တႆးသၢပ်ႇၵဵဝ် ၸတ်းႁဵတ်းဝၼ်းၸိူဝ်ႉၸၢတ်ႈၸိုင်ႈတႆး တီႈဝဵင်းမိူင်းယၢင်း ၵမ်းႁႅၵ်ႈ

ၸၢဝ်းတႆး ၸိူဝ်းယူႇသၢပ်ႇၵဵဝ် ႁူမ်ႈၵၼ်ၸတ်းႁဵတ်းဝၼ်းၸိူဝ်ႉၸၢတ်ႈၸိုင်ႈတႆး တီႈဝဵင်းမိူင်းယၢင်း ပွၵ်ႈၵမ်းႁႅၵ်ႈ ၵူၼ်း ၶဝ်ႈႁူမ်ႈၼပ်ႉႁူဝ်ႁဵင် ၶိုၵ်ႉယႂ်ႇၵိုၼ်းၶွၼ်ႈဝႆႉ ဝႃႈၼႆ။

ဝၼ်းတီႈ 05-07/02/2019 တႃႇၶၢဝ်းတၢင်း 3 ဝၼ်း ပီႈၼွင်ႉၸၢဝ်းတႆး ၸိူဝ်းယူႇသၢပ်ႇၵဵဝ် မၢၼ်ႈမေႃႇ၊ မိူင်းၵွင်း၊ မိူင်း ယၢင်း ထုင်ႉၼွင်မႄႈမၢႆႈ ႁူမ်ႈၵၼ် ၸတ်းႁဵတ်းဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 72 ပီ တီႈပၢင်ပွႆးပၺ်ၺႃ လင်ၵႃလ ၸေႃးတိ ပွၵ်ႉၵွင်းႁေႃၽီ ၸႄႈဝဵင်းမိူင်းယၢင်း ၸႄႈမိူင်းၶၢင် ဝႃႈၼႆ။

ၸၢႆးမွင်ႇထူၺ်း ၽူႈၼမ်းၼႂ်းၵေႃပွင်ပဵၼ်ပၢင်ပွႆး လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ၸူမ်းတႄႉတႄႉဝႃႈဝႃႈ ၼမ်ႉတႃ ပေႃးတူၵ်းၶႃႈယဝ်ႉ။ ႁဝ်းဢမ်ႇထၢင်ႇဝႃႈ ၵူၼ်းတေၼမ်ၵိုၼ်း ပဵၼ်ထၢၼ်ႇၼႆႉ။ ဢၼ်ႁဝ်းၶႃႈ ႁဵတ်းၼႆႉ ဢမ်ႇၸႂ်ႈ ပဵၼ် ပွႆးပီမႂ်ႇတႆး၊ ပွႆးၶၢမ်ႇသၢင်ႇ၊ ပွႆးလူႇပွႆးတၢၼ်း။ ပွႆးဝၼ်းၸိူဝ်ႉၸၢတ်ႈတႆးၼႆႉ ၽႂ်ၵေႃႈဢမ်ႇႁတ်းႁဵတ်း ႁဝ်းၶဝ် လႆႈဢွၼ် ၵၼ်ၶတ်းၸႂ်သႂ်ႇမႃႇသႂ်ႇႁႅင်းသေ ႁႂ်ႈမၼ်းပဵၼ်မႃးၸိူင်ႉၼႆ ႁၢၼ်ႉၸႂ်တႄႉ။ ႁဝ်းမီးငိုၼ်းသေ ႁဵတ်းပဵၼ် ၵေႃႈဢမ်ႇၸႂ်ႈ ႁဝ်းဢဝ်ၼမ်ႉၸႂ်ၽွမ်ႉႁူမ်ႈတႆးႁဝ်းၶႃႈ သေႁဵတ်းၶႃႈ။ မိူဝ်ႈဝႃး ႁဝ်းၶႃႈ ပိုတ်ႇပၢင်ပွႆးၵႂႃႇၼၼ်ႉ လႆႈႁၼ်ပီႈ ၼွင်ႉတႆးႁဝ်း ၽွမ်ႉသဵင်ပဵင်းပၢၵ်ႇၵၼ် မႃးၶဝ်ႈႁူမ်ႈၵိုၼ်းၶွၼ်ႈလူင်ဝႆႉ ႁဝ်းၶႃႈ ၸူမ်းသိူဝ်းၼမ်ႉတႃပေႃး တူၵ်းၶႃႈယဝ်ႉ” ဝႃႈၼႆ။

ၼႂ်းပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 72 ပီ တီႈၸႄႈဝဵင်း မိူင်းယၢင်း ၸႄႈမိူင်းၶၢင်ၼၼ်ႉ ႁဵတ်းပႃး ႁွင်ႈၼႄ ပိုၼ်း၊ ပၢင်ဢုပ်ႇၶႆႈ/ တၢၼ်ႈၶႆႈ၊ ပၢင်မူၼ်ႈသိူဝ်း၊ ပၢင်ၶဵင်ႇၼမ်ႉၵႂၢမ်း မိူၼ်ၼင်ႇ ဝွၵ်း၊ ၸၼ်ႁၢင်ႈလႄႈ ပၢင်လဵၼ်ႈႁႅင်း ၸဵမ်ၸိူဝ်းၼႆႉ။

ၼႂ်းပၢင်ဢုပ်ႇ/တၢၼ်ႈၶႆႈၼႆႉသမ်ႉ မီးၽူႈမႃးဢုပ်ႇၶႆႈၼႄ မိူၼ်ၼင်ႇ ၶူးႁိုၼ်း ၵႃယၢင်း၊ ၼၢင်းဝႃႇၼူႉ ပႃႇတီႇသိူဝ်ၽိူၵ်ႇ လႄႈ ၸဝ်ႈပိုၼ်ၶမ်း။ ၼႂ်းဝၼ်းတီႈ 05 ယၢမ်းၵၢင်ၶမ်ႈသမ်ႉ ၶူးႁိုၼ်း ၵႃယၢင်း ဢုပ်ႇၶႆႈၼႄ။ ၼႂ်းဝၼ်းတီႈ 6 ယၢမ်းၵၢင် ၶမ်ႈ မိူဝ်ႈၼႆႉသမ်ႉ ၼၢင်းဝႃႇၼူႉလႄႈ မိူဝ်ႈၽုၵ်ႈဝၼ်းတီႈ 7 သမ်ႉ ၸဝ်ႈပိုၼ်ၶမ်း ၸဵမ်ၸိူဝ်းၼႆႉ။

မိူဝ်ႈၽုၵ်ႈ ဝၼ်းတီႈ 7 ယၢမ်းၵၢင်ၼႂ်သမ်ႉ တေၸတ်းႁဵတ်း ပၢင်ၵႅဝ်ႈ လၢတ်ႈ/ၶႆႈၼႄ ပိုၼ်းပဵၼ်မႃးဝၼ်းၸိူဝ်ႉ ၸၢတ်ႈ ၸိုင်ႈတႆးလႄႈ လူဢၢၼ်ႇၽိုၼ်လိၵ်ႈ ဢၼ်လူင်ပွင်ၸိုင်ႈၸႄႈမိူင်း၊ မိူင်းႁူမ်ႈတုမ် သူင်ႇမွပ်ႈယိုၼ်ႈမႃး ၸိူဝ်းၼၼ်ႉ။

ၸၢႆးမွင်ႇထူၺ်း လၢတ်ႈဝႃႈ “ မိူဝ်ႈၽုၵ်ႈမႃး ယၢမ်းၵၢင်ၼႂ် 8 မူင်း ႁဝ်းၶႃႈတေမီးပၢင်ၵႅဝ်ႈ ပီႈၼွင်ႉတႆးႁဝ်းၶႃႈ တႆးလူင်၊ တႆးသႃ၊ တႆးၶမ်းတီႈ၊ တႆးလႅင်၊ တႆးၼိူဝ် ၸိူဝ်းၼႆႉသေဢမ်ႇၵႃး လိူဝ်ၼၼ်ႉ မွၵ်ႇပႃးထႅင်ႈ ၽွင်းလူင်ၸႄႈမိူင်းၶၢင်၊ ႁွင်ႈ ၵၢၼ်လူင် ပွင်ၸိုင်ႈ ၵူႈႁွင်ႈၵၢၼ်၊ ၽူႈၵွၼ်းတိူင်းသိုၵ်း (တိုင်းမှူး)၊ ပျီႇတူႉၸိတ်ႉတႆးလႅင် ၸိူဝ်းၼႆႉၵေႃႈမႃးၶဝ်ႈႁူမ်ႈ ဢေႃႈ” ဝႃႈၼႆ။

ဝၼ်းၸိူဝ်ႉၸၢတ်ႈၸိုင်ႈတႆးၼႆႉ ပဵၼ်ဝၼ်းလႆႈၸႂ်ၶွတ်ႇၽွတ်ႈၶွင်ႇသီႇၸိုင်ႈတႆး SSC ဢၼ်မီးတူဝ်တႅၼ်းၵူၼ်းမိူင်း 7 ၵေႃႉ၊ တူဝ်တႅၼ်ႈၸဝ်ႈၾႃႉတႆး 7 ၸဝ်ႈ။ ပေႃးဢမ်ႇမီးဝၼ်းၸိူဝ်ႉၸၢတ်ႈၸိုင်ႈတႆး ဢမ်ႇမီးလိၵ်ႈႁူမ်ႈမၢႆပၢင်လူင်၊ ပေႃး ဢမ်ႇမီးလိၵ်ႈႁူမ်ႈမၢႆပၢင်လူင် ဢမ်ႇမီးသၢပ်ႇၼမ်ႉလႅၼ်လိၼ်ၸႄႈမိူင်းၶၢင်ယၢမ်းလဵဝ်လႄႈ သိုင်ႇမိူင်းႁူမ်ႈတုမ်ယၢမ်း လဵဝ်။