ပၢင်ၵုမ်ႁၢင်ႈႁႅၼ်း တႃႇၸတ်းႁဵတ်းပၢင်ပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး ပွၵ်ႈၵမ်း 43 ၸတ်းႁဵတ်းတီႈဝၢၼ်ႈမႂ်ႇမွၵ်ႇ ၸၢမ် မီးၽူႈၶဝ်ႈႁူမ်ႈပၢင်ၵုမ်ဢုပ်ႇဢူဝ်းတႅပ်းတတ်းၵၼ်လၢႆလၢႆလွင်ႈ။

ဝၼ်းတီႈ 02/02/2019 ယၢမ်းၵၢင်ၼႂ် 10 မူင်း ၵေႃၵမ်ၵၢၼ်ပွင်ပဵၼ်ပၢင်ပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး ႁူပ်ႉထူပ်း ဢုပ်ႇဢူဝ်းၵၼ် ပဵၼ်ပွၵ်ႈၵမ်း 2 ပီ 2019 (2562)။ ပၢင်ၵုမ်ၼႆႉ ၸတ်းႁဵတ်းတီႈ ဝတ်ႉမိူင်းၼွင် ဝၢၼ်ႈမႄႈသၢဝ် ၸႄႈဝဵင်း မႄႈဢၢႆး ၸႄႈတွၼ်ႈၵဵင်းမႆႇ ၸိုင်ႈထႆး ဝႃႈၼႆ။

ၸၢႆးၵဝီး ယွတ်ႈသႅင် ႁူဝ်ပဝ်ႈၵေႃပွင်ၵၢၼ်ၸတ်းပွႆး ယုၵ်ႉယွင်ႈၸဝ်ႈၶူးမေႃလိၵ်ႈတႆး မွၵ်ႇလၢတ်ႈၶေႃႈၵႂၢမ်းဝႃႈ “ ယိၼ်း ၸူမ်းၶွပ်ႈၸိုင်ထိုင် ၵေႃၵမ်ၵၢၼ် ၵူႈၵေႃႉ ၵူႈမူႇဝၢၼ်ႈ တီႈလႆႈမႃးၶဝ်ႈႁူမ်ႈပၢင်ၵုမ် ဝၼ်းမိူဝ်ႈၼႆႉ ႁဝ်းၶႃႈၵူႈၵေႃႉ မႃးဢုပ်ႇ ၵၼ်၊ ၸွႆႈၵၼ် ၼင်ႇႁိုဝ် ၵၢၼ်ငၢၼ်းႁဝ်းၶႃႈ တေဢွၵ်ႇမႃးလီလႄႈ ယဝ်ႉတူဝ်ႈလီၼၼ်ႉ မိူၼ်ၼင်ႇ လွင်ႈၵၢၼ်ငိုၼ်း၊ ၵၢၼ်ၸတ်းၵၢၼ်လႄႈ လွင်ႈပၼ်ၼႃႈတီႈၵၼ် ၸဵမ်ၸိူဝ်းၼႆႉ ႁႂ်ႈလႆႈႁဵတ်းသၢင်ႈၵၼ် ဢဝ်ပုၼ်ႈၽွၼ်းၵၼ်ၵႂႃႇလီတီႈ သုတ်း ယွၼ်ႉဝႃႈ မၼ်းပဵၼ်ၵၢၼ်ႁဝ်းၶႃႈၵူႈၵေႃႉယဝ်ႉ” ဝႃႈၼႆ။

ပၢင်ၵုမ် ႁၢင်ႈႁႅၼ်း တႃႇပၢင်ပွႆးယုၵ်ႉယွင်ႈ ၸဝ်ႈၶူးမေႃလိၵ်ႈတႆး တီႈဝၢၼ်ႈမႂ်ႇမွၵ်ႇၸၢမ် ပွၵ်ႈၵမ်း 43 ၼႆႉ မီးၽူႈၶိုၼ်ႈ ႁွတ်ႈပၢင်ၵုမ် ႁိမ်း 40 ၵေႃႉ ဝႃႈၼႆ။
တီႈၼႂ်းပၢင်ၵုမ်ၼႆႉ ဢုပ်ႇဢူဝ်းတႅပ်းတတ်း ပၼ်ၼႃႈတီႈပုၼ်ႈၽွၼ်းၵၼ် မိူၼ်ၼင်ႇ ၾၢႆႇၵၢၼ်ငိုၼ်း၊ ၾၢႆႇၸတ်းၵၢၼ်၊ ၾၢႆႇႁူမ်ႇလူမ်ႈ၊ ၾၢႆႇႁၢင်ႈႁႅၼ်းပၢင်ပွႆး၊ ၾၢႆႇၸတ်းပၢင်ဢုပ်ႇၶႆႈ/ တၢၼ်ႈၶႆႈ လႄႈ ဢိၵ်ႇထႅင်ႈလၢႆလၢႆၾၢႆႇ ဝႃႈၼႆ။

ပၢင်ပွႆးယုၵ်ႉယွင်ႈၸဝ်ႈၶူးမေႃလိၵ်ႈတႆး တီႈဝၢၼ်ႈမႂ်ႇမွၵ်ႇၸၢမ် ပွၵ်ႈၵမ်း 43 ၼႆႉ တေၸတ်းႁဵတ်း ၼႂ်းဝၼ်းတီႈ 17-19/02/2019 ဢွင်ႈတီႈၸတ်းႁဵတ်းသမ်ႉ တီႈဝတ်ႉဝိႁၢရ်ဝၢၼ်ႈမႂ်ႇမွၵ်ႇၸၢမ်၊ ဢိူင်ႇတႃႈတွၼ်း၊ ၸႄႈဝဵင်းမႄႈဢၢႆး ၸႄႈ တွၼ်ႈၵဵင်းမႆႇ ၸိုင်ႈထႆး ဝႃႈၼႆ။

ပီႈၼွင်ႉတႆး ၶဝ်ႈမႃးပၵ်းတင်ႈတီႈယူႇတၼ်းသဝ်း ၼႂ်းမိူင်းထႆး တီႈဝၢၼ်ႈမႂ်ႇမွၵ်ႇၸၢမ် မိူဝ်ႈၽွင်းပီ 1962 ။ ထိုင်မႃးမိူဝ်ႈ 19 လိူၼ်ၵျႅၼ်ႊၼိဝ်ႊရီႊ 1973 ၸဝ်ႈမုၼ်ယႂ်ႇၶုၼ်ႁေႃၶမ်းထႆး (တူၼ်ႈတီႈ 9) မႃးယဵမ်ႈသူႇၸႂ်း ပီႈၼွင်ႉတႆး တီႈဝၢၼ်ႈ မႂ်ႇမွၵ်ႇၸၢမ်၊ မႃးပၼ်တၢင်းၶႆႈၸႂ်လႄႈ ပၼ်တိုဝ်ႉတၢင်း ၸတ်းပၢင်ပွႆးယုၵ်ႉယွင်ႈ ၸဝ်ႈၶူးမေႃလိၵ်ႈတႆး။ တင်ႈတႄႇပၢၼ် ၼၼ်ႉမႃး ၸတ်းမႃးၵူႈသိုပ်ႇပီသေ ထိုင်ပီ 2019 ၼႆႉ ၶွပ်ႈထူၼ်ႈ 43 ပီ။