ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် မၢႆ 27 လွႆလႅမ် ၵူတ်ႇထတ်း တီႉလႆႈယႃႈမႃႉ မိၵ်ႈမၢႆ WY လႄႈ R တင်းၼမ် 2.1 လၢၼ်ႉမဵတ်ႉ ၼိူဝ်သဵၼ်ႈတၢင်းၶူဝ်လမ် – ၼမ်ႉၸၢင်။
ဝၼ်းတီႈ 26/01/2019 ယၢမ်းဝၢႆးဝၼ်း မွၵ်ႈ 4 မူင်းၼၼ်ႉ ပလိၵ်ႈၵူတ်ႇထတ်းတီႉလႆႈ ယႃႈမဝ်းၵမ် သႂ်ႇမႃးၼႂ်းၵႃး 6 လေႃႉ ဢၼ်လုၵ်ႉတၢင်းၶူဝ်လမ် မုင်ႈၼႃႈၸူးၼမ်ႉၸၢင် တီႈတၢင်းၼႃႈဝတ်ႉ သဵၼ်ႈတၢင်းၶူဝ်လမ် – ၼမ်ႉၸၢင် ၸႄႈ ဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။
သိုဝ်ႇၶၢဝ်ႇ Kanbawzatai ဢွၵ်ႇဝႆႉဝႃႈ “ၼႂ်းၵႃးၼၼ်ႉ သႂ်ႇဝႆႉယႃႈမႃႉ မိၵ်ႈ WY လႄႈ R ႁဵတ်းပဵၼ်ထူင် သႂ်ႇထူင်မႃး 200 ထူင်၊ 1 ထူင်လႂ် 10,000 မဵတ်ႉ ႁူမ်ႈၵၼ်တင်းမူတ်း 21 သႅၼ်မဵတ်ႉ။ တီႉလႆႈပႃးၵူၼ်းႁေႃႈလႄႈ ၵူၼ်းမႃးၸွမ်း၊ မိူၼ် ၼင်ႇ ထုၼ်းထုၼ်းမွင်ႇ၊ ၵျေႃႇငဵင်းသူၺ်ႇ၊ ပၢႆႇပၢႆႇၵျေႃႇလႄႈ သေႃးဢၢႆႇဢူး ၸိူဝ်းၼႆႉ” ဝႃႈၼႆ။
ဝၼ်းတီႈ 26/01/2019 ယၢမ်းၵၢင်ၶိုၼ်း မွၵ်ႈ 10:45 မူင်းၼၼ်ႉၵေႃႈ ၾၢႆႇတပ်ႉပလိၵ်ႈၵူတ်ႇထတ်းတီႉ လႆႈယႃႈမႃႉ သႂ်ႇ ၼႂ်းထူင်ၸၢၼ်ႈ(ပီနံအိတ် ၃ အိတ်) ဢၼ်လေႃးသႂ်ႇ ၸွမ်းၼဵင်ႈႁႅင်ႈၼၼ်ႉ တင်းမူတ်း 3 ထူင် ၵူတ်ႇထတ်းတီႉလႆႈ ၼႂ်းၵႃးလမ်းၼိုင်ႈ တီႈသဵၼ်ႈတၢင်းဢၼ်လတ်းၵႂႃႇတၢင်း ႁူင်းပလိၵ်ႈ (ကျောက်ချောစစ်ဆေး ရေးစခန်း) ၸႄႈဝဵင်းပ တဵင်ႇ တိူင်းတႃႈလိူဝ်ႇ တင်းမူတ်း ယႃႈမႃႉတီႉလႆႈ 1 သႅၼ်မဵတ်ႉ ဝႃႈၼႆ။
သိုဝ်ႇMizzima ဢွၵ်ႇဝႆႉဝႃႈ “ၼႂ်းၵႃးၼၼ်ႉ တီႉလႆႈၵူၼ်းႁေႃႈလႄႈ ၵူၼ်းမႃးၸွမ်း မိူၼ်ၼင်ႇ ၸၢႆးထုၼ်းဢူး ဢႃယု 19 ပီ၊ ၼၢင်းလူႇၸိင်ႇ ဢႃယု 23 ပီ၊ ၼၢင်းၸၢမ်ၸိင်ႇ 19 ပီ၊ ၼၢင်းသႅင်သူၺ်ႇ ဢႃယု 21 ပီ၊ ၸၢႆးသူၺ်ႇႁၢၼ်ႇ ဢႃယု 30 ပီ လႄႈ ၸၢႆးသူၺ်ႇဢူး ဢႃယု 27 ပီ ၶဝ်ၸိူဝ်းၼႆႉ ပဵၼ်ၵူၼ်းမိူင်းသူႈ”ဝႃႈၼႆ။
ICG ပိုၼ်ၽၢဝ်ႇမိူဝ်ႈဝၼ်းတီႈ 09/01/2019 ၼၼ်ႉဝႃႈ ယႃႈမဝ်းၵမ်သုမ်ႇငမ်းၼိူဝ်ၸိုင်ႈတႆး၊ ယႃႈမဝ်းၵမ်၊ ယႃႈၾိၼ်ႇ၊ ၶၢဝ်ႇယႃႈမႃႉ ၵမ်ႈပႃႈၼမ်ပဵၼ်ၸုမ်းပျီႇတူႉၸိတ်ႉတင်း ၸုမ်းတပ်ႉပႂ်ႉလႅၼ်လိၼ်ၶဝ်ႁဵတ်းဢွၵ်ႇၵႃႉ-ၶၢႆ ဝႃႈၼႆဝႆႉ။
