ပွႆးဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 72 ပီ ငဝ်ႈၸိုင်ႈလွႆတႆးလႅင်း ၸတ်းပႃးပၢင်ၶႅင်ႇၼၢင်းငၢမ်း သၢဝ်တႆးမိူင်းသူႈထုၵ်ႇလိူၵ်ႈပဵၼ် ၼၢင်းငၢမ်းလွႆတႆးလႅင်း Miss Loi Tai Leng ပီ 2019။
ဝၼ်းတီႈ 6 – 7/02/2019 ပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆး တီႈလွႆတႆးလႅင်းၼၼ်ႉ ၸုမ်းပွင်ၵၢၼ်ပၢႆးပၺ်ၺႃ ၶွင်ႇသီႇဢဝ်ၶိုၼ်းၸိုင်ႈတႆးလႄႈ ၸုမ်းၼၢင်းယိင်းၶွင်ႇသီႇဢဝ်ၶိုၼ်းၸိုင်ႈတႆး ဢွၼ်ႁူဝ်ၸတ်းႁဵတ်းပၢင်ၶႅင်ႇၼၢင်း ႁၢင်ႈလီ Miss Loi Tai Leng 2019 တီႈငဝ်ႈၸိုင်ႈလွႆတႆးလႅင်း မီးၼၢင်းသၢဝ် 18 ၵေႃႉ ၶဝ်ႈၶႅင်ႇ ။
ၼၢင်းၼူၼ်းမူဝ် သၢဝ်တႆးမိူင်းသူႈထုၵ်ႇလိူၵ်ႈပဵၼ် Miss Loi Tai Leng ပီ 2019 လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ “ ပဵၼ်ဢၼ်ၸူမ်းသိူဝ်းတႄႉၶႃႈဢေႃႈ ဢၼ်ထုၵ်ႇလိူၵ်ႈပဵၼ် ၼၢင်းငၢမ်းလွႆတႆးလႅင်း 2019 သိုပ်ႇ ၼႆႉၵႂႃႇ ၼင်ႇဢၼ်ပွင်ပဵၼ်လႆႈၼၼ်ႉ ၶႃႈႁဝ်းၵေႃႈ တေပဵၼ်တူဝ်ယၢင်ႇလီ၊ တိုၵ်းသူၼ်းႁႂ်ႈၵူၼ်းၼုမ်ႇတႆးႁဝ်း မေႃမီးၸႂ်ႁၵ်ႉၸိူဝ်ႉၶိူဝ်း ၾိင်ႈႁိတ်ႈႁွႆးတႆးႁဝ်းၵႂႃႇယူႇၶႃႈဢေႃႈ ၼင်ႇဢၼ်ပွင်ပဵၼ်လႆႈၼၼ်ႉတေၶတ်းၸႂ်ၸွႆႈထႅမ်ၼႂ်းတူင်ႇဝူင်းၵႂႃႇယူႇၶႃႈ ” ဝႃႈၼႆ။
တီႈပၢင်လိူၵ်ႈၼၢင်းငၢမ်းၼၼ်ႉ ၶွမ်ႊမတီႊလိူၵ်ႈၼၢင်းငၢမ်းပိုၼ်ၽၢဝ်ႇဝႃႈ – ယိူင်းဢၢၼ်း မီး 3 ၶေႃႈ တႃႇတိုၵ်းသူၼ်းပႂ်ႉပႃးၶူဝ်းၼုင်ႈတၢင်းဝႆ ၸၢဝ်းၶိူဝ်းၼႂ်းမိူင်းတႆး၊ တႃႇႁႂ်ႈၸၢဝ်းၶိူဝ်းဢၼ်ယူႇသဝ်းၼႂ်းမိူင်းတႆး တိူဝ်းမီးလွင်ႈ ၸမ်ၸႂ်ၵၼ်၊ ႁႂ်ႈပဵၼ် တီႈၼႄၼမ်ႉၵတ်ႉတၢင်းၶႅၼ်ႇၼၢင်းယိင်းၸၢဝ်းၶိူဝ်းၼႂ်းမိူင်းတႆး ၸဵမ်ၸိူဝ်းၼႆႉ။
ၼၢင်းႁၢင်ႈလီ ဢၼ်လႆႈတီႈ 1 ပဵၼ် ယိင်းၼူၼ်းမူဝ် ႁဵတ်းၵၢၼ်ယူႇတီႈၵဵင်းမႆႇ ၊ တီႈ 2 ပဵၼ် ယိင်းမူဝ်ႁိူင်းသႂ် ႁဵတ်းၵၢၼ်ယူႇတီႈၵဵင်းမႆႇ၊ တီႈ 3 ပဵၼ် ယိင်းၶမ်းဢွၼ်ႇ ၶူင်းၵၢၼ်ၵမ်ႉၸွႆႈ ပၢႆးပၺ်ၺႃယိုၼ်းယၢဝ်းၼႂ်းမိူင်းထႆး ၸိူဝ်းၼႆႉ ။
ၼၢင်းငၢမ်းဢၼ်လႆႈသူးတီႈၼိုင်ႈ လႆႈႁပ်ႉလူဝ်ႉရၢင်းဝလ်းသၢႆပၢႆႉ ၼၢင်းငၢမ်းလႄႈငိုၼ်း 30,000 ဝၢတ်ႇ၊ သူးတီႈ 2 လႆႈငိုၼ်းသူး 15,000ဝၢတ်ႇ ၊ တီႈ 3 လႆႈ 8,000 ဝၢတ်ႇ လိူဝ်ၼၼ်ႉၵေႃႈ ဢၼ်လႆႈႁပ်ႉသူးယွမ်ႉၸႂ်ၵေႃႈမီး။
မိူဝ်ႈပီ 2018 ၵေႃႈ လႆႈၸတ်းႁဵတ်းပၢင်ၶႅင်ႇၼၢင်းငၢမ်းပဵၼ်ပွၵ်ႈၵမ်း 1 ၼၢင်းႁၢင်ႈလီ ဢၼ်လႆႈတီႈ 1 ပဵၼ် ယိင်းမွၵ်ႇၵွၼ်ၶမ်း ႁွင်ႈၵၢၼ်ၾၢႆႇပိုၼ်ၽၢဝ်ႇ RCSS/SSA ၊ တီႈ 2 ပဵၼ်ယိင်းၼွင်ႉမူၺ်ၸုမ်း ၵူၼ်းၼုမ်ႇတႆး TYO တူၼ်ႈတီး၊ တီႈ 3 ပဵၼ် ယိင်းမူၺ်ၽွင် ၸဝ်ႈၼႃႈတီႈၾၢႆႇၵပ်းသိုပ်ႇတိတ်းတေႃႇၼွၵ်ႈမိူင်းၸိူဝ်းၼႆႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ