ပီႈၼွင်ႉတႆးဢၼ်ႁွတ်ႈၽႅဝ်ဝႆ့တီႈ မိူင်း USA ႁူမ်ႈၵၼ်ၸတ်းႁဵတ်းပၢင်ၵႅဝ်ႈ ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 72 ပီ ပိူဝ်ႈႁႂ်ႈၵူၼ်းၼုမ်ႇဢၼ်ၽၢတ်ႇယၢၼ်မိူင်းတႆး တေလႆႈႁဵၼ်းႁူ့လွင်ႈတႆး ပိုၼ်းတႆး ။

ဝၼ်းတီႈ 10/02/2019 ပီႈၼွင်ႉတႆးဢၼ်ႁွတ်ႈၽႅဝ်ဝႆ့တီႈမိူင်း USA ဢွၼ်ၵၼ်ၸတ်းႁဵတ်းဝၼ်းၸိူဝ်ႉၸၢတ်ႈ   ၸိုင်ႈတႆးၶွပ်ႈတဵမ် 72 ပီ ၸတ်းႁဵတ်းတီႈ Parker Ave, Hawthorne New Jersey USA မီးပီႈၼွင်ႉတႆး ဢၼ်ယူႇႁိမ်းႁွမ်းလႄႈ ပီႈၼွင့်ၵူၼ်းမိူင်း US ၶဝ်ႈႁူမ်ႈ 30 ပၢႆ။

ၸၢႆးၼေႃႇၶမ်း ပီႈၼွင်ႉတႆးဢၼ်ႁွတ်ႈၽႅဝ်မိူင်း USA လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ယိူင်းဢၢၼ်းဢၼ် ႁဝ်းၶႃႈၸတ်းႁဵတ်းၼႆ့တႄ့ ပီႈၼွင်ႉတႆးႁဝ်းယူႇတၢင်းလႂ်ၵေႃႈ ၼင်ႇႁိုဝ်တေ ဢမ်ႇလိုမ်းၵႂၢမ်းတႆး၊ ၾိင်ႈထုင်းတႆး၊ ပိုၼ်းတႆးၸိူဝ်းၼႆ့ဢေႃႈ လိူဝ်ၼၼ်ႉၵေႃႈၶႂ်ႈႁႂ်ႈပီႈၼွင်ႉတႆးတၢင်းၼႆ့ မီးလွင်ႈမိုတ်ႈၵိုဝ်းၸမ်ၸႂ်ၵၼ် ၽွမ်ႉႁူမ်ႈၸွႆႈထႅမ် ၵၼ်ၵႂႃႇမိူဝ်းၼႃႈၶၢဝ်းၵႆ ” ဝႃႈၼႆ။

ယူႇတီႈပီႈၼွင်ႉတႆးဢၼ်ႁွတ်ႈၽႅဝ်တီႈမိူင်း USA သေ ၸတ်းႁဵတ်းပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆးမႃး ပဵၼ်ပွၵ်ႈၵမ်း 2 ။ တေသိုပ်ႇၸတ်းႁဵတ်းၵႂႃႇၵူႈပီပီ ဝႃႈၼႆ။

ဝၼ်းတီႈ 7 လိူၼ်ၾႅပ်ႊၿိဝ်ႊရီႊ 1947 ၽူႈတႅၼ်းၸဝ်ႈၾႃႉ 7 ၸဝ်ႈ၊ တူဝ်တႅၼ်းၵူၼ်းမိူင်း 7 ၵေႃႉ လႆႈၸႂ်ၵၼ် သေ ၶွတ်ႇၽွတ်ႈၶွင်ႇသီႇၸိုင်ႈတႆး။ ပီ 1947 လိူၼ်ၾႅပ်ႊၿိဝ်ႊရီႊ ဝၼ်းတီႈ 11 ၼၼ်ႉ ၸဝ်ႈၶုၼ်ပၢၼ်းၸိင်ႇၸဝ်ႈ ၾႃႉလူင်ၼမ်ႉသၼ်ႇ ဢၼ်ပဵၼ်ႁူဝ်ပဝ်ႈၶွင်ႇသီႇၸိုင်ႈတႆး SSC ၼၼ်ႉ လူင်းလၢႆးမိုဝ်းမၵ်းမၼ်ႈပၼ် 3 ပိူင် – ဝၼ်းတီႈ 7 လိူၼ်ၾႅပ်ႊၿိဝ်ႊရီႊ မၵ်းမၼ်ႈပဵၼ်ဝၼ်းၸိူဝ်ႉ ၸၢတ်ႈၸိုင်ႈတႆး၊ ၸွမ်ပိဝ်ဢၼ် မီးသီလိူင်ၶဵဝ်လႅင်ၼႂ်း ၵၢင်ဝူင်းၶၢဝ်ၼၼ်ႉ ပဵၼ်တုင်းၸိူဝ်ႉၸၢတ်ႈ ၸိုင်ႈတႆး(ၸူဝ်ႈၵႅပ်ႉ)၊ ၽဵင်းၵႂၢမ်း ၶိူဝ်းတႆးၶိူဝ်းရႃႇၸႃႇၼၼ်ႉ ပဵၼ်ၽဵင်း တၢင်ႇတုင်းၸိူဝ်ႉၸၢတ်ႈ (ၸွမ်ပိဝ်) ႁိုဝ် ၽဵင်းၸိူဝ်ႉၸၢတ်ႈၸိုင်ႈတႆး ၸဵမ်ၸိူဝ်းၼႆႉ။