ပွႆးဝၼ်းၸိူဝ်ႉၸၢတ်ႈၸိုင်ႈတႆး တီႈလွႆတႆးလႅင်း တူဝ်တႅၼ်း လူင်ပွင်ၸိုင်ႈ တေၶဝ်ႈႁူမ်ႈ

လူင်ပွင်ၸိုင်ႈၼေႇပျီႇတေႃႇ သူင်ႇတူဝ်တႅၼ်း ၵႂႃႇၶဝ်ႈႁူမ်ႈ ပၢင်ပွႆး ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 72 ပီလႄႈ တေ ႁူပ်ႉထူပ်းဢုပ်ႇဢူဝ်း တင်း RCSS ၵဵဝ်ႇလူၺ်ႈၶၵ်ႉၵၢၼ်လွင်ႈငမ်းယဵၼ် ဢၼ်ၶွင်ႉၶမ်ၵၼ်ဝႆႉယူႇယၢမ်းလဵဝ်။

ဝၼ်းတီႈ 07/02/2019 ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ဢွၼ်ၸတ်းႁဵတ်း ဝၼ်းၸိူဝ်ႉ ၸၢတ်ႈၸိုင်ႈတႆး ၶွပ်ႈတဵမ် 72 ပီ တီႈငဝ်ႈၸိုင်ႈလွႆတႆးလႅင်း။ ယူႇတီႈတူဝ်တႅၼ်း ၶွမ်ႊမသျိၼ်ႊငမ်းယဵၼ်မၢၼ်ႈ PC ဢူးဢွင်ႇသူဝ်းတင်း ဢူးလႃႉမွင်ႇသူၺ်ႇ တေၶဝ်ႈႁူမ်ႈ ပၼ်ႁႅင်းပၢင်ပွႆးလႄႈ တေႁူပ်ႉဢုပ်ႇၵၼ်ပႃး ၶၵ်ႉၵၢၼ်လွင်ႈ ငမ်းယဵၼ်ဢၼ်ၶမ်ၵၼ်ဝႆႉယူႇ ၸဵမ်ၸိူဝ်းၼႆႉ။

ၸဝ်ႈၶိုၼ်းသႂ် ၸႂ်ယဵၼ် ၽူႈၵိူဝ်းၵုမ် RCSS/SSA လၢတ်ႈတီႈၽူႈတွႆႇႁွၵ်ႈဝႃႈ “ၾၢႆႇလူင်ပွင်ၸိုင်ႈတေသူင်ႇမႃး ဢူးဢွင်ႇသူဝ်း၊ ဢူးလႃႉမွင်ႇသူၺ်ႇလႄႈ ၵူၼ်းၸွမ်းၵေႃႉၼိုင်ႈ တေပဵၼ် 3 ၵေႃႉ။ တေႁွတ်ႈထိုင် ၼိူဝ်လွႆ ဝၼ်း တီႈ 6 ယဝ်ႉၵေႃႈ တေႁူပ်ႉဢုပ်ႇၵၼ်တင်း RCSS ၵဵဝ်ႇၵပ်းလူၺ်ႈလွင်ႈ ၶၵ်ႉၵၢၼ်ငမ်းယဵၼ် ဢၼ်ပဵၼ်ယူႇယၢမ်းလဵဝ် ၼႆႉ” ဝႃႈၼႆ။

ဝၼ်းတီႈ 07/02/2019 ၼႂ်းဝၼ်းၸိူဝ်ႉၸၢတ်ႈၸိုင်ႈတႆးၼၼ်ႉ ယူႇတီႈဢူးဢွင်ႇသူဝ်း တေလူၼႄၽိုၼ်လိၵ်ႈ ၼႂ်းပၢင် ၵႅဝ်ႈ တီႈငဝ်ႈၸိုင်ႈလွႆတႆးလႅင်း ဢၼ်တေႃႇဢွင်ႇသၢၼ်းသူႉၵျီႇယိုၼ်ႈမႃးၸွမ်းၼၼ်ႉ ဝႃႈၼႆ။

ယူႇတီႈလူင်ပွင်ၸိုင်ႈ၊ တပ်ႉမတေႃႇတင်း RCSS မီးၽႅၼ်တေႁူပ်ႉၵၼ် ၼႂ်းဝၼ်းတီႈ 2-3 လိူၼ်ၾႅပ်ႊၿိဝ်ႊရီႊပူၼ်ႉ မႃးၼႆႉ ဝႃႈၼႆသေတႃႉ ဢမ်ႇပဵၼ်ႁူပ်ႉ၊ ၾၢႆႇ RCSS ဢွၵ်ႇလိၵ်ႈဝႃႈ ဢမ်ႇပႆႇတူဝ်ႈတၼ်းၼႆသေတႃႉ ၵမ်ႈၼမ်တႄႉ ထတ်းသၢင်ဝႃႈ ၵဵဝ်ႇၶွင်ႈၶေႃႈၾၢင်ႉတိူၼ်းသိုၵ်းလူင်ပွင်ၸိုင်ႈမၢၼ်ႈပိုၼ်ၽၢဝ်ႇၼႄး RCSS ပူၼ်ႉပႅၼ်ၶေႃႈၵိၼ်ၵႅၼ်ႇ ၵဵင်းတုင်။

ငဝ်ႈၸိုင်ႈၶွင်ႇသီႇဢဝ်ၶိုၼ်းၸိုင်ႈတႆး RCSS/SSA ၸတ်းႁဵတ်းပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆးမႃးၵူႈပီ၊ ပီၵၢႆ မီးၶႅၵ်ႇၶိုၵ်ႉတွၼ်းၼွၵ်ႈမိူင်းၼႂ်းမိူင်း ၽွင်းတၢင် 20 မိူင်းပၢႆ ၶဝ်ႈႁူမ်ႈ။ ပီၼႆႉၵေႃႈ လႆႈႁူႉဝႃႈ မွၵ်ႇပၢင်းဝႆႉၵူႈမူႇၵူႈၸုမ်း။

ဝၼ်းတီႈ 7 ၾႅပ်ႊၿိဝ်ႊရီႊၼႆႉ ပဵၼ်ဝၼ်းတႄႇသၼ်ႇထေႇမိူင်းႁူမ်ႈတုမ်။ ပေႃးဢမ်ႇမီးဝၼ်းတီႈ 7 ၾႅပ်ႊၿိဝ်ႊရီႊ၊ ဝၼ်းမိူင်းႁူမ်ႈတုမ် 12 ၾႅပ်ႊၿိဝ်ႊရီႊၵေႃႈ တေဢမ်ႇပဵၼ်မႃးဝၼ်းလိၵ်ႈႁူမ်ႈမၢႆပၢင်လူင်လႆႈ။ ဝၼ်းတီႈ 7 ၾႅပ်ႊၿိဝ်ႊရီႊ ပဵၼ်ဝၼ်းၸိူဝ်ႉၸၢတ်ႈ၊ ဝၼ်းဢၼ်မၵ်းမၼ်ႈ ၵႂၢမ်းတၢင်ႇတုင်း/ ၸွမ်ပိဝ် ၸိူဝ်ႉၸၢတ်ႈဢၼ်ႁၼ်ယူႇယၢမ်းလဵဝ်။