RCSS/SSA တွပ်ႇၵႄႈၶိုၼ်း ဢမ်ႇယွမ်းႁပ်ႉ လွင်ႈသိုၵ်းလူင်ပွင်ၸိုင်ႈမၢၼ်ႈ တမ်းဝၢင်းၶဵတ်ႇသဵၼ်ႈတၢႆ ႁႂ်ႈဝႆႉဝၼ်းတီႈ 12/02/2019 လိုၼ်းသုတ်းသေၶၢႆႉထွၼ်ဢဵၼ်ႁႅင်းပွၵ်ႈယူႇတီႈလႆႈၸႂ်ၵၼ် ဢၼ်ဝႃႈၼၼ်ႉ ဢမ်ႇပဵၼ်လႆႈ ယွၼ်ႉသွင် ၾၢႆႇဢမ်ႇမီးလွင်ႈႁူမ်ႈမိုဝ်းၼႄၼမ်ႉၼႄတူဝ်ၸွမ်းၼင်ႇၶေႃႈတူၵ်းလူင်းမီး။
ဝၼ်းတီႈ 27-29/01/2019 ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၸတ်းႁဵတ်းပၢင်ၵုမ် ႁူဝ်ႁုပ်ႈပီ ပွၵ်ႈၵမ်း (19) တီႈငဝ်ႈၸိုင်ႈလွႆတႆးလႅင်း မီးၽူႈၶဝ်ႈႁူမ်ႈ ပၢင်ၵုမ် 215 ၵေႃႉ။ ထတ်းသၢင်ၼႃႈ ၵၢၼ်တႃငၢၼ်း ဢၼ်လႆႈတူင်ႉၼိုင်ႁဵတ်းသၢင်ႈမႃး ၼႂ်းပီ 2018 ၼၼ်ႉသေ တမ်းဝၢင်းၽႅၼ်ၵၢၼ် တၢင်း ၼႃႈၵႂႃႇသေ ႁူမ်ႈၵၼ် ဢွၵ်ႇ ၶေႃႈပိုၼ်ၽၢဝ်ႇ လွင်ႈဢမ်ႇယွမ်းႁပ်ႉလႆႈၶေႃႈပိုၼ်ၽၢဝ်ႇသိုၵ်းလူင်ပွင်ႈၸိုင်ႈမၢၼ်ႈ ဝႃႈၼႆ။
ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်းမၢႆ 2 ၶွင်ႇသီႇဢဝ်ၶိုၼ်းၸိုင်ႈတႆး RCSS/SSA လၢတ်ႈတီႈၽူႈတွႆႇႁွၵ်ႈဝႃႈ “ ၵဵဝ်ႇ ၵပ်းတပ်ႉမတေႃႇ (သိုၵ်း မၢၼ်ႈ) သႄႉၼႄးပၼ်ၾၢင်ႉၼၼ်ႉ ယူႇတီႈမုၵ်ႉၸုမ်းႁဝ်းၶႃႈ ဢမ်ႇယွမ်းႁပ်ႉလႆႈ၊ ႁဝ်းၶႃႈ သၢၼ်ၶတ်း။ ၵဵဝ်ႇၵပ်း ဢၼ် ၶဝ်လၢတ်ႈမႃး ၸွမ်းၼင်ႇၼႂ်းၶေႃႈပိုၼ်ၽၢဝ်ႇပၼ်ၾၢင်ႉၶဝ် မိူဝ်ႈဝၼ်းတီႈ 25 ၼၼ်ႉ တႃႇတေၶိုၼ်းတွပ်ႇၵႄႈ (တွပ်ႇ တူဝ်ႉ) ၶိုၼ်းၼၼ်ႉ ယူႇတီႈမုၵ်ႉၸုမ်းႁဝ်းၶႃႈၵေႃႈ တေဢွၵ်ႇၶေႃႈ သပ်းၸႅင်ႈထႅင်ႈ ၶေႃၶေႃ၊ လွင်ႈၼႆႉတႄႉ ႁဝ်းၶႃႈ တေဢွၵ်ႇ ၼႂ်းၶၢဝ်းတၢင်း 1-2 ဝၼ်းၼႆႉ မၼ်းတေပႃးႁူဝ်ယွႆႈ ႁူဝ်ယႅမ်းမၼ်း တွၼ်ႈ တႃႇတေၶိုၼ်းၵႄႈတွပ်ႇပၼ် ဢၼ် ၶဝ်လၢတ်ႈမႃးၼၼ်ႉ” ဝႃႈၼႆ။
RCSS တင်း သိုၵ်းလူင်ပွင်ၸိုင်ႈမၢၼ်ႈ ပွင်ႇၸႂ်ပႅၵ်ႇပိူင်ႈၵၼ်ဝႆႉ ၵေႃႉတၢင်းတၢင်း မိူဝ်ႈလႆႈၸႂ်ၵိုတ်းတိုၵ်း ၸၼ်ႉမိူင်း ႁူမ်ႈတုမ် တီႈၵဵင်းတုင် မိူဝ်ႈဝၼ်းတီႈ 19 လိူၼ်မေႊ 2012 ၼၼ်ႉ ဝႃႈၼႆ။
ၸဝ်ႈသိုၵ်းလူင် ၸၢႆးငိုၼ်း လၢတ်ႈဝႃႈ “ ၵဵဝ်ႇၵပ်းလိၵ်ႈႁူမ်ႈမၢႆတီႈၵဵင်းတုင်ၼၼ်ႉ ဢၼ်ႁဝ်းၶႃႈပွင်ႇလႄႈ တၢင်းတပ်ႉမ တေႃႇပွင်ႇၼၼ်ႉ မၼ်းပဵၼ်ၵေႃႉတၢင်းတၢင်း မၼ်းဢမ်ႇၶဝ်ႈၵၼ် ဢမ်ႇပွင်ႇၵၼ်၊ မိူၼ်ၼင်ႇ ၼႂ်းၶေႃႈပိုၼ်ၽၢဝ်ႇ ၼၼ်ႉ ၵေႃႈ တႅမ်ႈဝႆႉယူႇ မၼ်းတေပႃးဝႃႈ မၼ်းမီးလွင်ႈၶွင်ႉၶမ်ၸိုင်ႉႁိုဝ် မၼ်းတေလႆႈဢုပ်ႇၵၼ်။ ၵဵဝ်ႇၵပ်းၶေႃႈလႆႈၸႂ်ၵဵင်း တုင်ၼၼ်ႉ မၼ်းတေလႆႈဢုပ်ႇၵၼ် ငူပ်ႉငီႉၵၼ် လူင်ႉလူင်ႉလႅင်းလႅင်းၵွၼ်ႇ။ တေႃႈလဵဝ် တၢင်းၾၢႆႇႁဝ်းတႄႉ တေယူႇ ဝႆႉပၵ်းၵဝ်ႇ ပိူင်ၵဝ်ႇၵူၺ်း” ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ တႃႇၽေႃႇၼမ်ႉၽေႃႇတူဝ် ၶေႃႈလႆႈၸႂ်ၵိုတ်းတိုၵ်း ၸၼ်ႉမိူင်းႁူမ်ႈတုမ် တီႈၵဵင်း တုင် မိူဝ်ႈဝၼ်းတီႈ 19 လိူၼ်မေႊ 2012 ၼၼ်ႉ ပဵၼ်လွင်ႈၵိတ်ႇၶွင်ႈ ၶွင်ႉၶမ်ၵၼ်ယႂ်ႇလူင်ဝႆႉ မိူၼ်ၼင်ႇ လွင်ႈပိုတ်ႇတီႈ ပွင်ႇ ၼိူဝ်ၼႃႈလိၼ်ငဝ်ႈၸိုင်ႈၼၼ်ႉ လွင်ႈပွင်ႇၸႂ် ၼႂ်းၵႄႈၶွင်ႇသီႇဢဝ်ၶိုၼ်းၸိုင်ႈတႆး (RCSS) လႄႈ တပ်ႉမတေႃႇ ပႅၵ်ႇ ပိူင်ႈၵၼ်။ တႃႇဢဝ်ႁူမ်ႇလူမ်ႈ ပိုၼ်ႉတီႈမိူင်းထႃးၼၼ်ႉ လႆႈမၵ်းမၼ်ႈဝႆႉ ႁႅင်းသိုၵ်း 60 ၵေႃႉၵူၺ်း တႃႇ RCSS ယူႇတင်း မူတ်းဢမ်ႇပဵၼ်လႆႈ ဝႃႈၼႆ။
ဝၼ်းတီႈ 25/01/2019 သိုၵ်းလူင်ပွင်ၸိုင်ႈမၢၼ်ႈ ဢွၵ်ႇၶေႃႈပိုၼ်ၽၢဝ်ႇပၼ်ၾၢင်ႉ ႁႂ်ႈ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း တင်းသဵင်ႈၸိူဝ်းပူၼ်ႉပႅၼ်တူင်ႉၼိုင် ၸိူဝ်းၼၼ်ႉ ႁႂ်ႈထွႆထွၼ်ပွၵ်ႈၶိုၼ်းတီႈယူႇၽႂ်မၼ်း 12/02/2019 ႁႂ်ႈယဝ်ႉတူဝ်ႈ တႃႇၵေႃႇသၢင်ႈလွင်ႈငမ်းယဵၼ်လႄႈ ၵၢၼ်ၵိုတ်းသိုၵ်း ဝႃႈၼႆ။
ၼႂ်းၶေႃႈပိုၼ်ၽၢဝ်ႇၼၼ်ႉ ယူႇတီႈသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇဝႃႈ တပ်ႉသိုၵ်းၸိုင်ႈတႆး RCSS/SSA ပူၼ်ႉပႅၼ် ၼမ်လိူဝ်တီႈသုတ်း ၼႂ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼႂ်းမိူင်းႁူမ်ႈတုမ်ပတ်းပိုၼ်ႉတူဝ်ႈမိူင်း ဝႃႈၼႆ။
