ဝၼ်းတီႈ 29/01/2019 ယၢမ်းဝၢႆးဝၼ်း 2 မူင်းပၢႆ လုင်းဢႃးၽႃႇ ၵူၼ်းၵဝ်ႇ MTA ၸဝ်ႈၶွင်ပမ်ႉၼမ်ႉမၼ်း တပိၼ်ႇသူၺ်ႇထီး ၺႃးယိုဝ်းတၢႆထင်တီႈ ႁိမ်းၵၢတ်ႇဢႃးၶႃႇ ၼႂ်းၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ဝႃႈၼႆ။
ၵူၼ်းၶၢႆၶူဝ်း ဢၼ်ႁၼ်သိုဝ်ႈၼႃႈတၼ်းတႃ လၢတ်ႈတီႈၽူႈတွႆႇႁွၵ်ႈဝႃႈ “ ဢူးဢႃးၽႃႇၼႆႉ ၺႃးယိုဝ်းတီႈၵွၵ်းႁူဝ် မၼ်းၸၢႆး 5 ၵမ်း လႆႈတၢႆထင်တီႈၵမ်းလဵဝ်ၶႃႈယဝ်ႉ။ ဢွင်ႈတီႈမၼ်းပဵၼ်တႄႉ ႁိမ်းၵၢတ်ႇဢႃးၶႃႇ တီႈယႅၵ်ႈၾႆးလႅင် ၼၼ်ႉယဝ်ႉ။ မၼ်းၸၢႆး လုၵ်ႉတၢင်းၼႂ်းဝဵင်း သေမႃး မိူဝ်ႈၽွင်း မႃးၵိုတ်းတီႈ ယႅၵ်ႈၾႆးလႅင်ၼၼ်ႉ မီးၵူၼ်းႁၢႆႉ 2 ၵေႃႉ ၶီႇရူတ်ႉၶိူင်ႈမႃးၸွမ်းသေ ဢဝ်ၵွင်ႈယိုဝ်းသႂ်ႇမၼ်းၸၢႆးၵမ်းလဵဝ် တီႈယႅၵ်ႈၾႆးလႅင် ႁိမ်းၵၢတ်ႇဢႃးၶႃႇၼၼ်ႉ။ ၵူၼ်းႁၢႆႉၼၼ်ႉတႄႉ ယိုဝ်းယဝ်ႉၵေႃႈ ႁေႃႈရူတ်ႉၶိူင်ႈ ပၢႆႈလႅၼ်ႈၶဝ်ႈၵႂႃႇတၢင်းၼႂ်းဝဵင်းၵမ်းလဵဝ်” ဝႃႈၼႆ။
လုင်းဢႃးၽႃႇၼႆႉ ပဵၼ်ၵူၼ်းသိုၵ်း ပၢၼ် MTA သေ တေႃႈလဵဝ် ယူႇဝႆႉတီႈဝၢၼ်ႈၻွၼ်းၸႆး ပွၵ်ႉပႃႇသၵ်း ၸႄႈဝဵင်း တႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း ဝႃႈၼႆ။
တေႃႈလဵဝ် ယူႇတီႈၽူႈမီးပုၼ်ႈၽွၼ်းပလိၵ်ႈၸႄႈဝဵင်းတႃႈၶီႈလဵၵ်း တိုၵ်ႉၵူတ်ႇထတ်း လိူင်ႈလၢဝ်းမၼ်းဝႆႉယူႇ ဝႃႈၼႆ။
ဝဵင်းတႃႈၶီႈလဵၵ်းၼႆႉ ပဵၼ်ဝဵင်းလႅၼ်လိၼ်ၵူၼ်းယိပ်းၵွင်ႈၵၢင်ႇၼမ်၊ ၸုမ်းမီးၵွင်ႈၼမ် မီးပၼ်ႁႃယိုဝ်းၵၼ် မိူဝ်ႈလႂ်ၵေႃႈ ဢမ်ႇသူႈလႆႈႁၼ်ၸဝ်ႈၼႃႈတီႈၾၢႆႇလူင်ပွင်ၸိုင်ႈတီႉၺွပ်းလႆႈသေပွၵ်ႈ။