ၸႄႈမိူင်းယၢင်းလႅင် ဝဵင်းလွႆၶေႃ/လွႆၵေႃႇ ၸတ်းပၢင်ၶႅင်ႇ တႅမ်ႈၶႂၢၵ်ႈၼမ်ႉၵႂၢမ်းတႆး သင်ၶၸဝ်ႈ 45 တူၼ် ၶဝ်ႈၶႅင်ႇ။

ဝၼ်းတီႈ 26/01/2019 ယၢမ်းၵၢင်ၼႂ် 8:00 မူင်း ထိုင် 10:30 မူင်း သင်ၶၸဝ်ႈလႄႈ လၢႆးၵၢၼ်တႆးၶုၵ်းၶူၼ်ႉၶေႃႈၶိုၵ်ႉ တႆးၵေႃႉလီ ႁူမ်ႈၵၼ်သေ ဢွၼ်ၸတ်းႁဵတ်းပၢင်ၶႅင်ႇ တႅမ်ႈၶႂၢၵ်ႈၼမ်ႉၵႂၢမ်း ပွၵ်ႈၵမ်း 3 ၊ တီႈတိူၵ်ႈသွၼ်လိၵ်ႈ ဝတ်ႉပုပ်ႉပႃႇရူင်ႇ ဝဵင်းလွႆၵေႃႇ/ လွႆၶေႃ ႁိမ်းၽရထၢတ်ႈလွႆၽႃတႅၵ်ႇ ၸႄႈမိူင်းယၢင်းလႅင် ဝႃႈၼႆ။

ၸၢႆးလၢဝ်လႅင်း ၽူႈပွင်ၵၢၼ် တူင်ႉၼိုင် ၼႂ်းပၢင်ၶႅင်ႇ တႅမ်ႈၶႂၢၵ်ႈၼမ်ႉၵႂၢမ်း ပွၵ်ႈၵမ်း 3 လၢတ်ႈတီႈၽူႈတွႆႇႁွၵ်ႈဝႃႈ “ႁဝ်းၶႃႈ ၸတ်းႁဵတ်းမႃး မီးၶၢဝ်းတၢင်း 3 ပီယဝ်ႉ။ ပၢင်ၶႅင်ႇတႅမ်ႈၶႂၢၵ်ႈၼမ်ႉၵႂၢမ်းၼႆႉ ၸဝ်ႈတူၼ်ၶူးသုၶမ်း ႁဝ်းၶႃႈ ဢွၼ်တႄႇမႃး။ ယိူင်းဢၢၼ်းတႄႉ ဢမ်ႇၶႂ်ႈႁႂ်ႈသင်ၶၸဝ်ႈၶဝ် ဢၢၼ်ႇလိပ်းဢၢၼ်ႇတၢႆလၢႆးဢူမ်သူပ်းသေ ႁဵၼ်းဢဝ် လိၵ်ႈ၊ ႁႂ်ႈမေႃႁဵၼ်းႁူႉ၊ ႁႂ်ႈမေႃၶႂၢၵ်ႈတႅမ်ႈၼမ်ႉၵႂၢမ်းၼႆသေ ၸင်ႇလိူၵ်ႈႁႃၽူႈၵတ်ႉၶႅၼ်ႇမႃး” ဝႃႈၼႆ။

သိုပ်ႇလၢတ်ႈ “ သင်ႁဝ်းၶႃႈ လိူၵ်ႈႁၼ်ၽူႈၵတ်ႉၶႅၼ်ႇယဝ်ႉၵေႃႈ တေမီးၸဝ်ႈတႃႇၼလူင် ၵမ်ႉၸွႆႈ တွၼ်ႈတႃႇၼႂ်းၵၢၼ် ႁဵၼ်းၶဝ်ၸဝ်ႈ သိုပ်ႇၵႂႃႇထႅင်ႈတၢင်းၼႃႈ။ ပၢင်ၶႂၢၵ်ႈတႅမ်ႈၼမ်ႉၵႂၢမ်းၼႆႉ မၼ်းဢမ်ႇမီးပၢင် သွၼ် ယူႇတီႈၵေႃႉလႂ် ၵေႃႉ ၼၼ်ႉသေ ၶတ်းၸႂ် ၵႆႉလဵပ်ႈႁဵၼ်း မိူၼ်ၼင်ႇ ၼႂ်းတူင်ႇဝူင်း၊ ၼႂ်းလိၵ်ႈလၢႆး လူလိၵ်ႈၼမ် ၼမ်၊ လဵပ်ႈႁဵၼ်းလၢႆၸိူဝ်ႉလၢႆ ပိူင်သေ ပေႃးဝႃႈႁၼ်ႁူဝ်ၶေႃႈဢၼ်ၼိုင်ႈၼႆၵေႃႈ ႁႂ်ႈမေႃၶႂၢၵ်ႈတႅမ်ႈဢွၵ်ႇမႃး မၼ်းဢမ်ႇ လူဝ်ႇလႆႈဢူမ်ဢၢၼ်ႇ (ဢၢၼ်ႇ တၢႆတူဝ်) မိူၼ်ၼႂ်းႁူင်းႁဵၼ်း၊ ယဝ်ႉၵေႃႈ မိူဝ်ႈၵူတ်ႇထတ်းၼၼ်ႉ တေတူၺ်း မိူၼ်ၼင်ႇ လၢႆးဝႆႉ ဝၢင်းတူဝ်လိၵ်ႈ၊ လၢႆးဝႆႉ ဝၢင်း ၼမ်ႉၵႂၢမ်း ၶႅမ်ႉၸိူင်ႉႁိုဝ် ၸဵမ်ၸိူဝ်းၼႆႉ” ဝႃႈၼႆ။

ၼႂ်းပၢင်ၶႅင်ႇ တႅမ်ႈၶႂၢၵ်ႈၼမ်ႉၵႂၢမ်း ပွၵ်ႈၵမ်း 3 ၼႆႉ ၽူႈၵတ်ႉၶႅၼ်ႇဢၼ်လႆႈသူးရၢင်းဝလ်းတီႈၼိုင်ႈသမ်ႉ ပဵၼ် ၸဝ်ႈ သၢင်ႇၶေႇမိၼ်ႇတ မိူင်းၼွင်၊ တီႈသွင် ၸဝ်ႈသၢင်ႇၵေႃးလိၼ်ႇတ မိူင်းသူႈလႄႈ တီႈသၢမ်သမ်ႉ ၸဝ်ႈသၢင်ႇ ပၺ်ၺႃ ၽေႃးၵ လၢင်းၶိူဝ်း ၸိူဝ်းၼႆႉ။ ၼႂ်းပၢင်တႅမ်ႈၶႂၢၵ်ႈၼမ်ႉၵႂၢမ်းပွၵ်ႈၵမ်းၼႆႉ ၵမ်ႈၼမ် ၸဝ်ႈသၢင်ႇ ဢႃယု 18 ပီ လူင်းတႂ်ႈ ဝႃႈၼႆ။

ပၢင်ၶႅင်ႇ တႅမ်ႈၶႂၢၵ်ႈၼမ်ႉၵႂၢမ်းၼႆႉ ပွၵ်ႈၵမ်း 1 ၸတ်းႁဵတ်းတီႈ ဝတ်ႉၵျွင်းပၢင်ႇ ဝဵင်းလၢႆးၶႃႈ၊ ပွၵ်ႈၵမ်း 2 သမ်ႉ ဝတ်ႉပိ တၵၢတ်ႈ ဝဵင်းပၢင်လူင်လႄႈ ပွၵ်ႈၵမ်း 3 သမ်ႉ တီႈဝတ်ႉပုပ်ႉပႃႇရူင်ႇ ဝဵင်းလွႆၶေႃ/ လွႆၵေႃႇ ၸႄႈမိူင်းယၢင်းလႅင် ဝႃႈၼႆ။