ၸၢႆးထုၼ်းၺၢၼ်ႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းၵျွၵ်ႉမႄး ရူတ်ႉၵႃးပဵၼ်ၽေးၵိုင်ႉၵၢင်ႉ ၸွမ်းတၢင်းၽွင်းလုၵ်ႉၵျွၵ်ႉမႄးမႃးတေၵႂႃႇၶဝ်ႈပၢင်ၵုမ်တီႈတူၼ်ႈတီး။
မိူဝ်ႈၼႆႉ ဝၼ်းတီႈ 28/01/2019 ယၢမ်းၵၢင်ၼႂ် ၸၢႆးထုၼ်းၺၢၼ်ႇ ၽူႈတႅၼ်းႁူဝ်သိူဝ်ၵျွၵ်ႉမႄး လုၵ်ႉၵျွၵ်ႉမႄး မႃးတူၼ်ႈ တီး တႃႇၶိုၼ်ႈပၢင်ၵုမ် မႃးပဵၼ်ၽေးၵိုင်ႉၵၢင်ႉၸွမ်းတၢင်း တီႈၼႂ်းၵႄႈလွၵ်ႉၸွၵ်ႇ တင်း ဢၢင်ႇတေႃး ၸိုင်ႈတႆး ပွတ်း ၸၢၼ်း ဝႃႈၼႆ။
ၸဝ်ႈၶမ်းပိူင်ႇၾႃႉ ၵႅမ်ႁူဝ်ပဝ်ႈငဝ်ႈငုၼ်း ပႃႇတီႇႁူဝ်သိူဝ် SNLD လၢတ်ႈတီႈၽူႈတွႆႇႁွၵ်ႈဝႃႈ “ မၼ်းလုၵ်ႉတီႈၵျွၵ်ႉမႄး သေ တေမႃးၶိုၼ်ႈပၢင်ၵုမ်ၶွမ်ႊမတီႊပိူင်ယုၵ်းယၢင်ႇ တီႈတူၼ်ႈတီး၊ မႃးပဵၼ်ၽေးၵိုင်ႉၵၢင်ႉ ၼႂ်းၵႄႈလွၵ်ႉၸွၵ်ႇ တင်း ဢၢင်ႇတေႃး။ ဢမ်ႇၸႂ်ႈၽႃႇၺႃးတင်းၽႂ်၊ ၵႃးမၼ်းပဵၼ်ႁင်းၵူၺ်း။ ၵူၼ်းတႄႉဢမ်ႇပဵၼ်သင်၊ လႆႈမၢတ်ႇၸဵပ်းတီႈၼႃႈ ၽၢၵ်ႇဢိတ်းဢွတ်းၵူၺ်း။ ၵႃးၵေႃႈဢမ်ႇပဵၼ်သင် မၢၼ်ႇတၢင်းၼႃႈမၼ်းၼၼ်ႉၵူၺ်း ၵွႆၵႂႃႇဢိတ်းဢွတ်း” ဝႃႈၼႆ။
ၵဵဝ်ႇၵပ်းလူၺ်ႈလွင်ႈၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ ၶတ်းၸႂ်ၵပ်းသိုပ်ႇ ၸၢႆးထုၼ်းၺၢၼ်ႇယူႇ ၵူၺ်းၵႃႈ ဢမ်ႇႁပ်ႉသၢႆ ၾူၼ်းလႄႈ ဢမ်ႇလႆႈလၢတ်ႈတေႃႇ။
ၸဝ်ႈၶမ်းပိူင်ႇၾႃႉ လၢတ်ႈဝႃႈ “ မၼ်းၸၢႆးလုၵ်ႉၵျွၵ်ႉမႄးသေ ႁေႃႈမႃးၵေႃႉလဵဝ်ၵူၺ်း။ တေႃႈလဵဝ်တႄႉ ဢမ်ႇလႆႈမႆႈ ၸႂ်၊ ဢမ်ႇပဵၼ်သင်ယဝ်ႉၶႃႈ” ဝႃႈၼႆ။
ၸၢႆးထုၼ်းၺၢၼ်ႇၼႆႉ ပဵၼ်ၽူႈတႅၼ်းသၽႃးပႃႇတီႇႁူဝ်သိူဝ် ၸႄႈမိူင်းၶဵတ်ႇလိူၵ်ႈတင်ႈမၢႆ 2 ၸႄႈဝဵင်းၵျွၵ်ႉမႄး။ မၼ်း ၸၢႆးၶဝ်ႈၶေႉၶႅင်ႇပၢင်လိူၵ်ႈတင်ႈ မိူဝ်ႈပီ 2015 သေ လႆႈဢွင်ႇပေႉမႃး ဝႃႈၼႆ။
