လုင်းၸၢမ်ႇၽေႇ ပႃႇတီႇႁူဝ်သိူဝ် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းမိူင်းယႆ/ လူႉသဵင်ႈ လူၺ်ႈတၢင်းပဵၼ်ၵူၼ်းထဝ်ႈ တီႈႁိူၼ်း မၼ်းၸၢႆး ပွၵ်ႉဝဵင်းၸၢၼ်း ၸႄႈဝဵင်းမိူင်းယႆ ဝႃႈၼႆ။
ဝၼ်းတီႈ 04/02/2019 ယၢမ်းဝၢႆးဝၼ်း 3:50 မူင်း လုင်းၸၢႆးၸၢမ်ႇၽေႇ (ႁွင်ႉ) လုင်းၸိုၼ်ႈပၢင်ႇၾႃႉ ဢႃယု 67 ပီ လူႉသဵင်ႈတီႈႁိူၼ်းမၼ်းၸၢႆး တီႈပွၵ်ႉဝဵင်းၸၢၼ်း(ပွၵ်ႉ 3) ၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ။ မၼ်းၸၢႆးၼႆႉ မီးတၢင်းပဵၼ် ယဵဝ်ႈဝၢၼ်လႄႈ လိူတ်ႈၶိုၼ်ႈ ၸိူဝ်းၼႆႉ ဝႃႈၼႆ။
ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ တၢင်းပဵၼ်ၵူၼ်းထဝ်ႈၶႃႈဢေႃႈ။ လႆႈဝႃႈလုင်းႁဝ်း ဢမ်ႇသူႈၵႆႉပဵၼ်သင်။ ၵူၺ်းၵႃႈ ၶိုၵ်ႉၶၵ်ႉမႃး ပဵၼ်တၢင်းပဵၼ် ယဵဝ်ႈဝၢၼ်၊ လိူတ်ႈၶိုၼ်ႈ လေႃးၵၼ်ၵူႈမဵဝ်းၼၼ်ႉၼႃႇ၊ ဢၼ်ၵိုင်ႉၵၢင်ႉမႃးပဵၼ်တႄႉ ပီသွင်ပီၼႆႉၵူၺ်း။ ၵူၺ်းၵႃႈ ဢၼ်ပဵၼ်ႁႅင်းတႄႉ ၼႂ်းပီ 2018 မႃးၼႆႉ” ဝႃႈၼႆ။
ပေႃးထိုင်မႃး ဝၼ်းတီႈ 06/02/2019 ဝၼ်းပုတ်ႉၸိုင် ယူႇတီႈလုၵ်ႈလၢင်းၼၢင်းမေးလႄႈ ၸိူဝ်ႉၶိူဝ်းပီႈၼွင်ႉ တီႈၸမ်/ ၵႆ တေႁူမ်ႈၵၼ်ပူၼ်ႉၶၢပ်ႈတူဝ် ယၢမ်းဝၢႆးဝၼ်း 1 မူင်း တီႈႁိူၼ်းမၼ်းၸၢႆးပွၵ်ႉ 3 ၸႄႈဝဵင်းမိူင်းယႆ ဝႃႈၼႆ။
လုင်းၸၢႆးၸၢမ်ႇၽေႇ(ႁွင်ႉ) လုင်းၸိုၼ်ႈပၢင်ႇၾႃႉၼႆႉ ၵိူတ်ႇမိူဝ်ႈ ဝၼ်းတီႈ 27 လိူၼ်မေႊ ပီ 1952 ။ တီႈၸႄႈဝဵင်းမိူင်း ယႆ။ ပဵၼ်လုၵ်ႈၸၢႆး လုင်းမွင်ႇၵွင်းလႄႈ ပႃႈၼၢင်းလိုၼ်း။ ယဝ်ႉႁူင်းႁဵၼ်း ၸၼ်ႉသုင် တီႈဝဵင်းလႃႈသဵဝ်ႈ။ တႄႇၼႃႈႁိူၼ်း ၵိုၵ်းလူၺ်ႈ ပႃႈၼၢင်းၶမ်းထူၺ်း မီးလုၵ်ႈႁူမ်ႈၵၼ် 4 ၵေႃႉ လုၵ်ႈယိင်း 2 ၵေႃႉ၊ လုၵ်ႈၸၢႆး 2 ၵေႃႉ။ ၼၢင်းမွၼ်းၸၢမ်ၾႃႉ၊ ၼၢင်းယွတ်ႈၼုမ်ႇၾႃႉ၊ ၸၢႆးပိုၼ်းၸွမ်ၾႃႉလႄႈ ၸၢႆးတွၼ်းလႅင်းၾႃႉ ၸိူဝ်းၼႆႉ။
လုင်းၸၢႆးၸၢမ်ႇၽေႇ(ႁွင်ႉ) လုင်းၸိုၼ်ႈပၢင်ႇၾႃႉၼႆႉ မိူဝ်ႈပီ 1986 လႆႈၶဝ်ႈပဵၼ်လုၵ်ႈၸုမ်း(သမဝါယမ) သေ လႆႈႁၢပ်ႇ ၵၢၼ်ပဵၼ်ၽူႈၼမ်းၼႂ်း။ မိူဝ်ႈပီ 1990 လႆႈပဵၼ်ၽူႈၼမ်းၼႂ်း ပႃႇတီႇႁူဝ်သိူဝ် ၸႄႈဝဵင်းမိူင်းယႆ။ ယဝ်ႉၵေႃႈ ပဵၼ်ၾၢႆႇ သူၼ်းတုမ် ၼႂ်းပႃႇတီႇထႅင်ႈ။ မိူဝ်ႈပီ 1992 သမ်ႉ လႆႈႁၢပ်ႇၵၢၼ်ပဵၼ်ၽူႈၼမ်းၼႂ်း ၵေႃလိၵ်ႈလၢႆးလႄႈ ၾိင်ႈ ငႄႈတႆး မိူင်းယႆ။
ထိုင်မႃး မိူဝ်ႈပီ 2010 ၼၼ်ႉ လႆႈယူႇၼႂ်းပႃႇတီႇသိူဝ်ၽိူၵ်ႇသေ ၶဝ်ႈၶဵင်ႇ ပၢင်လိူၵ်ႈတင်ႈမႃး လႆႈဢွင်ႇပေႉ ပဵၼ်ၽူႈတႅၼ်း သၽႃးၸႄႈမိူင်း ၶဵတ်ႈ လိူၵ်ႇတင်ႈ မၢႆ 1 ၸႄႈဝဵင်းမိူင်းယႆ။ ထိုင်မႃး ပီ 2014 သမ်ႉ လႆႈထွၼ်တူဝ်ဢွၵ်ႇ ပႃႇတီႇသိူဝ်ၽိူၵ်ႇ သေၶဝ်ႈႁူမ်ႈပႃႇတီႇႁူဝ်သိူဝ်။ ထိုင်မႃးပီ 2015 ယူႇတီႈပႃႇတီႇႁူဝ်သိူဝ်သေ ၶဝ်ႈၶဵင်ႇလိူၵ်ႈတင်ႈတီႈမိူင်းယႆသေ ဢွင်ႇပေႉ ထႅင်ႈၵမ်းၼိုင်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ