ၵူၼ်းဝၢၼ်ႈတႃႈလူင် ဢၼ်ၺႃးၸၢၵ်ႇမၢၵ်ႇ မိူဝ်ႈပၢႆႈပၢင်တိုၵ်းမိူဝ်ႈလိူၼ်ပူၼ်ႉမႃးၼႆႉၼၼ်ႉ ယၢမ်းလဵဝ်ယူတ်းယႃ တူဝ်ၶႅၼ်းၸိုၼ်ႈမႃးယဝ်ႉလႄႈ လႆႈလူင်းႁူင်းယႃ ပွၵ်ႈမိူဝ်းယူႇႁိူၼ်းၶိုၼ်းယဝ်ႉဝႃႈၼႆသေတႃႉ ၵႃႈၸႂ်ႉၸၢႆႇယူတ်းယႃ တူဝ် 10 သႅၼ်ပၢႆ ယၢပ်ႇၽိုတ်ႇဝႆႉ ဝႃႈၼႆ။
ၸၢႆးၵမ်ႇ ဢႃယု 22 ပီ ၵူၼ်းဝၢၼ်ႈတႃႈလူင် ဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ဢၼ် ၺႃးၸၢၵ်ႇမၢၵ်ႇၵွင်ႈ တီႈႁူဝ် ၶဝ်ႇၾၢႆႇသၢႆႉ မိူဝ်ႈပၢင်တိုၵ်း SSPP တင်း RCSS ပဵၼ်ပၢင်တိုၵ်းၵၼ် ႁိမ်းဝၢၼ်ႈတႃႈလူင် မိူဝ်ႈဝၼ်းတီႈ 22/01/2019 ပူၼ်ႉမႃးၼၼ်ႉ လႆႈဢွၵ်ႇႁူင်းယႃ ပွၵ်ႈႁိူၼ်းၶိုၼ်းမိူဝ်ႈဝၼ်းတီႈ 09/02/2019။
ပီႈၼွင်ႉၸမ်ၸႂ် ၸၢႆးၵမ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ လႆႈလူင်းႁူင်းယႃယဝ်ႉၶႃႈ။ တေဝႃႈၶႅၼ်းႁႃႉၼႆၵေႃႈ ပႆႇၶႅၼ်းၶႃႈ။ လဵၵ်း(သတီး) ဢၼ်သႂ်ႇဝႆႉတီႈၶႃမၼ်းၸၢႆးၼၼ်ႉ မေႃယႃၶဝ် ႁႂ်ႈသႂ်ႇ 45 ဝၼ်းၵွၼ်ႇ ၸင်ႇတေလႆႈဢဝ်ဢွၵ်ႇ။ ယဝ်ႉ ၵေႃႈ ၼိုင်ႈဝူင်ႈလႂ် ၼိုင်ႈပွၵ်ႈ တေလႆႈၵႂႃႇၼႄမေႃယႃ ။ ၵႃႈၸႂ်ႉၸၢႆႇၵႃႈယူတ်းယႃမၼ်းၸၢႆးၼႆႉ ဢမ်ႇယွမ်း 10 သႅၼ်ပျႃး ၶႃႈ ယဝ်ႉ။ ၵႃႈလဵၵ်း(သတီး) သႂ်ႇတီႈၶႃမၼ်းၵူၺ်း ပေႃးတူၵ်းမႅၼ်ႈ 7 သႅၼ်ပျႃးယဝ်ႉ။ ၵႃႈယႃႈယႃ တေႃႇဝၼ်းသမ်ႉ 3 မိုၼ်ႇ ပျႃး ထိုင် 7 မိုၼ်ႇပျႃး ။ ႁဝ်းၶႃႈပဵၼ်ၵူၼ်းဝၢၼ်ႈႁႃၵိၼ်လဵင်ႉ တွင်ႉဝၼ်းလႂ်ဝၼ်းၼၼ်ႉၵူၺ်း ဢမ်ႇၸႂ်ႈသိုၵ်းၸုမ်း လႂ် ဢမ်ႇႁဵတ်းၵၢၼ်မိူင်းသင်ၶႃႈ ” ဝႃႈၼႆ။
ၸၢႆးၵမ်ႇၼႆႉ ပဵၼ်လုၵ်ႈၸၢႆး လုင်းၸၢႆးလူင် လႄႈ ပႃႈၼၢင်းထုၼ်း ။ မေးၼၢင်းပဵၼ် ၼၢင်းၽိတ်ႈ မီးလုၵ်ႈယိင်းဢွၼ်ႇ ၸိုဝ်ႈ ႁွင်ႉ ၼၢင်းၸၢမ်လိုၼ်း ဢႃယု 3 ၶူပ်ႇ ပဵၼ်ၵူၼ်းဝၢၼ်ႈတႃႈလူင် ဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ။
ယွၼ်ႉဝႃႈပၢင်တိုၵ်းသိုၵ်းသိူဝ်ပဵၼ်ယူႇၶိူဝ်းယႂ်းလႄႈ ၵူၼ်းဝၢၼ်ႈၵုမ်ႇလႆႈပၢႆႈၽေးသိုၵ်းယူႇတိၵ်းတိၵ်း။ ဢမ်ႇမီးၶၢဝ်းႁဵတ်းၵိၼ်ၵၢၼ်လီလီ။ ယင်းလႆႈမႆႈၸႂ်တႃႇလဵင်ႉၼႃႈႁိူၼ်းၼႂ်းပီတေမႃးၼႆႉ – ၵူၼ်းဝၢၼ်ႈတႃႈလူင်လၢတ်ႈ။
ၵဵဝ်ႇၵပ်းလွင်ႈၼႆႉ ထဝ်ႈဝၢၼ်ႈထဝ်ႈၼႃး ၵူၼ်းသီႇပေႃႉ ဢႃယုမွၵ်ႈ 50 ၵေႃႉၼိုင်ႈလၢတ်ႈဝႃႈ – “ ဢမ်ႇဝႃႈတပ်ႉသိုၵ်း ၸုမ်းလႂ် ပွတ်းႁွင်ႇ၊ ပွတ်းၸၢၼ်းၵေႃႈယဝ်ႉ ပဵၼ်ၵူၼ်းမိူင်းတႆး မူတ်းမူတ်းၵူၺ်း ဢၼ်ၵႂႃႇႁဵတ်း သိုၵ်း၊ ဢၼ်မီးယူႇၼႂ်း သိုၵ်းၸိူဝ်းၼၼ်ႉၵေႃႈ ပဵၼ်ၵူၼ်းမိူင်းတႆးၵူၺ်း။ ၵမ်ႉၵဵပ်းသိုၵ်းဝႃႇ၊ ၵဵပ်းၵူၼ်းဝႃႇ၊ ၵဵပ်းၶွၼ်ႇဝႃႇ ၸဵမ်ၸိူဝ်းၼႆႉ ဢဝ်တီႈ ၵူၼ်းမိူင်းလၢႆလၢႆယဝ်ႉ။ ၵမ်းၼႆႉ ပဵၼ်ၸုမ်းၼႆႉဢိူဝ်ႈ ၸုမ်းၼၼ်ႉဢိူဝ်ႈ။ တေဢဝ်ၸုမ်းပဵၼ်ယႂ်ႇၵူၺ်းႁိုဝ် ဢၼ်လႆႈတူၵ်းၵိၼ်းသမ်ႉ ပဵၼ်ၵူၼ်းမိူင်း၊ ၶဝ်ၼင်ႇၵၼ်ႁႆႇၵၼ်ၵူၺ်းပႆႇၵႃး ပၢႆၼႄးပႃးၵူၼ်းမိူင်း ပဵၼ်ၸႂ်ၸုမ်းၼၼ်ႉၸုမ်းၼႆႉထႅင်ႈ။ မၢင်ပွၵ်ႈမႃး လီဢိမ်ႇၼႃႇၶႃႈလွင်ႈၼႆႉ” – ဝႃႈၼႆ။
တေႃႈလဵဝ် ၵူၼ်းပၢႆႈၽေးသိုၵ်းတီႈသီႇပေႃႉ တင်းမူတ်းမီး 630 ၵေႃႉ။ တီႈဝတ်ႉၼႃးမၢၵ်ႇၶေႃ 270 ၵေႃႉ၊ တီႈၵျွင်းလီႇသူး 98 ၵေႃႉ၊ ဝတ်ႉၼႃးၵၢင် 232 ၵေႃႉလႄႈ ဝတ်ႉသူၼ်ဢွႆႈ 30 ၵေႃႉ ၸဵမ်ၸိူဝ်းၼႆႉ။
ၵူၼ်းပၢႆႈၽေးသိုၵ်းဢွၵ်ႇမႃးသမ်ႉ ပဵၼ်ၵူၼ်းဝၢၼ်ႈ ၼႂ်းလူင်၊ တူၼ်ႈၵႅင်း၊ ႁူဝ်ၼႃး၊ ဝၢၼ်ႈႁူမ်ႈ၊ တႃႈလူင်၊ ၵဵတ်းၽူၼ်၊ လွႆမွၵ်ႇ၊ သၢႆးၶၢဝ်၊ လူင်ဝၢႆ၊ ၽၵ်းၼၢမ်၊ မၢၼ်ႈမႂ်ႇလႄႈ ၼႃးမူၼ်း ၸဵမ်ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ