ရူတ်ႉၵႃး ပီႈၼွင်ႉတႆး လမ်းၼိုင်ႈ ဢၼ်ၵႂႃႇၶဝ်ႈႁူမ်ႈဝၼ်းၸိူဝ်ႉၸၢတ်ႈၸိုင်ႈတႆး တီႈလွႆတႆးလႅင်းၼၼ်ႉ ၵႂႃႇပဵၼ်ၽေး ၵိုင်ႉၵၢင်ႉ(ၽေးဢုပၢတ်ႈ) ရူတ်ႉတမ်ၽႃႇၵၼ် တီႈသဵၼ်ႈတၢင်း ၵဵင်းမႆႇ – မိူင်းပၢႆး ၵူၼ်းဢမ်ႇတိူဝ်ႉမၢတ်ႇသေတႃႉ ရူတ်ႉ ၵႃးလူႉၵွႆ ဝႃႈၼႆ။
ဝၼ်းတီႈ 06/02/2019 ယၢမ်းၵၢင်ၼႂ် မွၵ်ႈ 9:35 မူင်းၼၼ်ႉ ရူတ်ႉၵႃး ပီႈၼွင်ႉတႆး လုၵ်ႉတၢင်းၸႄႈဝဵင်းၵဵင်းမႆႇ တေဢွၵ်ႇ ၵႂႃႇတၢင်း ၸႄႈဝဵင်းမိူင်းပၢႆးၼၼ်ႉ လႆႈၵႂႃႇပဵၼ်ၽေးၵိုင်ႉၵၢင်ႉ ၽႃႇတမ်ၵၼ် တီႈၵူတ်ႉတၢင်းလူင်းၸူးၸႄႈဝဵင်း မိူင်း ပၢႆး ၸႄႈတွၼ်ႈမႄႈႁွင်ႈသွၼ် ၼႂ်းၸိုင်ႈထႆး။ ၵူၼ်းဢၼ်ၶီႇၵႂႃႇၸွမ်းၼႂ်းရူတ်ႉၵႃးၼၼ်ႉ ဢမ်ႇမီးလွင်ႈ မၢတ်ႇၸဵပ်းလူႉတၢႆ သင် ဝႃႈၼႆ။
ၸၢႆးဢွၼ်ႇ ဢၼ်ႁၼ်တႂ်ႈၼႃႈတႂ်ႈတႃၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်တီႈတၢင်းၶူင်ႉ ဢၼ်တေလူင်းၸူး မိူင်းပၢႆးၼၼ်ႉၶႃႈ။ ၵႃးပီႈၼွင်ႉတႆးႁဝ်း ဢၼ်လုၵ်ႉ တၢင်းၵဵင်းမႆႇ ၵႂႃႇၼၼ်ႉ သမ်ႉႁေႃႈၶၢမ်ႈၵႃးတၢင်းၼႃႈ ၵႃးလမ်းၼိုင်ႈ သမ်ႉလုၵ်ႉတၢင်းမိူင်းပၢႆးၶိုၼ်ႈမႃး လေႃႇတမ်သႂ်ႇၵၼ်။ ၵူၼ်းဢမ်ႇပဵၼ်သင်ၶႃႈ ၵႃးတႄႉၵွႆၼမ်ဝႆႉယူႇဢေႃႈ” ဝႃႈၼႆ။
ရူတ်ႉၵႃး ဢၼ်လုၵ်ႉတၢင်းၵဵင်းမႆႇသေ လူင်းၸူးမိူင်းပၢႆးၼၼ်ႉ ပဵၼ်တႆးဢၢၼ်းၵႂႃႇလွႆတႆးလႅင်း – ၵႃး ဢၼ်လုၵ်ႉတၢင်း မိူင်းပၢႆးၶိုၼ်ႈမႃးသမ်ႉ ပဵၼ်ၵူၼ်းထႆး ၵူၼ်းၶီႇမႃးၸွမ်းၼႂ်းၵႃး တင်းသွင်လမ်းတႄႉ ဢမ်ႇပဵၼ်သင် ဝႃႈၼႆ။
ၸၢႆးဢွၼ်ႇ လၢတ်ႈဝႃႈ “ မိူဝ်ႈၼႆႉ ပီႈၼွင်ႉႁႅင်းၵၢၼ်တႆး ဢၼ်လုၵ်ႉတၢင်းၵဵင်းမႆႇ၊ ၵုင်းထဵပ်ႈ၊ မႄႈသၢႆ လၢႆလၢႆတီႈ ဢွၼ် ၵၼ်ၵႂႃႇၶဝ်ႈႁူမ်ႈဝၼ်းၸိူဝ်ႉၸၢတ်ႈၸိုင်ႈတႆး တီႈလွႆတႆးလႅင်းတင်းၼမ်။ ၵႃးၼိုင်ႈလမ်းလႂ် ၶီႇၶိုၼ်ႈ 11 ၵေႃႉ ပႃးၵူၼ်း ႁေႃႈၵႃး” ဝႃႈၼႆ။
ရူတ်ႉၵႃးပီႈၼွင်ႉတႆး ဢၼ်ၺႃးၽႃႇၵၼ်တင်းၵႃးပီႈၼွင်ႉထႆးၼၼ်ႉ ပဵၼ်ၵႃး 4 ၽၵ်းတူ။ တၢင်းႁူဝ်ၵႃး လႆႈလူႉၵွႆၼမ်။ မၢၵ်ႇၵႃးတၢင်းၼႃႈ လႆႈတႅၵ်ႇ ဝႃႈၼႆ။
လွႆတႆးလႅင်း ငဝ်ႈငုၼ်း RCSS/SSA ၸတ်းဝၼ်းၸိူဝ်ႉၸၢတ်ႈၸိုင်ႈတႆး ၵူႈပီ၊ ဢမ်ႇၵွမ်ႉၵႃႈတႆးႁွတ်ႈမိူင်းထႆး၊ ပႃးၸဵမ် ၶႅၵ်ႇၵူၼ်းထႆး၊ ၵူၼ်းၼွၵ်ႈမိူင်းၸိူဝ်းၼႆႉ သူင်ၵၼ်မိူဝ်းၶဝ်ႈႁူမ်ႈၵူႈပီ။ ပီၼႆႉ တူဝ်တႅၼ်းလူင်ပွင်ၸိုင်ႈမၢၼ်ႈ၊ တူဝ်တႅၼ်း ၸုမ်းယိပ်းၵွင်ႈၵိုတ်းတိုၵ်း၊ ၶႅၵ်ႇလုမ်းတၢင်ၸိူဝ်းၼႆႉ ၶိုၼ်ႈႁွတ်ႈၶဝ်ႈႁူမ်ႈတင်းၼမ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ