ထဝ်ႈယိင်း ဢႃယု 60 ပၢႆ ၵူၼ်းဝၢၼ်ႈၵုင်းမူင်ႈ ၸႄႈဝဵင်းသီႇပေႃႉ ၼင်ႈထေႃႈလႃႈၵျီႈမႃးသေ တူၵ်းထေႃႈ လႆႈလူႉတၢႆ ထင်တီႈ တေႃႈလဵဝ် လႆႈဢဝ်တူဝ်တၢႆ မႃးဝႆႉတီႈႁူင်း ယႃသီႇပေႃႉ ဝႃႈၼႆ။
ဝၼ်းတီႈ 31/01/2019 ယၢမ်းၵၢင်ဝၼ်း 11:30 မူင်း ပႃႈၼၢင်းၵျႃႇဢူႉ ဢႃယု 66 ပီ တူၵ်းထေႃႈ တီႈတၢင်းၵူတ်ႉၸဝ်ႈမိူင်း ႁိမ်းဝၢၼ်ႈၼႃးၵၢင် ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ဢဝ်ၵွၵ်းႁူဝ်မၼ်းၼၢင်းတူၵ်း ႁူဝ်ၽတ်ႉသႂ်ႇၼိူဝ်တၢင်းသေ လႆႈလူႉတၢႆ ထင်တီႈၵမ်းလဵဝ် ဝႃႈၼႆ။
ၵူဝ်ႇမဵဝ်း ၸုမ်း(နယ်စည်းမခြားပရဟိတ) ၾၢႆႇၸွႆႈထႅမ် လွင်ႈမၢတ်ႇၸဵပ်းလူႉတၢႆ ၸႄႈဝဵင်းသီႇပေႃႉ လၢတ်ႈတီႈၽူႈတွႆႇ ႁွၵ်ႈဝႃႈ “ ၸႂ်ႈၶႃႈဢေႃႈ မၼ်း ၼၢင်းတူၵ်းထေႃႈသေ လူႉတၢႆထင်တီႈၵမ်းလဵဝ်၊ လႆႈငိၼ်းဝႃႈတႄႉ မၼ်းလႅပ်ႈၵႂင်သေ ဝႅၼ်တူၵ်းထေႃႈၼႆဝႃႇ၊ ႁဵတ်းၼၼ်သေ ဢဝ်ၵွၵ်းႁူဝ်မၼ်းၽတ်ႉတိူဝ်ႉသႂ်ႇၼိူဝ်တၢင်းသိူဝ်ႇယၢင်သေ လူႉတၢႆ။ ၼႂ်း ထေႃႈၼၼ်ႉၵေႃႈ မီးၵူၼ်းၶီႈၵႂႃႇၸွမ်းၵၼ်ၼမ်ယူႇ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၸုမ်းၸွႆႈထႅမ် (နယ်စည်းမခြားပရဟိတ) ၸႄႈဝဵင်းသီႇပေႃႉ လႆႈၵႂႃႇႁပ်ႉဢဝ်တူဝ်တၢႆ ပႃႈၵျႃႇ ဢူႉသေ ဢဝ်မႃးဝႆႉတီႈႁူင်းယႃသီႇပေႃႉဝႆႉ ဝႃႈၼႆ။
ၵူဝ်ႇမဵဝ်း သိုပ်ႇလၢတ်ႈဝႃႈ “ ၶၢပ်ႈတူဝ်တၢႆ ပႃႈၵျႃႇဢူႉတႄႉ လႆႈဢဝ်မႃးဝႆႉတီႈႁူင်းယႃသီႇပေႃႉယဝ်ႉၶႃႈ။ လႆႈႁူႉဝႃႈ ၶဝ် လုၵ်ႉတၢင်းဝဵင်းသေ တေပွၵ်ႈမိူဝ်း တီႈဝၢၼ်ႈၵုင်းမူင်ႈ” ဝႃႈၼႆ။
ပႃႈၼၢင်းၵျႃႇဢူႉၼႆႉ ပဵၼ်ၵူၼ်းဝၢၼ်ႈၵုင်းမူင်ႈ ဢိူင်ႇပၢင်ၼိဝ်ႉ ၸႄႈဝဵင်းသီႇပေႃႉ ဝႃႈၼႆ။