ႁႅင်းၵၢၼ်ယၢၼ်မိူင်း ၸိူဝ်းဢမ်ႇၸွမ်းပၵ်းပိူင်မၢႆမီႈ ႁႅင်းၵၢၼ် မိူင်းထႆးၼၼ်ႉ ၺႃးၸဝ်ႈၼႃႈတီႈပလိၵ်ႈထႆး တီႉၺွပ်း သူင်ႇပွၵ်ႈတၢင်းလႅၼ်လိၼ် ၼႂ်းလိူၼ်ၵျႅၼ်ႊၼိဝ်ႊရီႊပူၼ်ႉမႃးၼႆႉ မီးၵႂႃႇ ယဝ်ႉ ႁူဝ်ၵူၼ်း 174 ၵေႃႉ။
တႄႇဢဝ် ဝၼ်းတီႈ 01-31/01/2019 ၼႆႉမႃး ပလိၵ်ႈထႆး တီႉသူင်ႇႁႅင်းၵၢၼ် ပွၵ်ႈတၢင်းၾင်ႇလႅၼ်လိၼ် မႄႈသၢႆ – တႃႈ ၶီႈလဵၵ်း မီးၵႂႃႇႁူဝ်ၵူၼ်း 174 ၵေႃႉ။ ၼႂ်းၼၼ်ႉ ၽူႈၸၢႆး 111 ၵေႃႉ၊ ၽူႈယိင်း 59 ၵေႃႉ လႄႈ လုၵ်ႈဢွၼ်ႇ 4 ၵေႃႉ ဝႃႈၼႆ။
သိုဝ်ႇၶၢဝ်ႇ Tachileik News Agency ဢွၵ်ႇဝႆႉဝႃႈ “ ၵမ်ႈၼမ် ႁႅင်းၵၢၼ် ဢၼ်ထုၵ်ႇတီႉၺွပ်းသူင်ႇပွၵ်ႈမႃးသမ်ႉ ပဵၼ် ႁႅင်းၵၢၼ် ပူၼ်ႉၶၢမ်ႈဢွင်ႈတီႈတတ်းမၵ်း။ မၢင်ၵေႃႉ ဝတ်းဝႂ်ဢမ်ႇတဵမ် ၽိတ်းမၢႆမီႈသေဢၼ်ဢၼ်သေ တီႉသူင်ႇတူဝ် ပွၵ်ႈမႃးၶိုၼ်း။ မိူဝ်ႈဝၼ်းတီႈ 31/01/2019 ဝၼ်းလိုၼ်းသုတ်း လိူၼ်ၵျႅၼ်ႊၼိဝ်ႊရီႊၼၼ်ႉၵေႃႈ လႆႈသူင်ႇပွၵ်ႈမႃး 24 ၵေႃႉ ၽူႈၸၢႆး 12 ၵေႃႉလႄႈ ၽူႈယိင်း 12 ၵေႃႉ” ဝႃႈၼႆ။
ၵဵဝ်ႇလူၺ်ႈႁႅင်းၵၢၼ် ဢၼ်လႆႈသူင်ႇတူဝ်ပွၵ်ႈမႃးတၢင်းလႅၼ်လိၼ် ၾင်ႇထႆး – တႆး (မႄႈသၢႆ – တႃႈၶီႈလဵၵ်း) ၼႆႉ ယူႇတီႈ ၽူႈမီးပုၼ်ႈၽွၼ်း တၢင်းၾၢႆႇတႃႈၶီႈလဵၵ်း လႆႈၵူတ်ႇထတ်း ႁပ်ႉႁွင်းဢဝ်သေ သိုပ်ႇသူင်ႇပွၵ်ႈၶိုၼ်း ႁိူၼ်းယေး ၽႂ်မၼ်း ၵႂႃႇ ဝႃႈၼႆ။
ပီ 2018 ပူၼ်ႉမႃးၼႆႉ ႁႅင်းၵၢၼ်ယၢၼ်မိူင်း ဢၼ်ထုၵ်ႇပလိၵ်ႈထႆး တီႉၺွပ်းသူင်ႇပွၵ်ႈလႅၼ်လိၼ်တႆး – ထႆး (တႃႈၶီႈ လဵၵ်း – မႄႈသၢႆ) မီးၵႂႃႇ ႁူဝ်ၵူၼ်း မွၵ်ႈ 1,200 ၵေႃႉ ဝႃႈၼႆ။
