၢၼ်ႈၵေႃႈ ၶိုၼ်ႈ မိူဝ်းထႅင်ႈ” ဝႃႈၼႆ။

တၢင်းပွတ်းၸႄႈဝဵင်းၵျွၵ်ႉမႄးၼႆႉ ၸုမ်းယိပ်းၵွင်ႈၵၢင်ႇ ဢၼ်တူင်ႉၼိုင်ၵႂႃႇမႃး မီးမိူၼ်ၼင်ႇ တပ်ႉသိုၵ်းလူင်ပွင်ၸိုင်ႈ မၢၼ်ႈ၊ တပ်ႉသိုၵ်းတဢၢင်း၊ တပ်ႉသိုၵ်းဝၢၼ်ႈႁႆးလႄႈ တပ်ႉသိုၵ်းလွႆတႆးလႅင်း ၸဵမ်ၸိူဝ်းၼႆႉ။