RCSS တင်း SSPP ယိုဝ်းၵၼ်လႄႈ လုၵ်ႈႁဵၼ်းၸိူဝ်းပၢႆႈၽေးသိုၵ်း မႃးသွၼ်ႈဝႆႉ တီႈဝတ်ႉၼႃးမၢၵ်ႇၶေႃ ၸႄႈဝဵင်းသီႇ ပေႃႉၼၼ်ႉ ႁူဝ်ၵူၼ်း 130 ပၢႆ ႁူပ်ႉ လွင်ႈယၢပ်ႇ တႃႇတွပ်ႇလိၵ်ႈၼႂ်းႁူင်းႁဵၼ်းလူင်ပွင်ၸိုင်ႈ။
ႁူဝ်လိူၼ်ၾႅပ်ႊၿိဝ်ႊရီႊ 2019 တေမႃးၼႆႉ ယူႇတီႈႁွင်ႈၵၢၼ်ပၢႆးပၺ်ၺႃ မိူင်းႁူမ်ႈတုမ်ပတ်းပိုၼ်ႉတူဝ်ႈမိူင်း တေၸတ်း ႁဵတ်းပၢင်တွပ်ႇလိၵ်ႈ ၼႂ်းႁူင်းႁဵၼ်းလူင်ပွင်ၸိုင်ႈၼႆလႄႈ လုၵ်ႈႁဵၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈဝတ်ႉၼႃး မၢၵ်ႇၶေႃ ဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ တေႃႈလဵဝ် ႁူပ်ႉလွင်ႈယၢပ်ႇတႃႇတွပ်ႇလိၵ်ႈ ဝႃႈၼႆ။
ၾၢႆႇၸွႆႈထႅမ်ၵူၼ်းပၢႆႈၽေးသိုၵ်း တီႈဝတ်ႉၼႃးမၢၵ်ႇၶေႃ လၢတ်ႈတီႈၽူႈတွႆႇႁွၵ်ႈဝႃႈ “ လုၵ်ႈဢွၼ်ႇတီႈၼႃးမၢၵ်ႇ ၶေႃႁဝ်း ၶႃႈတႄႉ ၵမ်ႉၶိုၼ်ႈၵမ်ႉလူင်း မၢင်ပွၵ်ႈမီး 130 ပၢႆ၊ မၢင်ပွၵ်ႈမီး 120 ပၢႆႁဵတ်းၼၼ်။ ၵွပ်ႈပိူဝ်ႈဝႃႈ လုၵ်ႈဢွၼ်ႇႁဵၼ်း မၢင် ၵေႃႉၼႆႉ ပေႃးဢူႈမႄႈၶဝ် ပွၵ်ႈမိူဝ်းၸႂ်းႁိူၼ်းၼႆ သမ်ႉဢမ်ႇယူႇၵိုတ်းသေ မိူဝ်းၸွမ်းပေႃႈမႄႈၶဝ်ႁဵတ်းၼၼ်ၵေႃႈမီး။ ပၢင် တွပ်ႇလိၵ်ႈတႄႉ တေတွပ်ႇၼႂ်းႁူဝ်လိူၼ်ၼႃႈၼႆဝႃႇ။ တေတွပ်ႇတီႈဝတ်ႉၼႃးမၢၵ်ႇၶေႃၼႆႉၵူၺ်းၶႃႈ။ ပေႃးၵႂႃႇတွပ်ႇတီႈ ႁူင်းႁဵၼ်း ၼႃးမၢၵ်ႇၶေႃသမ်ႉ တီႈၼၼ်ႈၵေႃႈ လုၵ်ႈႁဵၼ်းမီး 250 ပၢႆ၊ ဢွင်ႈမၼ်းသမ်ႉၵႅပ်ႈ” ဝႃႈၼႆ။
လုၵ်ႈႁဵၼ်း 130 ပၢႆ ဢၼ်မႃးသွၼ်ႈဝႆႉတီႈ ဝတ်ႉၼႃးမၢၵ်ႇၶေႃ ၸႄႈဝဵင်းသီႇပေႃႉသမ်ႉ ပဵၼ်လုၵ်ႈႁဵၼ်း ဝၢၼ်ႈႁူမ်ႈ၊ ဝၢၼ်ႈႁူဝ်ၼႃး၊ ဝၢၼ်ႈတူၼ်ႈၵႅင်း၊ ဝၢၼ်ႈၼႂ်းလူင်လႄႈ ဝၢၼ်ႈတႃႈလူင် ၸဵမ်ၸိူဝ်းၼႆႉ။
ၵူၼ်းပၢႆႈၽေးသိုၵ်း တီႈၼႃးမၢၵ်ႇၶေႃ လၢတ်ႈတီႈၽူႈတွႆႇႁွၵ်ႈဝႃႈ “ ၶူးသွၼ်ၶဝ် လူင်းမႃးပူင်သွၼ်ပၼ်လိၵ်ႈ လုၵ်ႈႁဵၼ်း ႁဝ်းၶႃႈ တီႈၼႃးမၢၵ်ႇၶေႃၼႆႉၵူႈဝၼ်းယူႇၶႃႈ။ တႄႇဢဝ် ဝၼ်းတီႈ 07/01/2019 ၼၼ်ႉသေ ယူႇတီႈၽူႈတႅၼ်းသၽႃး ပႃႇတီႇႁူဝ်သိူဝ် တၢင်ႇလိၵ်ႈထိုင် ႁွင်ႈၵၢၼ်ပၢႆးပၺ်ၺႃသေ ယူႇတီႈႁွင်ႈၵၢၼ်ပၢႆးပၺ်ၺႃတီႈဝဵင်းသီႇပေႃႉ သူင်ႇၶူးသွၼ် လူင်းပူင်သွၼ်ပၼ်မႃး” ဝႃႈၼႆ။
မိူဝ်ႈဝၼ်းတီႈ 28/01/2019 ၼၼ်ႉ ႁူင်းႁဵၼ်းလူင်ပွင်ၸိုင်ႈ ဢၼ်မီးဝႆႉတီႈၼႂ်းဢိူင်ႇၵုင်းသေႃႉ ႁူင်းႁဵၼ်းၸၼ်ႉငဝ်ႈ (အမက-ကုန်းဆော့ကျောင်း) လႄႈ တီႈႁူင်းႁဵၼ်းၸၼ်ႉငဝ်ႈ (အမက) ဝၢၼ်ႈၶၢႆးႁဵဝ်း 2 လင် ဢၼ်လႆႈၵိုတ်းယင်ႉၵႂႃႇ ၸူဝ်ႈၶၢဝ်းၼၼ်ႉ ၶိုၼ်းပိုတ်ႇပူင်သွၼ်ပၼ်လုၵ်ႈႁဵၼ်းၵႂႃႇၶိုၼ်းယဝ်ႉ ဝႃႈၼႆ။
သဵၼ်ႈသၢႆမၢႆ ႁူဝ်ၵူၼ်းပၢႆႈၽေးသိုၵ်း မိူဝ်ႈဝၼ်းတီႈ 28/01/2019 ၼၼ်ႉ ဢၼ်မႃးသွၼ်ႈဝႆႉတီႈ ဝတ်ႉၼႃးမၢၵ်ႇၶေႃၼႆႉ တေႃႈလဵဝ် မီးႁူဝ်ၵူၼ်း 581ၵေႃႉ ပဵၼ်ၵူၼ်းဝၢၼ်ႈ ၼႂ်းလူင်၊ တူၼ်ႈၵႅင်း၊ ႁူဝ်ၼႃး၊ ဝၢၼ်ႈႁူမ်ႈ၊ တႃႈလူင်လႄႈ ဝၢၼ်ႈ ၵဵတ်းၽူၼ် ၸဵမ်ၸိူဝ်းၼႆႉ။
လိူဝ်ၼၼ်ႉ ဢၼ်ၵူၼ်းပၢႆႈၽေးသိုၵ်းၵႂႃႇသွၼ်ႈဝႆႉတင်း ႁူင်းႁေႃတူၼ်ႈၵႃႈသမ်ႉ ပဵၼ်ၵူၼ်းဝၢၼ်ႈတူၼ်ႈၵႅင်းလႄႈ ၶၢႆးႁဵဝ်း ႁူဝ်ၵူၼ်းမီး 19 ၵေႃႉ။ တီႈၵျွင်းၶရိတ်ႊယၼ်ႇ လီသူး ၵူၼ်းဝၢၼ်ႈလွႆမွၵ်ႇလႄႈ သၢႆးၶၢဝ် ႁူဝ်ၵူၼ်း 98 ၵေႃႉ။ တီႈဝတ်ႉၼႃးၵၢင် ပဵၼ်ၵူၼ်းဝၢၼ်ႈလူင်ဝၢႆ ႁူဝ်ၵူၼ်း 137 ၵေႃႉ တင်းမူတ်း ႁူဝ်ၵူၼ်းႁူမ်ႈၵၼ် 835 ၵေႃႉ ဝႃႈၼႆ။
တႄႇဢဝ် ႁူဝ်လိူၼ်ၵျႅၼ်ႊၼိဝ်ႊရီႊ 2019 ၼႆႉမႃး သိုၵ်း SSPP တင်း RCSS ပဵၼ်ပၼ်ႁႃ လွင်ႈၼႃႈတီႈၵၼ်သေ ၵူၼ်းမိူင်းၼႂ်းၸႄႈဝဵင်းသီႇပေႃႉ လႆႈဢွၼ်ၵၼ်ပၢႆႈဢွၵ်ႇမႃးသွၼ်ႈၸွမ်းဝတ်ႉဝႃးၽႃသိူဝ်ႇသေ ပႆႇၸၢင်ႈပွၵ်ႈ ႁိူၼ်းယေး ၽႂ်မၼ်း မီးၶၢဝ်းတၢင်းႁိမ်းလိူၼ်ယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ