ၵူၼ်းမိူင်းၼႂ်းၸႄႈဝဵင်းသီႇပေႃႉ ဢွၼ်ၵၼ်ပၢႆႈၽေးသိုၵ်း မႃးယူႇတီႈဝတ်ႉဝႃးၽႃသိူဝ်ႇႁိမ်းဝဵင်း 100 ၵေႃႉပၢႆ။
မိူဝ်ႈၼႆႉ ဝၼ်းတီႈ 04/02/2019 ယၢမ်းဝၢႆးဝၼ်း 2 မူင်း ၵူၼ်းဝၢၼ်ႈၽၵ်းႁီႉတင်း ဝၢၼ်ႈလူင်ဝၢႆ ႁူဝ်ၵူၼ်း 102 ၵေႃႉ ဢွၼ်ၵၼ်ပၢႆႈႁွတ်ႈမႃးထႅင်ႈ တီႈဝတ်ႉၼႃးၵၢင် ဢိူင်ႇၼွင်ဢၢင်ႇ တွၼ်ႈတၢင်းဢွၵ်ႇဝဵင်းယၢၼ် 15 လၵ်း ၸႄႈဝဵင်း သီႇပေႃႉ ၸိုင်ႈတႆးပွတ်းႁွင်ႇ ဝႃႈၼႆ။
ၽူႈၸွႆႈထႅမ်ၵူၼ်းပၢႆႈၽေးသိုၵ်း တီႈဝတ်ႉၼႃးၵၢင် လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ၵူၼ်းဝၢၼ်ႈၽၵ်းႁီႉတင်း ဝၢၼ်ႈလူင်ဝၢႆ ပၢႆႈဢွၵ်ႇမႃးထႅင်ႈၶႃႈ။ ႁူဝ်ၵူၼ်း 102 ၵေႃႉ တိုၵ်ႉႁွတ်ႈၽႅဝ် တီႈဝတ်ႉမိူဝ်ႈၵႆႈၼႆႉၵူၺ်း။ ယွၼ်ႉငဝ်းလၢႆး ၼႂ်းပိုၼ်ႉတီႈ ဢမ်ႇမီးလွင်ႈၼိမ်သဝ်း ၵူဝ်ပဵၼ်ပၢင်တိုၵ်းသေ ၼႅတ်ႈဢွၼ်ၵၼ်ပၢႆႈဢွၵ်ႇမႃးၶႃႈ” ဝႃႈၼႆ။
သဵၼ်ႈသၢႆမၢႆ ၵူၼ်းပၢႆႈၽေးသိုၵ်း ဢၼ်လႆႈၵဵပ်းႁုပ်ႈၵၼ်ဝႆႉ မိူဝ်ႈဝၼ်းတီႈ 02/02/2019 ၼၼ်ႉ တီႈဝတ်ႉၼႃးမၢၵ်ႇၶေႃ ႁူဝ်ၵူၼ်း 345 ၵေႃႉ၊ ၵျွင်းၶရိတ်ႊယၼ်ႇ 98 ၵေႃႉလႄႈ ဝတ်ႉၼႃးၵၢင် 73 ၵေႃႉ ႁူမ်ႈၵၼ် တင်းမူတ်း 516 ၵေႃႉ။
ၵူၼ်းပၢႆႈၽေးသိုၵ်းသမ်ႉ ၵူၼ်းဝၢၼ်ႈၼႂ်းလူင်၊ တူၼ်ႈၵႅင်း၊ ႁူဝ်ၼႃး၊ ဝၢၼ်ႈႁူမ်ႈ၊ တႃႈလူင်၊ ၵဵတ်းၽူၼ်၊ လွႆမွၵ်ႇ၊ သၢႆးၶၢဝ်၊ လႄႈလူင်ဝၢႆ ၸုမ်းသိုၵ်းယိပ်းၵွင်ႈၵၢင်ႇ လတ်းၵႂႃႇလတ်းမႃး၊ ငႃၵၼ်၊ လွၵ်ႇႁႂ်ႈၵူၼ်းဝၢၼ်ႈၵူၼ်းမိူင်းၵူဝ်လႄႈ ပႃးၵၼ်ပၢႆႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ