တေႃႇဢွင်ႇသၢၼ်းသူႉၵျီႇ ၽူႈၵိူဝ်းၵုမ်ၸိုင်ႈမိူင်း လူင်းႁူပ်ႉ ၵူၼ်းမိူင်းတႆး ပွတ်းတႃႈၶီႈလဵၵ်း တင်း မိူင်းယွင်း။
ဝၼ်းတီႈ 05/02/2019 တေႃႇဢွင်ႇသၢၼ်းသူႉၵျီႇ ၽူႈၵိူဝ်းၵုမ်ၸိုင်ႈမိူင်း သူႇၸႂ်းပီႈၼွင်ႉၵူၼ်းမိူင်းတႆး ပွတ်းဢွၵ်ႇ။ ယူႇတီႈၵူၼ်းမိူင်းပိုၼ်ႉတီႈတၢင်ႇလၢတ်ႈၼႄ လွင်ႈယၢပ်ႇၽိုတ်ႇ ၼႂ်းပိုၼ်ႉတီႈၽႂ်မၼ်းလႄႈ ယိုၼ်ႈလိၵ်ႈ ထိုင်တီႈ တူဝ်မၼ်းၼၢင်းၵမ်းသိုဝ်ႈ။
ၵူၼ်းမိူင်းတႃႈၶီႈလဵၵ်း ယိုၼ်ႈလိၵ်ႈတုၵ်းယွၼ်း တီႈတေႃႇဢွင်ႇသၢၼ်းသူႉၵျီႉသမ်ႉ မိူၼ်ၼင်ႇ ၵႅမ်မေႃယႃလူင် ႁူင်းယႃလူင် တႃႈၶီႈလဵၵ်း တိုၵ်ႉလူဝ်ႇထႅင်ႈ။ သဵၼ်ႈတႃႈသၢႆတၢင်း၊ လွင်ႈတီႈလိၼ်လႄႈ လွင်ႈၵူၼ်းၼုမ်ႇ ၸိူဝ်းၼႆႉ။ ပၢင်ႁူပ်ႉထူပ်းၼႆႉ ၸတ်းႁဵတ်းတီႈ ႁူင်းႁေႃဢွင်ႇမျၢတ်ႉ ၸႄႈဝဵင်းတႃႈၶီႈလဵၵ်း ဝႃႈၼႆ။
တေႃႇဢွင်ႇသၢၼ်းသူႉၵျီႇ မွၵ်ႇလၢတ်ႈဝႃႈ “ လွင်ႈသဵၼ်ႈတႃႈသၢႆတၢင်းဢၼ်ဝႃႈၼၼ်ႉ ပဵၼ်ပုၼ်ႈၽွၼ်းလူင်ပွင်ၸိုင်ႈ တႄႉ မၢၼ်ႇမႅၼ်ႈယဝ်ႉ။ လူင်ပွင်ၸိုင်ႈဢၼ်ၽွင်းငမ်းဝၢၼ်ႈမိူင်းယူႇဝႆႉၼႆႉ ၸွမ်းၼင်ႇႁဵတ်းလႆႈၵႃႈႁိုဝ် တေႁဵတ်းပၼ် ၵႂႃႇ။ ၵူၺ်းၵႃႈ ၵူၼ်းဝၢၼ်ႈ ၵူၼ်းမိူင်းေၵေႃႈ တေလႆႈၶဝ်ႈႁူမ်ႈပႃး။ တွၼ်ႈတႃႇ သဵၼ်ႈတႃႈသၢႆတၢင်းႁဝ်းၶဝ် တေဢမ်ႇလူႉ ဢမ်ႇၵွႆၼၼ်ႉ ႁဝ်းၶႃႈ လူဝ်ႇလႆႈမီးပၵ်းမီးပိူင်” ဝႃႈၼႆ။
ၵဵဝ်ႇၵပ်းလွင်ႈ သဵၼ်ႈတၢင်း တႃႈၶီႈလဵၵ်း ၼၼ်ႉၵေႃႈ တေဝႆႉပဵၼ်ပိူင်ယႂ်ႇသေ မႄးသၢင်ႈၵႂႃႇႁႂ်ႈပဵၼ်သဵၼ်ႈတၢင်း ၵႂႃႇမႃးလႆႈၵူႈၶၢဝ်း။ တေၸႂ်ႉငိုၼ်းၵွင်ၵၢင်လူင်ပွင်ၸိုင်ႈ ပီ 2018-2019 မႄးတီႈယၢပ်ႇတီႈၸၼ်းဢွၼ်တၢင်း။ ပေႃးထိုင်မႃးငိုၼ်းၵွင်ၵၢင် ပီ 2019-2020 ၸင်ႇတေဢိင်ၼိူဝ်ႁႅင်းငိုၼ်းမီးသေ တေသိူဝ်ႇၵႂႃႇ ဝႃႈၼႆ။
ၶၢဝ်းတၢင်း တေႃႇဢွင်ႇသၢၼ်းသူႉၵျီႇ ဢၼ်မႃးမိူင်းတႆး ပွတ်းဢွၵ်ႇပွၵ်ႈၵမ်းၼႆႉ ၶပ်ႉမၢႆၶၢဝ်းတၢင်းသမ်ႉ တႃႈၶီႈလဵၵ်း၊ မိူင်းယွင်း၊ ၵဵင်းတုင်၊ မိူင်းသၢတ်ႇ ၸဵမ်ၸိူဝ်းၼႆႉ။
ဝၼ်းတီႈ 06/02/2019 မိူဝ်ႈၼႆႉသမ်ႉ ဢွင်ႇသၢၼ်းသူႉၵျီႇတေၵႂႃႇတွၵ်ႇလၵ်းသဝ်တႃႇသၢင်း ၶူဝ်မႂ်ႇ ၶၢမ်ႈၼမ်ႉၶူင်းတီႈ တႃႈသၢင်း။
ပေႃးထိုင်မႃး ဝၼ်းတီႈ 7 ဝၼ်းၸိူဝ်ႉၸၢတ်ႈၸိုင်ႈတႆးၸိုင် မၼ်းၼၢင်းတေၵႂႃႇႁူပ်ႉထူပ်း ၵူၼ်းမိူင်း ၸႄႈဝဵင်းတူၼ်ႈတီး ထႅင်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ