ႁွင်ႈၵၢၼ်ၾၢႆႇႁႅင်းၵၢၼ် လူင်ပွင်ၸိုင်ႈမိူင်းထႆးလႄႈ လၢႆၾၢႆႇႁူမ်ႈၵၼ်လူင်းပိုၼ့်တီႈ ၵူတ်ႇထတ်းႁႅင်းၵၢၼ်ယၢၼ်မိူင်း ၸိူဝ်းဢွၵ်ႇၶွပ်ႇမၢႆမီႈ ဢၼ်လူင်ပွင်ၸိုင်ႈထႆးတမ်းဝၢင်းဝႆ့ ။

ဝၼ်းတီႈ 31/01/2019 ၸဝ်ႈၼႃႈတီႈပလိၵ်ႈ လူင်းပိုၼ့်တီႈၵူတ်ႇထတ်းႁႅင်းၵၢၼ်ယၢၼ်မိူင်း ၸိူဝ်းဢမ်ႇၶဝ်ႈၸွမ်းမၢႆမီႈ လူင်းထတ်းလၢႆလၢႆပိုၼ့်တီႈသေ ၸိူဝ်းၺႃးတီ့ၵေႃႈမီး ။ ၼႂ်းၼၼ့် ၸၢႆးဢွင်ႇမႅတ်ႈဢူး ဢႃယု 29 ပီ ၺႃးတၢင်းၽိတ်း ဢမ်ႇၼႄဝတ်းဝႂ်လႆႈ ၽွင်းၸဝ်ႈၼႃႈတီႈယွၼ်းတူၺ်း။

ၸၢႆးပိူင်းၸဝ်ႈၼႃႈတီႈ ၾၢႆႇမၢႆမီႈၵဝ့်ငဝ်ႈပူၵ်းပွင်သုၼ်ႇလႆႈၵူၼ်း HRDF လၢတ်ႈၼႄတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ပီႈၼွင့်ႁႅင်းၵၢၼ်ယၢၼ်မိူင်း ၸိူဝ်းဢၼ်ယူႇသဝ်းႁဵတ်းႁႃၵိၼ်လဵင့်တွင့်ၼႂ်းမိူင်းထႆးၼႆ့ ၼင်ႇႁိုဝ်တေဢမ်ႇၺႃး ၸဝ်ႈၼႃႈတီႈတီ့ၺွပ်းလႄႈ ၺႃးပိူၼ်ႈတဵၵ်းတဵင်လူလၢႆၼၼ့် ႁႂ်ႈဢွၼ်ၵၼ်ႁဵတ်းၸွမ်းပၵ်းပိူင်မၢႆမီႈ ဝၢၼ်ႈမိူင်းပိူၼ်ႈ၊ ၶတ်းၸႂ်ႁဵၼ်းႁူ့လွင်ႈပၵ်းပိူင်လႄႈ တိတ်းတၢမ်ထွမ်ႇၶၢဝ်ႇငၢဝ်းယူႇတႃႇသေႇ” ဝႃႈၼႆ။

တႄႇဢဝ်ႁူဝ်လိူၼ်ၵျႅၼ်ႊၼိဝ်ႊရီႊ 2019 ၼႆႉမႃး ၸဝ်ႈၼႃႈတီႈပလိၵ်ႈထႆး ၵူတ်ႇထတ်းတီ့ၺွပ်းႁႅင်းၵၢၼ် ၸိူဝ်းဢမ်ႇၸွမ်းမၢႆမီႈသေ သူင်ႇတူဝ်ႁႅင်းၵၢၼ်ပွၵ်ႈတၢင်းလႅၼ်လိၼ် တႆး-ထႆး (မႄႈသၢႆ – တႃႈၶီႈလဵၵ်း) တင်းမူတ်းမီးၵႂႃႇ 140 ၵေႃႉ။ ၸၢႆး 90 ၵေႃႉ၊ ယိင်း 46 ၵေႃႉလႄႈ လုၵ်ႈ ဢွၼ်ႇ 4 ၵေႃႉ ။ ပီ 2018 ပူၼ်ႉမႃးၼႆႉ ႁႅင်းၵၢၼ်ယၢၼ်မိူင်း ဢၼ်ထုၵ်ႇပလိၵ်ႈထႆး တီႉၺွပ်းသူင်ႇပွၵ်ႈလႅၼ်လိၼ်တႆး – ထႆး (တႃႈၶီႈ လဵၵ်း – မႄႈသၢႆ) မီး ႁူဝ်ၵူၼ်း မွၵ်ႈ 1,200 ၵေႃႉ ဝႃႈၼႆ။