ၵူၼ်းၼုမ်ႇၸုမ်းၼိုင်ႈ ဢဵၼ်ႁႅင်း 10 ပၢႆ ယိုဝ်းၵွင်ႈတီႈႁိမ်းၾင်ႇၼမ်ႉမၢဝ်း တီႈမီးၵူၼ်းဢႅဝ်ႇယဵမ်ႈၼမ် ႁဵတ်းႁႂ်ႈၵူၼ်း မိူင်းတူၵ်းၸႂ်တိုၼ်ႇသၢၼ်ႈ။
ဢၼ်ၶဝ်ယိုဝ်းၵွင်ႈၶိုၼ်ႈၾႃႉတီႈတႃႈႁိူဝ်းတေႃႇယွတ်ႈ ဝဵင်းမူႇၸေႊၼၼ်ႉ ပဵၼ်ဝၼ်းတီႈ 10/02/2019 ယၢမ်းဝၢႆးဝၼ်း 4 မူင်း၊ ပဵၼ်ၸုမ်းလႂ်၊ ပဵၼ်ၽႂ်ယင်းပႆႇႁူႉ၊ ပဵၼ်ၵူၼ်းၼုမ်ႇဢႃယု သႅၼ်းပၢၼ် 25 ထိုင် 35 ၼႆႉ ဝႃႈၼႆ။
ၵူၼ်းမိူင်းမူႇၸေႊၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ တီႈတႄႉမၼ်း တီႈၼၼ်ႈၼၼ်ႉ မၼ်းဢမ်ႇၸႂ်ႈတီႈ ယိုဝ်းၵွင်ႈ ၶႃႈလူး၊ မၼ်းပဵၼ်တီႈၵူၼ်းဢႅဝ်ႇလႄႇၵၼ်ၶႃႈၼႃႇ။ ၵူၼ်းဢၼ်မႃးဢႅဝ်ႇလႄႇၸိူဝ်းၼၼ်ႉ ဢွၼ်ၵၼ်ၵူဝ်တူၵ်းၸႂ်ၵၼ် မူတ်း။ ၵူၼ်းၼုမ်ႇၸိူဝ်းၼၼ်ႉ ၶဝ်လႅပ်ႈတေမဝ်းလဝ်ႈ မဝ်းယႃႈၵၼ်ၵေႃႈပဵၼ်လႆႈ။ ဢၼ်ၶဝ်ႁဵတ်းၼၼ် မိူၼ်ၶဝ်ၶႂ်ႈ သမ်ႉမႅၼ်ဝႃႈ ၶဝ်ဢမ်ႇၵူဝ်ၽႂ် ၼႆၼၼ်ႉၶႃႈၼႄႈ။ ၸိူဝ်းၶဝ်လၢတ်ႈၵႂၢမ်းၶႄႇၶႃႈဢေႃႈ မၼ်းမိူၼ်ဝၢၼ်ႈမိူင်းဢမ်ႇမီးၸဝ်ႈ/ မီးၶုၼ်ၼၼ်ၶႃႈယဝ်ႉ။ လွင်ႈၸိူဝ်းၼႆႉ မၼ်းဢမ်ႇလီႁဵတ်း ဢွင်ႈတီႈယိုဝ်းမၼ်းၵေႃႈဢမ်ႇၸႂ်ႈ လုၵ်ႈဢွၼ်ႇၼုမ်ႇၸိူဝ်းၼႆႉ ပဵၼ်ၸုမ်းပျီႇတူႉၸိတ်ႉႁႃႉ ဢမ်ႇၸႂ်ႈႁႃႉ ဢၼ်ဝႃႈၼၼ်ႉ ႁဝ်းၶႃႈၵေႃႈ ပႆႇယိုၼ်ယၼ်လႆႈ” ဝႃႈၼႆ။
မၢၵ်ႇၵွင်ႈဢၼ်ၶဝ်ယိုဝ်းၶိုၼ်ႈၾႃႉၼၼ်ႉ ၵူၼ်းပိုၼ်ႉတီႈၶဝ် ၵဵပ်းလႆႈၶွၵ်ႇမၼ်းတူၵ်းဝႆႉ မီး 8 လုၵ်ႈ ဝႃႈၼႆ။
ၵူၼ်းပိုၼ်ႉတီႈ လၢတ်ႈဝႃႈ “ ဢၼ်ၶဝ်ယိုဝ်းၶိုၼ်ႈၾႃႉၼၼ်ႉ လႅပ်ႈတေပဵၼ် 10 ၵမ်းပၢႆ။ ၶဝ်တေပုတ်ႈၵၼ်ယိုဝ်း ၼိုင်ႈ ၵေႃႉ သွင်သၢမ်ၵမ်း။ တေယိုဝ်း မွၵ်ႈ 2-3 ၵေႃႉ။ လိူဝ်ၼၼ်ႉ တၢင်းပွတ်းမူႇၸေႊ ႁဝ်းၶႃႈၼႆႉ ယႃႈမဝ်းၵမ် ၵေႃႈလိူင်ႇ ၽႄႈၼမ်။ ၵူၼ်းႁၢႆႉၵူၼ်းလိူင်းၵေႃႈၼမ်၊ ၵူၼ်းလၵ်ႉၵေႃႈၼမ်။ ၵူၼ်းတၢင်ႇတီႈသီႇ လႅၼ် မႃးယူႇၵေႃႈၼမ်၊ ယဝ်ႉၵေႃႈ ဢမ်ႇမီးလွင်ႈႁူမ်ႇလူမ်ႈတႃႇၵူၼ်းမိူင်းသင်”ဝႃႈၼႆ။
ၸႄႈဝဵင်းမူႇၸေႈၼႆႉ ပဵၼ်လႅၼ်လိၼ် တိတ်းၸပ်း မိူင်းၶႄႇ ပဵၼ်ဝဵင်းၵႃႉငၢႆႈၶၢႆလီ၊ ၸုမ်းယိပ်းၵွင်ႈၵၢင်ႇၵေႃႈၼမ်၊ ပျီႇတူႉၸိတ်ႉၵေႃႈၼမ်၊ ယႃႈမဝ်းၵမ်ၵေႃႈလိူင်ႇၽႄႈၼမ် ၵူၼ်းမူႇၸေႊလၢတ်ႈ။
ဢွင်ႈတီႈၾင်ႇၼမ်ႉမၢဝ်း တႃႈႁိူဝ်းတေႃႇယွတ်ႈၼႆႉ ပဵၼ်တီႈၵူၼ်းမိူင်းမႃးဢႅဝ်ႈယဵမ်ႈလိုဝ်ႈႁိူဝ်ႉလိုဝ်ႈၸႂ် မႃးၸဵမ်မိူဝ်ႈပီ 2018 ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ