တပ်ႉသိုၵ်းလွတ်ႈလႅဝ်းၶၢင် KIO/ KIA ၵဵပ်းၶွၼ်ႇတီႈပီႈၼွင်ႉၸၢဝ်းတႆး ၼႂ်းၸႄႈမိူင်းၶၢင် တၢင်းပွတ်းဢိူင်ႇလွႆၸႄႈ ၼိုင်းႁိူၼ်းလႂ် လႆႈသႂၢင်းပၼ် 4 မိုၼ်ႇပျႃး ထိုင် 6 မိုၼ်းပျႃး ဝႃႈၼႆ။
ဝၼ်းတီႈ 30/01/2019 သိုၵ်းၶၢင် KIO/ KIA ၶဝ်ႈၵဵပ်းၶွၼ်ႇ တီႈၵူၼ်းမိူင်း ၸၢဝ်းတႆး တၢင်းဝၢၼ်ႈၵုင်းသႃႇ၊ မၢၼ်ႈၼိမ်၊ ဝၢၼ်ႈဝဵင်းႁႆးလႄႈ ဝၢၼ်ႈၵုင်ႈလူင် ၼႂ်းဢိူင်ႇလွႆၸေႈ ၸႄႈဝဵင်းမိူင်းမွၵ်ႇ ၸႄႈမိူင်းၶၢင် တင်းမူတ်းလင်ႁိူၼ်း ဢၼ် လႆႈသႂၢင်း ၶွၼ်ႇပၼ် 176 လင်။ ငိုၼ်းဢၼ်လႆႈသႂၢင်း ႁိမ်းပၢၵ်ႇသႅၼ်ပျႃး ဝႃႈၼႆ။
ၵူၼ်းပိုၼ်ႉတီႈ ၼႂ်းဢိူင်ႇလွႆၸေႊ လၢတ်ႈဝႃႈ “ ပဵၼ်သိုၵ်းၶၢင်ၶႃႈဢေႃႈ ဢၼ်ၶဝ်ႈမႃးၵဵပ်းၼႂ်းဝၢၼ်ႈ ဝၢၼ်ႈၵုင်းသႃႇ လင်ႁိူၼ်း 70 လင် 1 ႁိူၼ်းလႂ် လႆႈသႂ်ႇပၼ် 4 မိုၼ်ႇပျႃး၊ မၢၼ်ႈၼိမ် 28 လင် ၼိုင်ႈလႂ် လႆႈသႂ်ႇပၼ် 6 မိုၼ်ႇပျႃး၊ ဝၢၼ်ႈ ဝဵင်းႁၢႆး 55 လင် 1 ႁိူၼ်းလႂ် လႆႈသႂ်ႇပၼ် ငိုၼ်းၶႄႇ 200 ယွမ်။ တင်းဝၢၼ်ႈၵုင်ႈလူင်သမ်ႉ 23 လင် 1 ႁိူၼ်းလႂ် သႂ်ႇပၼ် (ငိုၼ်းၶႄႇ) 200 ယွမ်။ ၵူၼ်းဝၢၼ်ႈသႂ်ႇပၼ်ၶဝ်ၵႂႃႇတႄႉ ၵမ်ႈၼမ်ယဝ်ႉ။ ၸိူဝ်းပႆႇသႂ်ႇပၼ်တႄႉ မီးႁၢမ်ႈ ဢေႇၵူၺ်း” ဝႃႈၼႆ။
သိုပ်ႇလၢတ်ႈဝႃႈ “ ၶဝ်တေမႃးၵဵပ်းၵူၼ်းၵႂႃႇႁဵတ်းသိုၵ်းၶၢင်ၶဝ်ထႅင်ႈ ၼိုင်ႈဝၢၼ်ႈလႂ် ႁႂ်ႈသူင်ႇပၼ် 2 ၵေႃႉ ၼႆဝႃႇ။ သိုၵ်း ၶၢင်ၶဝ် လၢတ်ႈဝႃႈ ၼိုင်ႈဝၢၼ်ႈလႂ် ပၼ်လႆႈ 2 ၵေႃႉၶိုၼ်ႈၼိူဝ်ၼႆ ယိုင်ႈၶႅၼ်းလီၼႆဝႃႇ။ ၵဵဝ်ႇၵပ်းလွင်ႈၵဵပ်းသိုၵ်းၼႆႉ ယူႇတီႈ ၽူႈယႂ်ႇၵူၼ်း လူင်ၼႂ်းမူႇဝၢၼ်ႈ တိုၵ်ႉဢုပ်ႇၵၼ်ယူႇ ဝႃႈတေႁဵတ်းၸိူင်ႉႁိုဝ်၊ ၶပ်ႉၶိုင်ၸိူင်ႉႁိုဝ် ဢၼ်ဝႃႈၼၼ်ႉ” ဝႃႈၼႆ။
တေႃႈလဵဝ် ပီႈၼွင်ႉတႆး တၢင်းၾၢႆႇၸၢၼ်းလွႆၸေႊသမ်ႉ မိူၼ်ၼင်ႇ ဝၢၼ်ႈၼွင်ပုင်ႇ၊ ဝၢၼ်ႈတူၼ်ႈႁုင်းလႄႈ မၢၼ်ႈ ၵွင်းတႄႉ ဢွၼ်ၵၼ်မႆႈၸႂ် ၵၼ်ယူႇ ဝႃႈၼႆ။
ၵူၼ်းပိုၼ်ႉတီႈတၢင်းပွတ်းတွၼ်ႈၼၼ်ႉတႄႉ လၢတ်ႈဝႃႈ “ ဝၼ်းသွင်ဝၼ်းၼႆႉမႃး ပီႈၼွင်ႉတၢင်းၾၢႆႇႁွင်ႇလွႆၸေႊတႄႉ သိုၵ်းၶၢင်ၶဝ် ၶဝ်ႈၵႂႃႇၵဵပ်းယဝ်ႉ။ ဢမ်ႇႁူႉဝႃႈ တေမႃးတၢင်းႁဝ်းမိူဝ်ႈလႂ်။ ဢၼ်ၶဝ်မႃးၵဵပ်းၵႂႃႇၼၼ်ႉ ၼိုင်ႈႁိူၼ်းလႂ် လႆႈ သႂ်ႇပၼ် 4 မိုၼ်ႇပျႃး ထိုင် 6 မိုၼ်ႇပျႃးၶႃႈယဝ်ႉ။ ႁဝ်းၶႃႈ ပဵၼ်ဢၼ်မႆႈၸႂ်ၵၼ်ယူႇ တေႃႈလဵဝ် ၵၢၼ်ႁႃၵိၼ်လဵင်ႉတွင်ႉ ၵေႃႈပဵၼ်ဢၼ်ယၢပ်ႇၽိုတ်ႇဝႆႉ။ သိုၵ်းၶဝ်သမ်ႉ မႃးၵဵပ်းၶွၼ်ႇထႅင်ႈၼႆ ႁဝ်းတေႁႃတီႈလႂ်သႂ်ႇပၼ်၊ လႆႈငိၼ်းဝႃႈ ၵဵပ်းငိုၼ်း ဢမ်ႇၵႃး တေၵဵပ်းပႃးၵူၼ်းထႅင်ႈၼႆႉ လွင်ႈၼႆႉ ပဵၼ်တၢင်းယၢပ်ႇၽိုတ်ႇတႃႇၵူၼ်းမိူင်းတႄႉ” ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ