ၵူၼ်းဝၢၼ်ႈသၢႆးလႅင်၊ ဝၢၼ်ႈပဵင်းသႃႇလႄႈဝၢၼ်ႈသူပ်းတုင်း ဢိူင်ႇသၢႆးလႅင် ၸႄႈဝဵင်းသီႇပေႃႉ ၸိုင်ႈတႆးပွတ်း ႁွင်ႇ သၢၼ်ၶတ်းၽႅၼ်ၵၢၼ် ၶူင်း ၵၢၼ်ၾၢႆ ဢၼ်ၶွမ်ႊပၼီႊ UNIENERGY CO. LTD တေသၢင်ႈ တဵင်သႂ်ႇၼိူဝ် မႄႈၼမ်ႉမႃႉလႄႈ ၼမ်ႉပွင်ႈ ၶွႆႈၵၼ်ၼၼ်ႉ။
ၶွမ်ႊပၼီႊၼႆႉ ႁၢင်ႈႁႅၼ်းတေလူင်းႁူပ်ႉဢုပ်ႇၸွမ်းၵူၼ်းဝၢၼ်ႈၼႂ်းဢိူင်ႇသၢႆးလႅင် ၼႂ်းဝၼ်းတီႈ11/2/2019 ၼႆႉ။ ၵူၼ်းၼမ်ႉမႃႉ လၢတ်ႈဝႃႈယၢမ်းလဵဝ် ဢူးမျိၼ်ႉၸေႃႇ ၽူႈၸတ်းၵၢၼ် ၶွမ်ႊပၼီႊလႆႈႁဵတ်းလိၵ်ႈႁွင်ႉၵူၼ်းဝၢၼ်ႈဝႆႉ – တႃႇ ၶဝ်ႈ ႁူမ်ႈပၢင်ၵုမ်ၸွမ်း တီႈဝၢၼ်ႈသၢႆး လႅင် ဢိူင်ႇသၢႆးလႅင် ၸႄႈဝဵင်းသီႇပေႃႉ ၵူၼ်းမိူင်းၼႂ်းပိုၼ်ႉတီႈဢမ်ႇႁပ်ႉဢမ်ႇလႆႈၸႂ် တႃႇၶဝ်ႈႁူမ်ႈၸွမ်းပၢင်ၵုမ် ဝႃႈၼႆ။
ထဝ်ႈဝၢၼ်ႈထဝ်ႈၼႃး တီႈၼမ်ႉမႃႉ ၵေႃႉၼိုင်ႈလၢတ်ႈဝႃႈ“ႁဝ်းဢမ်ႇလူဝ်ႇၾၢႆ၊ သင်ဝႃႈသၢင်ႈၾၢႆမႃး ဢၼ်တေၺႃး ၽေး လွင်ႈတုမ်ႉတိူဝ်ႉၼၼ်ႉပဵၼ်ၵူၼ်းမိူင်းၵူၺ်း ၵွပ်ႈၼၼ်တိုၼ်း တေဢမ်ႇဢဝ်ၾၢႆ ယူႇတီႈႁဝ်းၵူၼ်းဝၢၼ်ႈၸင်ႇပိုၼ် ၽၢဝ်ႇဝႃႈ ႁဝ်းတိုၼ်းတေဢမ်ႇၶဝ်ႈႁူမ်ႈပၢင်ၵုမ်ဢၼ် ဢူးမျိၼ်ႉၸေႃႇ တေဢွၼ်ၸတ်းၼၼ်ႉ ႁဝ်းတိုၼ်းတေသၢၼ် ၶတ်းၵၢၼ်သၢင်ႈၾၢႆလႄႈ ၵၢၼ်သၢင်ႈၾၢႆၵူႈၸိူဝ်း” ဝႃႈၼႆ။
ၶွမ်ႇပၼီႇ UNIENERGY ၼႆႉၽႅၼ်ၵၢၼ်သၢင်ႈၾၢႆသႂ်ႇၼိူဝ်မႄႈၼမ်ႉ တီႈဢၼ်ၼမ်ႉမႃႉလႄႈ ၼမ်ႉပွင်ႈ ၶွႆႈၵၼ်။ တႃႇသၢင်ႈၾၢႆၼႆႉ ၶွမ်ႊပၼီႊလႆႈလူင်းၼႂ်းပိုၼ်ႉတီႈသွင်ပွၵ်ႈယဝ်ႉ၊ ပွၵ်ႈဢွၼ်တၢင်းပဵၼ်ၼႂ်းပီ 2017၊ ပွၵ်ႈၵမ်းသွင်ပဵၼ်ၼႂ်း လိူၼ်ၵျႅၼ်ႊၼိဝ်ႊရီႊ 2019 ပူၼ်ႉမႃးၼႆႉ ဝႃႈၼႆ။
