မၢႆတွင်း ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 72 ပီသေ ၵူၼ်းမိူင်းၼမ်ႉလၼ်ႈ ႁူမ်ႈၵၼ် ပိုတ်ႇပၢႆႉတၢင်းၶဝ်ႈဢွၵ်ႇဝဵင်း ၼမ်ႉလၼ်ႈ 2 တီႈ။

ပၢင်ပိုတ်ႇပၢႆႉၸတ်းၼႂ်းဝၼ်းတီႈ 07/02/2019 တီႈပၢင်ၼၼ်ႉ သင်ႇၶၸဝ်ႈ၊ ၵူၼ်းမိူင်း ပိုၼ်ႉတီႈ၊ ၵေႃလိၵ်ႈလၢႆး၊ ၽူႈမီး ပုၼ်ႈၽွၼ်းၸိူဝ်းဢွၼ်ၵေႃႇသၢင်ႈႁဵတ်းမႃး၊ ၶွမ်ႊပၼီႊ၊ ႁွင်ႈၵၢၼ်ၾၢႆႇလိူမ်ႈလႆႇၸႄႈဝဵင်း၊ ၽူႈမီးပုၼ်ႈၽွၼ်းၾၢႆႇပၢႆး ၸၢၵ်ႈ ဢူးပေႉၽဵဝ်းႁဵင်း(ဦးပြည့်ဖြိုးဟိန်း)လႄႈ ႁွင်ႈၵၢၼ်ၽွင်းငမ်း လူင်ပွင်ၸိုင်ႈၸႄႈဝဵင်း ၸဵမ်ၸိူဝ်းၼႆႉ ၶဝ်ႈႁူမ်ႈ ပၼ်ႁႅင်း။

ၸၢႆးသၢမ်လႅင်း ၽူႈဢွၼ်ႁူဝ်ၶပ်ႉၶိုင်တႃႇၵေႃႇသၢင်ႈပၢႆႉတၢင်းၶဝ်ႈ/ ဢွၵ်ႇဝဵင်းၼမ်ႉလၼ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ႁဝ်းၶႃႈ ၵေႃႇသၢင်ႈၶိုၼ်ႈမႃး ပၢႆႉတၢင်းၶဝ်ႈဢွၵ်ႇဝဵင်းၼမ်ႉလၼ်ႈၼႆႉ မၼ်းဢမ်ႇမိူၼ်ၵၼ်တင်းတၢင်ႇဝဵင်း။ ဢၼ် လၢၵ်ႇလၢႆးၼၼ်ႉ ႁဝ်းၶႃႈ တႅမ်ႈၸိုဝ်ႈဝဵင်းၼမ်ႉလၼ်ႈသႂ်ႇတူဝ်ယႂ်ႇယႂ်ႇ။ မိူၼ်ၼင်ႇ ယိၼ်းၸူမ်းႁပ်ႉတွၼ်ႈ၊ မိူဝ်းလွႆးလွႆး ဝႃႇ ၸဵမ်ၸိူဝ်းၼႆႉတႄႉ ၶႃႈၶဝ်ဢမ်ႇတႅမ်ႈသႂ်ႇပႃးယဝ်ႉ မၼ်းႁၼ်သုၵ်ႉ” ဝႃႈၼႆ။

ပၢႆႉတၢင်းၶဝ်ႈဢွၵ်ႇဝဵင်းၼမ်ႉလၼ်ႈၼႆႉ လႆႈၵေႃႇသၢင်ႈႁဵတ်းမႃး မိူဝ်ႈဝၼ်းတီႈ 6 လိူၼ်ဢွၵ်ႊထူဝ်ႊပိူဝ်ႊ 2018 သေ ယူႇတီႈၽူႈၵွၼ်းဝဵင်း၊ ၵူၼ်းမိူင်းပိုၼ်ႉတီႈလႆႈဢုပ်ႇဢူဝ်းငူပ်ႉငီႉတူၵ်းလူင်းၵၼ် တွၼ်ႈတႃႇတေႁဵတ်းပိူင်ႁၢင်ႈပၢႆႉၶဝ်ႈ ဢွၵ်ႇဝဵင်း။ တူဝ်လိၵ်ႈ တႃႇတေတႅမ်ႈသႂ်ႇ တီႈပၢႆႉ ၸဵမ်ၸိူဝ်းၼႆႉ ဝႃႈၼႆ။

ပၢႆႉၶဝ်ႈဢွၵ်ႇဝဵင်းၼမ်ႉလၼ်ႈၼႆႉ တႅမ်ႈလိၵ်ႈသႂ်ႇဝႆႉ 3 ၽႃသႃ လိၵ်ႈတႆး၊ လိၵ်ႈဢိင်းၵလဵတ်ႈလႄႈ လိၵ်ႈမၢၼ်ႈ။ ပၢႆႉၼႆႉ တၢင်းၵႂၢင်ႈတေမီး 20 ထတ်း/ပေႇ။ တၢင်းသုင်မီး 10 ထတ်း၊ ၼႃ 2 ထတ်း ဝႃႈၼႆ။

ၵႃႈၸႂ်ႉၸၢႆႇ တႃႇပၢႆႉတင်းသွင်ဢၼ်သမ်ႉ သဵင်ႈၵႂႃႇမွၵ်ႈ 100 သႅၼ်ပျႃး။ ၶွမ်ႊပၼီႊတင်းႁၢင်ႈလီမိူင်းတႆး (သျှမ်းပြည် အလှ) ႁပ်ႉပုၼ်ႈၽွၼ်းၵေႃႇသၢင်ႈပၼ် ဝႃႈၼႆ။