ၸုမ်းတူင်ႉၼိုင်တူင်ႇဝူင်းတႆး ၸႄႈဝဵင်းတူၼ်ႈတီး ႁူမ်ႈၵၼ်ပႂ်ႉႁပ်ႉတွၼ်ႈ ၵူၼ်းၼုမ်ႇတႆး ပၼ်ႇရူတ်ႉထိပ်ႇဢၼ် လုၵ်ႉၵဵင်းမႆႇ ပၼ်ႇထိုင် တူၼ်ႈတီး ၸိုင်ႈတႆးပွတ်းၸၢၼ်း ဝႃႈၼႆ။
ဝၼ်းတီႈ 10/02/2019 ယၢမ်းဝၢႆးဝၼ်း မွၵ်ႈ 4 မူင်းပၢႆ ၸၢႆးသႅင်ႁၢၼ်၊ ၸၢႆးဢွၼ်ႇၶိူဝ်း 2 ပီႈၼွင်ႉ ဢၼ်လုၵ်ႉဝဵင်းၵဵင်းမႆႇ မိူင်းထႆး ပၼ်ရူတ်ႉထိပ်ႇမိူဝ်းႁူမ်ႈပႃး ၸၢႆးထဵင်ႇလိၼ်း ဢၼ်လုၵ်ႉလၢင်းၶိူဝ်းၵႂႃႇၸွမ်း ဢွၼ်ၵၼ်ပၼ်ႇရူတ်ႉထိပ်ႇႁွတ်ႈ ထိုင် ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ ယူႇတီႈၵေႃလိၵ်ႈလၢႆးလႄႈ ၾိင်ႈငႄႈ တႆး ၸႄႈဝဵင်းတူၼ်ႈတီး ဢိၵ်ႇ လူၺ်ႈ ၸုမ်းတူင်ႉၼိုင်တူင်ႇဝူင်းတႆး ထႅင်ႈလၢႆၸုမ်း ႁူမ်ႈၵၼ် ႁပ်ႉတွၼ်ႈ တီႈႁူင်းႁေႃၵေႃလိၵ်ႈ လၢႆး ဝႃႈၼႆ။
ၸၢႆးဢွၼ်ႇၶိူဝ်း ၵေႃႉပၼ်ႇရူတ်ႉထိပ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ႁွတ်ႈထိုင် တူၼ်ႈတီးမိူဝ်ႈၶမ်ႈဝႃးၶႃႈ။ ယိၼ်းၸူမ်း ၶွပ်ႈၸႂ်ထိုင် ပီႈပီႈၼွင်ႉၼွင်ႉႁဝ်းၶႃႈ ၵူႈၵေႃႉ ပႂ်ႉႁပ်ႉတွၼ်ႈႁဝ်းၶႃႈ ပၼ်ႇရူတ်ႉထိပ်ႇ။ ယိၼ်းၸူမ်းပေႃးဢမ်ႇသုတ်းဢမ်ႇ သဵင်ႈၶႃႈယဝ်ႉ။ ၼႂ်းၶၢဝ်းတၢင်းႁိမ်းလိူၼ် ဢၼ်ႁဝ်းၶႃႈလႆႈပၼ်ႇရူတ်ႉထိပ်ႇမႃးၼႆႉ လွင်ႈယၢပ်ႇၽိုတ်ႇႁဝ်းၶႃႈတႄႉ လွင်ႈ ရူတ်ႉၵႃးၶႃႈဢေႃႈ။ ယွၼ်ႉသင်ၼႆ ယွၼ်ႉဝႃႈ ပိူၼ်ႈပဵၼ်ရူတ်ႉလူင် ႁဝ်းသမ်ႉ ပဵၼ်ရူတ်ႉထိပ်ႇ။ လႆႈဝႆႉသတိ ၼႃႇ ၵူဝ်ပိူၼ်ႈမႃးၽႃႇႁဝ်း။ ၵူႈၸိူဝ်ႉၵူႈပိူင်မႃးၸွမ်းတၢင်းတႄႉ ဢမ်ႇလႆႈမႆႈၸႂ်သင်ၶႃႈ” ဝႃႈၼႆ။
ၵၢၼ်ဢွၵ်ႇၶၢဝ်းတၢင်း မၢဝ်ႇတႆး ပၼ်ႇရူတ်ႉထိပ်ႇ 2 ပီႈၼွင်ႉၼႆႉ တႄႇဢွၵ်ႇၵဵင်းမႆႇ မိူဝ်ႈဝၼ်းတီႈ 23/01/2019 ပၼ်ႇ ႁွတ်ႈထိုင် တႃႈၶီႈလဵၵ်း၊ မိူင်းၽျၢၵ်ႈ၊ ၵဵင်းတုင်၊ မိူင်းသၢတ်ႇ၊ မိူင်းတူၼ်၊ မိူင်းပၼ်ႇ၊ လၢင်းၶိူဝ်း၊ ၵဵင်းတွင်း၊ မိူင်းၼၢႆး၊ ၶူဝ် လမ်၊ ၼမ်ႉၸၢင်၊ ပၢင်လူင်၊ လွႆလႅမ်၊ မိူင်းပွၼ်၊ ႁူဝ်ပူင်းလႄႈ တူၼ်ႈတီး ၸဵမ်ၸိူဝ်းၼႆႉ။
ယိူင်းဢၢၼ်းလူင် ဢၼ်လႆႈပၼ်ႇရူတ်ႉထိပ်ႇၶၢဝ်းတၢင်းၵႆၼၼ်ႉ ၸၢႆးဢွၼ်ႇၶိူဝ်း လႄႈ ၸုမ်းၸိူဝ်းလၢတ်ႈဝႃႈ “ တႃႇပၢႆးယူႇလီ၊ တႃႇလဵပ်ႈႁဵၼ်းသိင်ႇဝႅတ်ႉလွမ်ႉၸိုင်ႈတႆး၊ လူတ်းၼမ်ႉမၼ်းလႄႈ လူတ်းၵႂၼ်းထၢတ်ႈဢၼ်တေ ပဵၼ်ၵွင်ႉၼႂ်းလူမ်း၊ တႃႇႁၵ်ႉသႃသိင်ႇဝႅတ်ႉလွမ်ႉ၊ တႃႇႁႂ်ႈပဵၼ်ႁႅင်းၸႂ် ၵူၼ်းၼုမ်ႇတႆး၊ ၵႆယၢၼ်ယႃႈမဝ်းၵမ်” ဝႃႈၼႆ။
“တႃႇႁဵတ်းလွင်ႈလီၼႆႉ တႄႇတီႈတူဝ်ႁဝ်းသေ တေလႆႈႁဵတ်းၵႂႃႇ။ ပဵၼ်လွင်ႈလီပုၼ်ႈတႃႇတူဝ်ၸဝ်ႈၵဝ်ႇလႄႈ တႃႇၵူၼ်းတင်းၼမ်” ဝႃႈၼႆ။
မိူဝ်ႈၽုၵ်ႈ ဝၼ်းတီႈ 12/02/2019 သမ်ႉ တေပၼ်ႇရူတ်ႉထိပ်ႇလူင်းၵႂႃႇ တၢင်းၼွင်ႁၢႆးယႃႈ၊ ၵၢတ်ႇၵူႇ၊ ပၢင်လွင်း တေ သိုပ်ႇၵႂႃႇတၢင်းလွႆၶေႃ/ လွႆၵေႃႇ ၸႄႈမိူင်းယၢင်း၊ တႃႈၵုင်ႈ၊ ဝဵင်းလိူဝ်ႇ၊ ၼေႇပျီႇတေႃႇ ၸိူဝ်းၼၼ်ႉ။ လိူဝ်ၼၼ်ႉ တေပၼ်ႇ ၶိုၼ်ႈမႃးတၢင်းမိူင်းတႆးပွတ်းႁွင်ႇ မိူၼ်ၼင်ႇ ၼွင်ၶဵဝ်၊ ၵျွၵ်ႉမႄး၊ သီႇပေႃႉ၊ လႃႈ သဵဝ်ႈ၊ ၼမ်ႉၶမ်း၊ မူႇၸေႊ၊ မိူင်းယႆ၊ သႅၼ်ဝီ၊ တၢင်ႉယၢၼ်း။ လိူဝ်ၼၼ်ႉ တေၶၢမ်ႈၶူင်း ၶဝ်ႈၵႂႃႇတၢင်းမိူင်းပွၵ်ႉ၊ မိူင်းယၢင်း၊ မိူင်းၶၢၵ်ႇလႄႈ မိူင်းလႃး ၸဵမ်ၸိူဝ်းၼႆႉ။ တေၸႂ်ႉၶၢဝ်းယၢမ်း ႁိမ်း 3 လိူၼ် ဝႃႈၼႆပႃး။
ၵၢၼ်ပၼ်ႇရူတ်ႉထိပ်ႇ မၢဝ်ႇတႆး 2 ပီႈၼွင်ႉၼႆႉ တႄႇပၼ်ႇဢွၵ်ႇၵဵင်းမႆႇ မိူဝ်ႈဝၼ်းတီႈ 13/01/2019 သေ ထိုင်ယၢမ်းလဵဝ် တေမီး 28 ဝၼ်း ႁိမ်းၼိုင်ႈလိူၼ်ယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ