တပ်ႉသိုၵ်းလွတ်ႈလႅဝ်းၶၢင် KIA ႁူပ်ႉထူပ်း ၸုမ်းဢူၺ်းလီသိုၵ်းပွတ်းႁွင်ႇ ဝဵင်းမၢႆႇၵျႃႇယၢင်ႇ ၸႄႈမိူင်းၶၢင် ဝႃႈၼႆ။
ဝၼ်းတီႈ 29/01/2019 သိုၵ်းတဢၢင်းTNLA၊ သိုၵ်းၵူဝ်းၵၢင်ႉMNDAA လႄႈ သိုၵ်းရၶႅင်ႇ AA ႁူမ်ႈၵၼ် ၵႂႃႇႁူပ်ႉ ၸုမ်း သိုၵ်းၶၢင် KIO တီႈၸႄႈဝဵင်းမၢႆႇၵျႃႇယၢင်ႇ ၸႄႈမိူင်းၶၢင်။ ဢုပ်ႇဢူဝ်းႁူပ်ႉထူပ်းၵၼ် ၵဵဝ်ႇၵပ်းလူၺ်ႈလွင်ႈ တပ်ႉသိုၵ်း လွတ်ႈလႅဝ်းၶၢင် KIO လႄႈ ၶွမ်ႊမတီႊငမ်းယဵၼ်လႄႈ မႄးလီၶိုၼ်းၼႂ်းၸိူဝ်ႉၸၢတ်ႈ NRPC ႁူပ်ႉထူပ်း ၵၼ် မိူဝ်ႈဝၼ်း တီႈ 21 လိူၼ်ၵျႅၼ်ႊၼိဝ်ႊရီႊ ပူၼ်ႉမႃးၼႆႉ ဝႃႈၼႆ။
ၵႅမ်ၸွမ်ႁၢၼ် တႃႉၽူင်းၵျေႃႇ ၽူႈၼမ်းၼႂ်း ၵူႈလွင်ႈလွင်ႈ တပ်ႉသိုၵ်းတဢၢင်း TNLA လၢတ်ႈတီႈသိုဝ်ႇၶၢဝ်ႇ RFA ဝႃႈ “ လွင်ႈႁူပ်ႉထူပ်းၵၼ်ၼႆႉ ယူႇတီႈ KIO သပ်းလႅင်းၼႄ လွင်ႈဢၼ်ၶဝ်ၵႂႃႇႁူပ်ႉၵၼ်တင်း NRPC မိူဝ်ႈပူၼ်ႉမႃးၼၼ်ႉ ၵူၺ်း” ဝႃႈၼႆ။
ၵဵဝ်ႇၵပ်းလွင်ႈႁူပ်ႉထူပ်းၵၼ်တီႈၸႄႈဝဵင်းမၢႆႇၵျႃႇယၢင်ႇၼႆႉ ဢမ်ႇလႆႈႁၼ်သပ်းလႅင်းလၢႆးႁူဝ်ယွႆႈမၼ်းသင် ဝႃႈၼႆ။
လိူဝ်ၼၼ်ႉ ယူႇတီႈၸုမ်းဢူၺ်းလီ ပွတ်းႁွင်ႇ 3 ၸုမ်း TNLA၊ AA လႄႈ MNDAA ဢၼ်ၵႂႃႇႁူပ်ႉ KIA တီႈမၢႆႇၵျႃႇယၢင်ႇ ၼၼ်ႉ ပႆႇၸႂ်ႈတွၼ်ႈတႃႇတေၵႂႃႇလူင်းလၢႆးမိုဝ်းၵိုတ်းတိုၵ်း။ ယူႇတီႈ တင်း 3 ၸုမ်းတႄႉ တုၵ်းယွၼ်းႁႂ်ႈလႆႈၶဝ်ႈဢုပ်ႇ ဢူဝ်းပႃးၸွမ်း ၶၵ်ႉၵၢၼ်လွင်ႈငမ်းယဵၼ် ၸွမ်းၵၼ်သဵင်ႈသဵင်ႈ ဝႃႈၼႆ။
မိသ်သတိူဝ်ႊ သုၼ်ႊၵေႃႇသျႅင် တူဝ်တႅၼ်းၶိုၵ်ႉတွၼ်းၵုၼ်ဢေႊသျိူဝ်ႊ ၶွင်မိူင်းၶႄႇ ၶဝ်ႈပဵၼ်ၵၢင်သေ ငူပ်ႉငီႉပၼ် တွၼ်ႈတႃႈၶၵ်ႉၵၢၼ်လွင်ႈငမ်းယဵၼ်မိူင်းမၢၼ်ႈ မိူဝ်ႈၼႆႉ ဝၼ်းတီႈ 31 တေႁူပ်ႉၵၼ်တင်း ၸုမ်းဢူၺ်း လီ ပွတ်းႁွင်ႇ 3 ၸုမ်း သိုၵ်းတဢၢင်း၊ ၵူဝ်းၵၢင်ႉလႄႈ ရၶႅင်ႇ တီႈၸႄႈမိူင်းယုၼ်ၼၢၼ် မိူင်းၶႄႇ ဝႃႈၼႆ။
