ၵူၼ်းမိူင်းသီႇပေႃႉ ဢၼ်ယဵပ်ႇၺႃးမၢၵ်ႇ တီႈၼႂ်းသူၼ် မိူဝ်ႈ 24/01/2019 ၼၼ်ႉ လႆႈသူင်ႇယူတ်းယႃ တီႈႁူင်းယႃ လႃႈ သဵဝ်ႈသေ တေႃႈလဵဝ် လႆႈၶိုၼ်းဢဝ်မႃးယႃတီႈသီႇပေႃႉယဝ်ႉ ဝႃႈၼႆ။

ဝၼ်းတီႈ 31/01/2019 ယၢမ်းဝၢႆးဝၼ်း 3:30 မူင်း လုင်းသီဝူး (ဦးဇီဝူး) ဢႃယု မွၵ်ႈ 60 ပီ (ၸၢဝ်းလီသူး) ၵူၼ်းဝၢၼ်ႈ ပွၵ်ႉၸၢင်ႈၶမ်းၸၢၼ်း သီႇပေႃႉ ဢၼ်လႆႈသူင်ႇၵႂႃႇယူတ်းယႃတူဝ်တီႈႁူင်းယႃလူင် လႃႈသဵဝ်ႈၼၼ်ႉ တေႃႈလဵဝ် ၶႅၼ်းလီ မႃးတင်းၼမ်လႄႈ လႆႈသူင်ႇပွၵ်ႈမႃးယူတ်းယႃၶိုၼ်းတီႈသီႇပေႃႉ ဝႃႈၼႆ။

ၽူႈၸွႆႇထႅမ် ၵူၼ်းပၢႆႈၽေးသိုၵ်း ၸႄႈဝဵင်းသီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး ယၢမ်းဝၢႆးဝၼ်း 3 မူင်းၶိုင်ႈၼၼ်ႉ ၸုမ်းၸွႆႈထႅမ် ၽေးၵိုင်ႉၵၢင်ႉ တီႈလႃႈသဵဝ်ႈ ဢဝ်တၢင်ႇၵႃးသေ မႃးသူင်ႇပၼ်တီႈႁူင်းယႃ သီႇပေႃႉၶႃႈ။ တေလႆႈဝႃႈ ၶႅၼ်းၶိုၼ်ႈမႃးၼမ်ၶႃႈ။ မၢၵ်ႇဢၼ်တႅၵ်ႇသႂ်ႇတီႈၶႃမၼ်းၸၢႆး တီႈၶႃၾၢႆႇၶႂႃၼၼ်ႉ ပွင်ႇႁူးယႂ်ႇဝႆႉ။ ၶႃၾၢႆႇသၢႆႉ သမ်ႉ လႆႈယဵပ်ႉဝႆႉ တီႈႁိမ်းႁူဝ်မၢၵ်ႇၵၢဝ်ႈမၼ်း။ ယူႇတီႈမေႃယႃ လႃႈသဵဝ်ႈတႄႉ ပၼ်ၶႂၢင်ႉလူင်းႁူင်းယႃမႃး။ ၵမ်းၼႆႉ ၸင်ႇ မႃးသိုပ်ႇၶိုၼ်ႈတီႈႁူင်းယႃသီႇပေႃႉ။ ယွၼ်ႉဝႃႈ ပေႃးမႃးၶိုၼ်ႈတီႈၼႆႈၸိုင် ပီႈၼွင်ႉ ၵူၼ်းလုမ်းလႃးတူၺ်းမၼ်း ၵေႃႈ တေ တၼ်းတူၺ်း လုမ်းလႃးပၼ်ငၢႆႈ။ ယွၼ်ႉယူႇၸမ်ၵၼ် ၵႂႃႇမႃးႁႃၵၼ်ငၢႆႈ”ဝႃႈၼႆ။

မိူဝ်ႈဝၼ်းတီႈ 24/01/2019 ယၢမ်းၵၢင်ၼႂ် 8 မူင်း လုင်းသီဝူး(ဦးဇီဝူး) ဢႃယု မွၵ်ႈ 60 ပီ (ၸၢဝ်းလီသူး) ၵႂႃႇႁဵတ်းၵၢၼ် သူၼ် မၼ်းၸၢႆး ဢၼ်မီးဝႆႉတီႈဝၢၼ်ႈလွႆမွၵ်ႇ ဢိူင်ႇၵုင်းသေႃႉ ၸႄႈဝဵင်းသီႇပေႃႉၼၼ်ႉ ယဵပ်ႇၺႃးမၢၵ်ႇၾင်လိၼ်လုၵ်ႈ ၼိုင်ႈ တႅၵ်ႇၽူင်ႉသႂ်ႇသေ လႆႈ မၢတ်ႇၸဵပ်းႁၢဝ်ႈႁႅင်း။

လုင်းသီဝူး ပဵၼ်ၵူၼ်းဝၢၼ်ႈ ပွၵ်ႉၸၢင်ႈၶမ်းၸၢၼ်း မၢၵ်ႇဢၼ်တႅၵ်ႇသႂ်ႇၽူင်ႉသႂ်ႇမၼ်းၸၢႆးၼၼ်ႉ ပဵၼ်မၢၵ်ႇၽႂ်၊ ၼမ်ႉ မိုဝ်းၽႂ်ႁၢင်ႈၵၢင်ဝႆႉ ဢၼ်ဝႃႈၼၼ်ႉ ပႆႇလႆႈႁူႉ ဝႃႈၼႆ။

ႁၢင်ပီ 2018 – ႁူဝ်ပီ 2019 ၼႆႉ ၸုမ်းယိပ်းၵွင်ႈၵၢင်ႇလၢႆၸုမ်းပႃးၸဵမ်သိုၵ်းလူင်ပွင်ၸိုင်ႈ ပဵၼ်ပၢင်တိုၵ်းၵၼ်လၢႆတီႈ လၢႆ ၵမ်း ၵူၼ်းမိူင်းၸိူဝ်းလႆႈပၢႆႈၽေးသိုၵ်းၵေႃႈ မီးၼပ်ႉႁူဝ်ပၢၵ်ႇ။