တႃႇတေမူၼ်ႉမႄးပိူင်ငဝ်ႈပိုင်းမိူင်း 2008 ၽႂ်းဝႆးၼၼ်ႉ ယူႇတီႈၽူႈတႅၼ်းသၽႃး၊ တပ်ႉသိုၵ်းမၢၼ်ႈ ဢုပ်ႇဢူဝ်း ငူပ်ႉငီႉၵၼ် တႃႇၶွတ်ႇၽွတ်ႈၶွမ်ႊမတီႊမူၼ်ႉမႄးယင်းတိုၵ်ႉမီးလွင်ႈၶွင်ႉၶမ်ယူႇ ပႆႇၶိုပ်ႈၼႃႈသင် ဝႃႈၼႆ။
ဝၼ်းတီႈ 08/02/2019 ယူႇတီႈႁူဝ်ပဝ်ႈသၽႃးၵူၼ်းမိူင်း ဢူးတီႇၶုၼ်ႇမျၢတ်ႉ ႁွင်ႉပၢင်ၵုမ်တႃႇၶွတ်ႇၽွတ်ႈၶွမ်ႊမတီႊ မူၼ်ႉမႄး ပိုင်ငဝ်ႈ ပိူင်းမိူင်း 2008 တီႈႁွင်ႈသပူႇသီႇရိ ၼေႇပျီႇတေႃႇၼၼ်ႉ ယူႇတီႈတပ်ႉသိုၵ်းမၢၼ်ႈ တင်း ပႃႇတီႇ သၢင်ႇသီႈ ပႆႇတူၵ်းလူင်းလႆႈၸႂ် တိုၵ်ႉမီးလွင်ႈၶွင်ႉၶမ်ယူႇလႄႈ လႆႈၶၢႆႉလိူၼ်ႈဝၼ်းၵႂႃႇထႅင်ႈ ဝၼ်းတီႈ 15/02/2019 ၸင်ႇတေဢုပ်ႇၵုမ် ၵၼ်ၶိုၼ်း ဝႃႈၼႆ။
ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ ပႃႇတီႇႁူဝ်သိူဝ် လၢတ်ႈ တီႈၽူႈတွႆႇႁွၵ်ႈဝႃႈ “ ယူႇတီႈၾၢႆႇၸၢဝ်းၶိူဝ်းမၢၼ်ႈၶဝ် ဢမ်ႇၶဝ်ႈၵၼ်ၼႆႉ ႁဵတ်းႁႂ်ႈသုၼ်ႇလႆႈသုၼ်ႇပဵၼ်ၸၢဝ်းၶိူဝ်းႁဝ်း လူႉသုမ်းမႃးၼႆႉ မၼ်းဢမ်ႇၸႂ်ႈပွၵ်ႈၼႆႉၵူၺ်းမၼ်းၼမ်ၼႃႇယဝ်ႉ။ ပေႃးၶဝ်ၵုမ်ႇဝႃႈ ဢဝ်ၸုမ်းၵဝ်ဝႃႈ၊ ၸုမ်းမႂ်းဝႃႈ ဢမ်ႇ ၶဝ်ႈၵၼ်ၸိုင် တေႁဵတ်းႁိုဝ် မူၼ်ႉမႄးလႆႈလၵ်းမိူင်း။ ပိူင်ယႂ်ႇမၼ်းပေႃးမူၼ်ႉမႄးလႆႈလၵ်းမိူင်းၵေႃႈ မၼ်းတေလီ တႃႇပတ်း ပိုၼ်ႉတူဝ်ႈမိူင်း။ ၼႆႉၵေႃႈ ၽႂ်ၵေႃႈၶႂ်ႈပဵၼ်ယႂ်ႇသေ ဢမ်ႇၶဝ်ႈတိၼ်ၶဝ်ႈမိုဝ်းၵၼ် ႁဵတ်းၼႆတိၵ်း တိၵ်းတႄႉ မၼ်းတေႁဵတ်းႁႂ်ႈၸၢဝ်းၶိူဝ်းယၢပ်ႇၽိုတ်ႇ။ တေႃႈလဵဝ် ပႃႇတီႇ NLD ၶႂ်ႈမႄး၊ သိုၵ်းမၢၼ်ႈလႄႈ တင်းပႃႇတီႇ သၢင်ႇသီႈ သမ်ႉဝႃႈ လူဝ်ႇၼၼ်ႉဢိူဝ်ႈ၊ လူဝ်ႇၼႆႉဢိူဝ်ႈ ၶၢဝ်းတၢင်းမၼ်းတေယၢပ်ႇယဵၼ်းၵႂႃႇတိၵ်းတိၵ်း ႁဝ်းတႄႉႁၼ် ထိုင်ၸိူင်ႉၼႆ” ဝႃႈၼႆ။
လိူဝ်ၼၼ်ႉ ၸၢႆးၵျေႃႇသီႇႁႃႉ ၽူႈတႅၼ်းသၽႃးၵူၼ်းမိူင်းၸႄႈဝဵင်းမိူင်းယႆၵေႃႈ လၢတ်ႈဝႃႈ “ ငဝ်းလၢႆးယၢမ်းလဵဝ်ၼႆႉတႄႉ ပႆႇမီးၶေႃႈတႅပ်းတတ်းလၢၵ်ႇလၢႆးသင်၊ မီးဢၼ်ၼိုင်ႈတႄႉၵေႃႈ တေႁဵတ်းပၢင်ၵုမ်ထႅင်ႈၵမ်းၼိုင်ႈ ဝႃႈၼႆၵူၺ်း။ လႆႈထဵင်ၵၼ်ၼမ်ၵျႃႉ။ ၶမ်ဝႆႉယူႇတီႈတေၶွတ်ႇၽွတ်ႈၸုမ်းၼၼ်ႉၶႃႈ။ တေလႆႈပၼ်ၶၢဝ်းယၢမ်းသေ ဢုပ်ႇၵုမ် ၵၼ်ၵႂႃႇထႅင်ႈယူႇ” ဝႃႈၼႆ။
ဢူးတွင်းဢေး ၽူႈတႅၼ်းပႃႇ တီႇသၢင်ႇသီႈလၢတ်ႈဝႆႉတီႈသိုဝ်ႇၶၢဝ်ႇ Irrawaddy ဝႃႈ“ ဢမ်ႇလႆႈၶဝ်ႈပႃးႁူဝ်ၵူၼ်းၽဵင်ႇပဵင်း ၵၼ်ၼႆသေတႃႉ တႃႇတႅပ်းတတ်းၼၼ်ႉ တၵ်းတေလႆႈမီးႁႅင်းၽဵင်ႇပဵင်းၵၼ် လႄႈယၢမ်းလဵဝ် ပေႃးမႃးတူၺ်းဢဵၼ်ႁႅင်း ဢၼ်တေၶဝ်ႈပႃးၼၼ်ႉၸိုင် 45 ၵေႃႉၼႆႉ NLD 20 ၵေႃႉ၊ လိူဝ်ၼၼ်ႉ ၼိုင်ႈပႃႇတီႇတၵ်းတေလႆႈပႃးၽဵင်ႇပဵင်းၵၼ် ပႃး ၸဵမ်သၢင်ႇသီႈ” ဝႃႈၼႆ။
ၼႂ်းသၽႃးႁူမ်ႈတုမ်ၼႆႉ မီးဝႆႉၽူႈတႅၼ်း NLD 59 ပိူဝ်ႊသႅၼ်ႊ၊ ၽူႈတႅၼ်းပႃႇတီႇၸၢဝ်းၶိူဝ်း 11 ပိူဝ်ႊသႅၼ်ႊ၊ ပႃႇတီႇ သၢင်ႇသီႈ 5 ပိူဝ်ႊသႅၼ်ႊလႄႈ တူဝ်တႅၼ်းသိုၵ်းမၢၼ်ႈ 25 ပိူဝ်ႊသႅၼ်ႊ။ လႆႈဝႃႈတူဝ်တႅၼ်းသိုၵ်းမၢၼ်ႈ ၼမ်ထီႉ 2 ။