ပလိၵ်ႈမၢၼ်ႈတီႉလႆႈ ၵွင်ႈ 26 လဝ်း ၼႂ်းဝၢၼ်ႈၾၢႆႇတူၵ်းဝဵင်း၊ ၵမ်ႈၼမ်လၢတ်ႈဝႃႈ ၵဵဝ်ႇၶွင်ႈမူႇၸုမ်းၼႂ်းပိုၼ်ႉတီႈဢၼ် ယူႇၾၢႆႇတူၵ်းၼႂ်းၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း။

ဝၼ်းတီႈ 01/02/2019 ယၢမ်းၵၢင်ၶမ်ႈ 7 မူင်း ယူႇတီႈပလိၵ်ႈမၢၼ်ႈ ၵူတ်ႇထတ်းတီႉလႆႈ ၼႂ်းရူတ်ႉၵႃး ၶုၼ်ႇသူၺ်ႇဢေး ဢႃယု 44 ပီ ၵွင်ႈ 1 လဝ်း (ဢၼ်ႁဵတ်းဢွၵ်ႇတၢင်းမိူင်းၶႄႇ) ၼၼ်ႉ တီႈၼႂ်းၵႄႈသဵၼ်ႈတၢင်း လွႆယႆး – တႆးၵၢဝ် ဢိူင်ႇလွႆ ယႆး ၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ ၵူၼ်းဢၼ်ၸမ်ၸႂ်ပလိၵ်ႈၼမ်ႉၸၢင် ၵေႃႉၼိုင်ႈ လၢတ်ႈ ဝႃႈ ၸၢႆးပႃႉမွင်ႇတင်း ၶုၼ်ႇသူၺ်ႇဢေးၼႆႉ ပဵၼ်ၵူၼ်းဢၼ်ၵဵဝ်ႇၵပ်းၸုမ်းပျီႇတူႉၸိတ်ႉ ဢၼ်တူင်ႉၼိုင်တၢင်း လွႆလႅမ် ပၢင်လူင် – ဝႃႈၼႆ။

ႁွင်ႈၵၢၼ်ၾၢႆႇႁူမ်ႇလူမ်ႈ ပိုၼ်ၽၢဝ်ႇဝႃႈ “ ယူႇတီႈၾၢႆႇၸဝ်ႈၼႃႈတီႈပလိၵ်ႈၶဝ် လႆႈၵူတ်ႇထတ်းၶုၼ်ႇသူၺ်ႇဢေး လွင်ႈ ၵွင်ႈလႄႈ မၢၵ်ႇၵွင်ႈၸိူဝ်းၼႆႉ။ ဝၼ်းတီႈ 02/02/3019 ယၢမ်း ၵၢင်ဝၼ်း 11:30 မူင်းၼၼ်ႉ ၾၢႆႇပလိၵ်ႈ သိုပ်ႇလူင်းၵူတ်ႇ ထတ်းတီႈႁိူၼ်းၸၢႆးပႃႉမွင်ႇ ဝၢၼ်ႈမၢၵ်ႇမူင်ႈမူၼ်း ၸႄႈဝဵင်းၼမ်ႉၸၢင် ၵေႃႉဢၼ်ၵဵဝ်ႇၶွင်ႈတင်း ၶုၼ်ႇသူၺ်ႇဢေး။ ႁၼ်ၵွင်ႈၵူႈသႅၼ်းသႅၼ်း 25 လဝ်း၊ မၢၵ်ႇၵွင်ႈၵူႈသႅၼ်းသႅၼ်း 6142 လုၵ်ႈ၊ မႅၵ်ႉမၢၵ်ႇၵွင်ႈ 187 ဢၼ်၊ မၢၵ်ႇသႅၼ်း 40 မမ 34 လုၵ်ႈ၊ မၢၵ်ႇပွမ်း 1 လုၵ်ႈ၊ ၵွင်ႈမူၵ်းယိုဝ်း(သၼၢႆႊပိူဝ်ႊ) 3 လဝ်း၊ ၸၢၵ်ႈလၢတ်ႈ 9 ႁူၺ်ႇ၊ M 16 ဢိၵ်ႇထႅင်ႈလၢႆ လၢႆဢၼ် ၸဵမ်ၸိူဝ်းၼႆႉ ဝႃႈၼႆ။

ၵွင်ႈလႄႈ မၢၵ်ႇၵွင်ႈ ၶိူင်ႈၸႂ်ႉၸိူဝ်းၼႆႉ ပဵၼ်ၶိူင်ႈၵွင်ႈၵၢင်ႇ ဢၼ်ႁဵတ်းဢွၵ်ႇတၢင်းမိူင်းၶႄႇလႄႈ မိူင်းဢမေႊရီႊၵႃႊ ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈၸႄႈဝဵင်းၼမ်ႉၸၢင် လႆႈဢဝ်လိူင်ႈလၢဝ်း ၶုၼ်ႇသူၺ်ႇဢေးဝႆႉသေ တူဝ်ၸၢႆးပႃႉမွင်ႇ တႄႉ ဢမ်ႇပႆႇတီႉလႆႈသေတႃႉ ၺႃးၸႅင်ႈၵႂၢမ်းဝႆႉ ဝႃႈၼႆ။