ၶွမ်ႊပၼီႊၾရင်ႊသဵတ်ႈ France’s joint venture IPGRB ဢၼ်ႁူမ်ႈႁႅင်း ၵေႃႇသၢင်ႈၾၢႆလူင်ၼိူဝ်ၵႄးၼမ်ႉတူႈယူႇ ၼၼ်ႉ ပိုၼ်ၽၢဝ်ႇထွၼ်တူဝ်ဢွၵ်ႇၶူင်းၵၢၼ်ၵေႃႇသၢင်ႈယဝ်ႉ ဝႃႈၼႆ။

ဝၼ်းတီႈ 29/01/2019 ၼၼ်ႉ ၶွမ်ႊပၼီႊၾရင်ႊသဵတ်ႈပိုၼ်ၽၢဝ်ႇထွၼ်တူဝ်ဢွၵ်ႇၶူင်းၵၢၼ် သၢင်ႈၾၢႆၼိူဝ်ၼမ်ႉတူႈ သေ တုၵ်းယွၼ်းထိုင် ယူႇတီႈ Burma Campaign UK ႁႂ်ႈထွၼ်ၸိုဝ်ႈသဵင်ၼၢဝ်ႈ Dirty List ၶဝ်ဢွၵ်ႇၼႂ်းသၢႆမၢႆ၊ ယွၼ်ႉ ၶဝ်ၵေႃႈ တေဢမ်ႇၵဵဝ်ႈၶွင်ႈၸွမ်းၶူင်းၵၢၼ်သၢင်ႈၾၢႆၼမ်ႉတူႈ(ၾၢႆယေးယႂႃႇတွၼ်ႈၼိူဝ်) ၸိုင်ႈတႆးပွတ်းႁွင်ႇယဝ်ႉ ဝႃႈၼႆ။

ၸၢႆးႁေႃသႅင် ၽူႈၶၢၼ်ပၢၵ်ႇ ၸုမ်းၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈႁဝ်း ဝႃႈတႄႉ ၶဝ်ပေႃးဢမ်ႇၵိုင်ႇလီၶဝ်ႈႁူမ်ႈႁဵတ်းၸွမ်းၸဵမ်ပိုင်းယဝ်ႉ၊ ႁဵတ်းသင်လႄႈဝႃႈၼႆ ၵွပ်ႈဝႃႈ ၼႂ်းမိူင်းတႆးႁဝ်းၵေႃႈလီ၊ ၼႂ်းမိူင်းႁူမ်ႈတုမ်ၵေႃႈလီ မၼ်းပႆႇမီးလွင်ႈငမ်းယဵၼ်သင် ပၢင်တိုၵ်းသိုၵ်းသိူဝ်ၵေႃႈ တိုၵ်ႉမီးယူႇ ဢမ်ႇၶၢတ်ႇဢမ်ႇႁၢႆ ပဵၵ်ႉသမ်ႉဝႃႈ ဢုပ်ႇဢူဝ်းလွင်ႈငမ်းယဵၼ်ယူႇသေတႃႉၵေႃႈ ပၢင်တိုၵ်းဢမ်ႇယဵၼ်ဢမ်ႇဝၢႆးသေၵၢၼ်ပူၼ်ႉပႅၼ်သုၼ်ႇလႆႈ သုၼ်ႇပဵၼ်ၵူၼ်းၵေႃႈတိုၵ်ႉမီးယူႇ။ ၶဝ်ပေႃးဢမ်ႇထုၵ်ႇလီႁဵတ်း ဢမ်ႇထုၵ်ႇလီၶဝ်ႈမႃး ႁူမ်ႈၸွမ်းၸဵမ်ပိုင်းယဝ်ႉ” ဝႃႈၼႆ။

သိုပ်ႇလၢတ်ႈဝႃႈ “ ဢၼ်ၾရင်ႇသဵတ်ႇၶဝ်တႅပ်းတတ်းထွၼ်ဢွၵ်ႇၵႂႃႇ ဢမ်ႇၶႂ်ႈၵဵဝ်ႇၶွင်ႈၸွမ်းၼႆႉ ႁဝ်းႁူမ်ၸူမ်းၸွမ်းတႄႉ ၶွမ်ႊပၼီႊ ၸိူဝ်းတိုၵ်ႉၵိုတ်းဝႆႉ ၸိူဝ်းၼၼ်ႉၵေႃႈ ႁႂ်ႈမေႃပွင်ႇၸႂ်ပၼ် တၢင်းယၢပ်ႇၽိုတ်ႇပီႈၼွင်ႉ ၵူၼ်းမိူင်းၼႂ်း ပိုၼ်ႉတီႈ သေ ထွၼ်တူဝ်ဢွၵ်ႇမိူၼ်ၸုမ်းၼႆႉသေၵမ်း”ဝႃႈၼႆ။

ၾၢႆယေးယႂႃႇတွၼ်ႈၼိူဝ်ၼႆႉ ၵူၼ်းမိူင်းၼႂ်းထုင်ႉသီႇပေႃႉ သၢၼ်ၶတ်းမႃးႁၢဝ်ႈႁႅင်း ၵွပ်ႈဝႃႈၼမ်ႉတေ လုပ်ႇထူမ်ႈပႅတ်ႈ ဝၢၼ်ႈတႃႈလူင် တင်းသွင်ဝၢၼ်ႈ ဢၼ်မီးႁူဝ်ၵူၼ်း 653 ၵေႃႉ၊ ပိုၼ်ႉတီႈလိၼ်မၢၵ်ႇၸွၵ်း မၢၵ်ႇဝၢၼ် 637 ဢေႊၶိူဝ်ႊ၊ ပိုၼ်ႉတီႈၼႃး 140 ဢေႊၶိူဝ်ႊလႄႈ ႁႆႈသူၼ်တီႈလိၼ် ၸိူဝ်းဢမ်ႇၸၢင်ႈၼပ်ႉလႆႈ ပႃးၸဵမ်ဝတ်ႉဝႃးၵွင်းမူးလႄႈ ႁူင်း ႁဵၼ်းၸိူဝ်းၼၼ်ႉ တေၸူမ်ယူႇတႂ်ႈၼမ်ႉမူတ်း ဝႃႈၼႆ။

ၼၢင်းလၢဝ်ၶမ်း ၵူၼ်းဝၢၼ်ႈတႃႈလူင် လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈပူၼ်ႉမႃးဝူင်ႈၼိုင်ႈၼၼ်ႉ လႆႈႁူႉတႄႉ ၶွမ်ႊပၼီႊ ဢၼ်လဵဝ်ၵူၺ်း ၶႃႈလႆႈထွၼ်ဢွၵ်ႇ။ ပဵၼ်ဢၼ်ငိၼ်းၸူမ်းတႄႉၶႃႈ သင်ပဵၼ်လႆႈ ဢၼ်ၵိုတ်းဝႆႉယူႇၸိူဝ်း ၼၼ်ႉ ၶႂ်ႈႁႂ်ႈ ထွၼ်ဢွၵ်ႇထႅင်ႈမူတ်းမူတ်းၼႆ ယိုင်ႈၶႅၼ်းလီၶႃႈယဝ်ႉ” ဝႃႈၼႆ။

မိူဝ်ႈလိူၼ်သႅမ်ႊထႅမ်ႊၿိူဝ်ႊ 2018 ၽွင်းပၼ်ၶႅပ်းၵၢင်ၸႂ်ၼႂ်းသၽႃးတႃႇလႆႈငိုၼ်းသၢင်ႈၾၢႆထႅင်ႈၼၼ်ႉ ယူႇတီႈဢူး ထုၼ်းၼၢႆႇ ၵႅမ်ၽွင်းလူင်ၾၢႆႇၾႆးၾႃႉ ယင်းပၢႆတူၵ်ႇပႃး ၸိုဝ်ႈၶွမ်ႊပၼီႊမိူင်း ယူးရူပ်ႉၽူႈၵေႃႇ သၢင်ႈဢၼ်မီးလွင်ႈႁူမ်ႈ ၵဵဝ်ႇၶွင်ႈၸွမ်းၾၢႆ ယေးယႂႃႇတွၼ်ႈၼိူဝ်၊ ပိူင်လူင်မၼ်း ၶႂ်ႈႁႂ်ႈမီးလွင်ႈမၼ်ႈၸႂ်ၼိူဝ်ၵၢၼ်ၵေႃႇသၢင်ႈၼၼ်ႉယဝ်ႉ။ ၶွမ်ႊ ပၼီႊၸိူဝ်းၼၼ်ႉ ပႃးၶွမ်ႊပၼီႊ Lahmeyer ၵျိူဝ်ႇမၼီႇ၊ Stuckey SA သဝိတ်ႉၸိူဝ်ႇလႅၼ်ႇလႄႈ ၾရင်ႇ သဵတ်ႈ France’s joint venture IPGRB ပႃး” ဝႃႈၼႆ။

Burma Campaign UK ၼႆႉ လႆႈပိုၼ်ၽၢဝ်ႇဢွၵ်ႇ ၸိုဝ်ႈသဵၼ်ႈမၢႆၸိုဝ်ႈၼဝ်ႈ Dirty List မိူဝ်ႈၼႂ်းပၢႆပီ 2018။ ၸိုဝ်ႈသဵင် ၶွမ်ႊပၼီႊၼွၵ်ႈမိူင်း ဢၼ်မႃးလူင်းတိုၼ်းလၢင်းၼႂ်းမိူင်းႁူမ်ႈတုမ် ပတ်းပိုၼ်ႉ ၵႂႃႇပႃးၸွမ်းၸဵမ်မိူဝ်ႈၼၼ်ႉ။ ပႃးၸဵမ် ၶွမ်ႊပၼီႊၸိူဝ်းႁူမ်ႈလူင်းတိုၼ်း ယႃႉၶူဝ်းတိုၼ်းသၽႃဝမိူၼ်ၼင်ႇ သၢင်ႈၾၢႆ၊ ၶုတ်းၶမ်း၊ ၶုတ်း ႁႄႈ ၸဵမ်ၸိူဝ်းၼႆႉ ဝႃႈၼႆ။