မေႃႁွင့်ၵႂၢမ်း ၸၢႆးၸိူင်းႁၢၼ် ၶဝ်ႈၵူတ်ႇထတ်းပၢႆးယူႇလီ တီႈမိူင်းထႆးယဝ့်သေ ဝၢႆႇပွၵ်ႈၶိုၼ်းမိူင်းတႆးပွတ်းဢွၵ်ႇ။
ႁၢင်လိူၼ်ၵျႅၼ်ႊၼိဝ်ႊရီႊ 2019 မႃးၼႆ့ မေႃႁွင့်ၵႂၢမ်းတႆး ၸၢႆးၸိူင်းႁၢၼ် ၶဝ်ႈၵူတ်ႇထတ်းယူတ်းယႃတူဝ်တီႈ ႁူင်းယႃ Over brook ဝဵင်းၵဵင်းႁၢႆး ၸိုင်ႈထႆးပွတ်းၼိူဝ်သေ ၵူတ်ႇထတ်းထူပ်းႁၼ် တၢင်းပဵၼ်လိူတ်ႈၸိုမ်း ၼႂ်းဢွၵ်းဢေႃ ဝႃႈၼႆ။
ၸၢႆးၸိူင်းႁၢၼ် လၢတ်ႈဝႃႈ “ ၶႃႈႁဝ်းဢမ်ႇယူႇလီပွၵ်ႈၼႆ့ လႆႈႁၼ်ပီႈၼွင့်ႁဝ်းၶႃႈ ဢွၼ်ၵၼ်မႆႈၸႂ်သေ ပၼ်ႁႅင်းမႃးၼႆ့ ပဵၼ်ဢၼ်ၸူမ်းသိူဝ်းတႄ့တႄ့ ပေႃးဝႃႈၶႃႈႁဝ်းယူႇလီၵိၼ်ဝၢၼ်ၶႅၼ်းမႃးယဝ့်တႄ့ တေႁွင့်ဢွၵ်ႇၽဵင်းၵႂၢမ်း “ပွၵ်ႈၶိုၼ်း မႃးၸူးၵေႃ့ႁၵ့်ႁဝ်း” ဢၼ်ယိူင်းဢၢၼ်းတေၾၢၵ်ႇပၼ် ၽူႈႁၵ့်ပႅင်းၽဵင်းၵႂၢမ်းႁဝ်းၼၼ့်ၶႃႈဢေႃႈ” ဝႃႈၼႆ။
ၼၢင်းမွၼ်းၶမ်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ -“ လႆႈၶဝ်ႈၵူတ်ႇထတ်းတီႈႁူင်းယႃသေ မၼ်းၸၢႆးပဵၼ်တၢင်း ပဵၼ်လိူတ်ႈၸိုမ်း ၼႂ်းဢွၵ်းဢေႃ မေႃယႃၶဝ်ႁႂ်ႈလိူၵ်ႈ2လၢႆး 1.ၽႃႇတတ်း ပေႃးၽႃႇတတ်းၼႆ တႃႇ တေၶႅၼ်းၶိုၼ်း မီးႁူဝ်ပၢၵ်ႇ 30 % ၊ 2.ႁႂ်ႈၵိၼ်ယႃသေ ႁၵ့်သႃၵႂႃႇလွႆးလွႆး ၊ မၼ်းၸၢႆးၵေႃႈလိူၵ်ႈဢဝ်လၢႆးၵိၼ်ယႃသေ ႁၵ့်သႃၵႂႃႇလွႆးလွႆး ၼၼ့်ၶႃႈဢေႃႈ။ မိူဝ်ႈလဵဝ်မၼ်းၸၢႆးမႃးလိုဝ်ႈဝႆ့တီႈ ဝဵင်းတႃႈၶီႈလဵၵ်းၶႃႈ ပေႃးထႅင်ႈလိူၼ်ၼိုင်ႈတေလႆႈၶိုၼ်းၵႂႃႇႁႃမေႃ” ဝႃႈၼႆ။
ၸၢႆးၸိူင်းႁၢၼ်ၼႆ့ ၵိူတ်ႇမိူဝ်ႈဝၼ်းတီႈ 27/05/1975 ပဵၼ်လုၵ်ႈၸၢႆး လုင်းၸၢႆးသၢင်ႇၺုၼ့်လႄႈ ပႃႈၼၢင်းၸိင်ႇ ၺုၼ့် မီးပီႈၼွင့်ႁူမ်ႈတွင့်3 ၵေႃ့ ၸၢႆးၸိူင်းႁၢၼ်၊ ၼၢင်းမွၼ်းႁွမ်၊ ၸၢႆးၼေႃႇၶိူဝ်း။ ၵိူတ်ႇတီႈဝၢၼ်ႈၸၢတ်ႈ ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ။ တႄႇၶဝ်ႈဝူင်းၵၢၼ်ပၢႆးမွၼ်းမိူဝ်ႈ 1997 ႁွင့်ဢွၵ်ႇၽဵင်းၵႂၢမ်း 4 Albums မိူၼ်ၼင်ႇၵၢင်ၸႂ်ၶႃႈႁွင့်ၵႂၢမ်း၊ ႁွင့်ၵႂၢမ်းသူင်ႇထိုင်၊ သၢဝ်သၢမ်ၸဵင်ႇၶမ်း၊ ပေ့ၸႂ်ၵွပ်ႈ ၼမ့်ယၢတ်ႇ ၸိူဝ်း ၼႆ့ ဢၼ်ႁွင့်ၸွမ်း ပိူၼ်ႈၵေႃႈမီးယူႇဝႃႈၼႆ။
မိူဝ်ႈပီ2014 ၼၼ့် ၸၢႆးၸိူင်းႁၢၼ် မၢႆတူဝ်ၸဝ်ႈၵဝ်ႇဝႃႈ ပဵၼ်ၶုၼ်သၢမ်လေႃးၼႆသေ ၵႂႃႇယူႇတၢင်းဢိူင်ႇႁႃႈဝၢၼ်ႈ ၸႄႈဝဵင်းၵေးသီး ၵူၼ်းၼႂ်းပိုၼ့်တီႈၵမ်ႈၽွင်ႈယေႃးဝႃႈ ပဵၼ်ၸဝ်ႈမျၢတ်ႈသၢမ်လေႃးၼႆသေ ၵႂႃႇလူႇဝႆႈ – တႄႇၼၼ့်မႃး ၵၢၼ်ႁွင့်ၽဵင်းၵႂၢမ်းၵိုတ်းယင့်မႃးတေႃႇထိုင်ဝၼ်းမိူဝ်ႈၼႆ့။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ