ၸၢဝ်းၶိူဝ်း 12 ၸၢဝ်းၶိူဝ်း ၼႂ်းမိူင်းတႆး ႁူမ်ႈၵၼ် ၼႄတၢင်းၵႃႈၾိင်ႈႁိတ်ႈႁွႆးၽႂ်မၼ်းသေ ၼႄပႃးတၢင်းၵိၼ် ၸိူဝ်ႉမွၵ်ႇ မၢၵ်ႇႁၢၵ်ႈႁူဝ် ဢၼ်ဢွၵ်ႇၼႂ်းပိုၼ်ႉတီႈၽႂ်မၼ်းလႄႈ မီးၽူႈၶဝ်ႈႁူမ်ႈ တင်းၼမ်လၢႆ။
ဝၼ်းတီႈ 04-05/02/2019 ယူႇတီႈမဵတ်ႉတႃႇၻီႊဝႄႊလွပ်ႊမႅၼ်ႊၽွင်ႊၻေႊသျိၼ်ႊ (Metta Development Foundation) ဢွၼ်ႁူဝ်သေ ၸတ်းႁဵတ်းပၢင်ဢုပ်ႇဢူဝ်းလႅၵ်ႈလၢႆႈ ၼႄၾိင်ႈငႄႈႁိတ်ႈႁွႆးလႄႈ ၶူဝ်းၶွင်ၵိၼ်ပိုၼ်ႉတီႈ တင်းၸိူဝ်ႉ ၽၼ်းမွၵ်ႇမၢၵ်ႇႁၢၵ်ႈႁူဝ် တီႈႁူင်းႁေႃ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတူၼ်ႈတီး ၸိုင်ႈတႆး ပွတ်း ၸၢၼ်း။ ယိူင်းဢၢၼ်း ၼင်ႇႁိုဝ် ၵူၼ်းၼုမ်ႇၸၢဝ်းၶိူဝ်းတေလႆႈႁူႉလွင်ႈတၢင်းၵိၼ်ၼႂ်းပိုၼ်ႉတီႈ၊ ၸိူဝ်ႉၽၼ်းပိုၼ်ႉတီႈ လႄႈ လွင်ႈ ၾိင်ႈငႄႈႁိတ်ႈႁွႆး ၸၢဝ်းၶိူဝ်းၽႂ်မၼ်းသေ ႁႂ်ႈမေႃႁူႉၵႃႈၶၼ် ၵဵပ်းႁွမ်သိမ်းပႅင်းႁၵ်ႉသႃ ဝႃႈၼႆ။
ၼၢင်းသႅင်လၢဝ် ၽူႈၶဝ်ႈႁူမ်ႈပၢင်ပွႆး လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈလဵဝ်ၼႆႉ ၸိူဝ်ႉၽၼ်းၼွၵ်ႈမိူင်း ၶဝ်ႈမႃးၼမ် ႁႅင်း ၼႃႇ ၵူဝ်ၸိူဝ်ႉၽၼ်းမွၵ်ႇမၢၵ်ႇႁၢၵ်ႈႁူဝ်ႁဝ်းၶႃႈ လႆႈႁၢႆၵႂႃႇ။ ယွၼ်ႉၼၼ် ၸင်ႇလႆႈဢဝ်မႃးၼႄၶႃႈ။ ဢၼ်ႁဝ်းၶႃႈ လႆႈဢဝ် မႃးၼႄတႄႉ မိူၼ်ၼင်ႇ ၸိူဝ်ႉၽၼ်းမၢၵ်ႇၶိူဝ်သူမ်ႈ၊ မၢၵ်ႇၶိူဝ်ယၢဝ်း၊ ထူဝ်ႇယၢဝ်း၊ ၽၵ်းမီႇလႄႈ ဢိၵ်ႇထႅင်ႈလၢႆလၢႆမဵဝ်း။ ၸိူဝ်ႉၽၼ်းဢၼ်ဢဝ်မႃးၼႄၼႆႉ ပဵၼ်ၸိူဝ်ႉၽၼ်းႁဝ်းၶႃႈ ၽုၵ်ႇဢဝ်ႁင်းၵူၺ်းလွၼ်ႉလွၼ်ႉၶႃႈ” ဝႃႈၼႆ။
သိုပ်ႇလၢတ်ႈဝႃႈ “ ၶႂ်ႈႁႂ်ႈၵူၼ်းတင်းၼမ်ႁူႉဝႃႈ ၸိူဝ်ႉၽၼ်းၼႂ်းပိုၼ်ႉတီႈႁဝ်းမၼ်းဢမ်ႇႁၢႆ တိုၵ်ႉမီးယူႇ။ ပေႃးယဝ်ႉၵေႃႈ ၶႂ်ႈႁႂ်ႈၽႄႈ လိူင်ႇမႃးထႅင်ႈတင်းၼမ် ယွၼ်ႉဝႃႈ ၵူဝ်ၸိူဝ်ႉၽၼ်းပိူၼ်ႈၶဝ်ႈမႃးၸိမ်ၸွမ်း” ဝႃႈၼႆ။
ၸိူဝ်ႉၽၼ်းမွၵ်ႇမၢၵ်ႇႁၢၵ်ႈႁူဝ် ဢၼ်မႃးၼႄတီႈၼႂ်းပၢင်ပွႆးၼႆႉ ၵမ်ႈၼမ်ပဵၼ်ၸိူဝ်ႉၽၼ်းၸဝ်ႈႁႆႈၸဝ်ႈၼႃးၶဝ် ၽုၵ်ႇ ၵိၼ်ႁႃလဵင်ႉတွင်ႉလႄႈ တႃႇငိုၼ်းၶဝ်ႈၼႃႈႁိူၼ်း မႃးပၢၼ်သိုပ်ႇပၢၼ်တေႃႇယၢမ်းလဵဝ်။
ဢူးၺီႇတွင်း ၽူႈၶဝ်ႈႁူမ်ႈ ပၢင်ပွႆး လၢတ်ႈဝႃႈ “ ႁဝ်းၶႃႈၽုၵ်ႇၵိၼ်ၸိူဝ်ႉၽၼ်းၸိူဝ်းၼႆႉၵူၺ်းၶႃႈ။ တီႈပိူၼ်ႈၵေႃႈ ႁဝ်းၶႃႈ ဢမ်ႇသိုဝ်ႉယဝ်ႉၵေႃႈ ၸိူဝ်ႉၽၼ်းဢၼ်ႁဝ်းၸႂ်ႉၼႆႉၵေႃႈ ဢမ်ႇၶၢႆၶႃႈ။ ႁဝ်းၶႃႈၵေႃႈ ဢမ်ႇၽုၵ်ႇတႃႇႁဵတ်းပၢႆးမၢၵ်ႈမီးတႄႉ တႄႉဝႃႈဝႃႈ၊ ၽုၵ်ႇတႃႇၵိၼ်လဵင်ႉတွင်ႉ ၼႂ်းၼႃႈႁိူၼ်းႁဝ်းၵူၺ်းၶႃႈ။ ၸိူဝ်ႉၽၼ်းၸိူဝ်းၼႆႉ ႁဝ်းၶႃႈဢမ်ႇလေႃးထၢတ်ႈ ၶႅမ်ႊမီႊၵိူဝ်ႊသင်၊ ႁဝ်းၶႃႈၸႂ်ႉထၢတ်ႈ ၾုၼ်ႇၶီႈဝူဝ်းၶီႈၵႂၢႆး သႂ်ႇၵူၺ်းၶႃႈ။ ယွၼ်ႉၼၼ် မၼ်းၵေႃႈပဵၼ်ပႃးယႃႈယႃၸွမ်း ထႅင်ႈ” ဝႃႈၼႆ။
ယူႇတီႈမဵတ်ႉတႃႇၻီႊဝႄႊလွပ်ႊမႅၼ်ႊၾွင်ႊတေႊသျိၼ်ႊ (Metta Development Foundation) သေ လႆႈၸတ်းႁဵတ်း ပၢင်ဢုပ်ႇဢူဝ်းလႅၵ်ႈလၢႆႈၼႆႉ ပဵၼ်ပွၵ်ႈၵမ်း 5 ၼႂ်းမိူင်းတႆး။ မွၵ်ႇထိုင် ၸၢဝ်းၶိူဝ်း 12 ၸၢဝ်းၶိူဝ်းလႄႈ ၸုမ်း CSO မႃး ၶဝ်ႈႁူမ်ႈ ၼႄတၢင်းၵႃႈၽႂ်မၼ်းလႄႈ ၶွင်ၵိၼ်ၼႂ်းပိုၼ်ႉတီႈတင်း ၸိူဝ်ႉၽၼ်းမွၵ်ႇမၢၵ်ႇႁၢၵ်ႈႁူဝ် ၸိူဝ်းၼႆႉ မီးၽူႈၶဝ်ႈ ႁူမ်ႈႁိမ်း 200 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ