ၼၢင်းယိင်း ၶူဝ်ႊရီႊယိူဝ်ႊ Ms. Young Hee Heo ဢၼ်မႃးဢႅဝ်ႇယဵမ်ႈ တီႈသီႇပေႃႉသေ ၸူမ်ၼမ်ႉတူႈၵႂႃႇ မိူဝ်ႈဝၼ်းတီႈ 23 လိူၼ်ၼူဝ်ႊဝႅမ်ႊၿိူဝ်ႊ 2018 ၼၼ်ႉ ယူႇတီႈမုင်ႉႁေႃႁိူၼ်းမၼ်းၼၢင်း ၶိုၼ်းမႃးသွၵ်ႈႁႃတူဝ်တၢႆမၼ်းၼၢင်းထႅင်ႈ ဝႃႈၼႆ။
ဝၼ်းတီႈ 27/01/2019 ယၢမ်းၵၢင်ၼႂ် 8 မူင်း ယူႇတီႈၸုမ်းၸွႆႈထႅမ်မိူင်းမၢၼ်ႈ တင်း လၢႆလၢႆၸုမ်း ၼႂ်းၸႄႈဝဵင်းသီႇပေႃႉ သေ ႁူမ်ႈၵၼ် လူင်းလမ်သွၵ်ႈႁႃထႅင်ႈ ၼႂ်းၼမ်ႉတူႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။
ၽူႈမီးပုၼ်ႈၽွၼ်း ၸွႆႈထႅမ် ၼႂ်းၵၢၼ်လမ်ၼမ်ႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈၸုမ်းလမ်ၼမ်ႉ ၵႂႃႇ ဢွင်ႈတီႈဢၼ်ၼၢင်းၶူဝ်ႊရီႊယိူဝ်ႊၸူမ်ၼမ်ႉႁၢႆၼၼ်ႉသေ လႆႈလူင်းလမ်ႁႃတူၺ်း ၸွမ်းပိုၼ်ႉတီႈၼၼ်ႉ မိူဝ်ႈဝၼ်းတီႈ 27 ၼၼ်ႉ တႄႇဢဝ် ၶၢဝ်းယၢမ်း 12:30 မူင်း ထိုင် 4:30 မူင်းႁူဝ်ၶမ်ႈ” ဝႃႈၼႆ။
သိုပ်ႇလၢတ်ႈဝႃႈ “ ယူႇတီႈမုင်ႉႁေႃႁိူၼ်းၼၢင်းၶူဝ်ႊရီႊယိူဝ်ႊ Ms. Young Hee Heo တုၵ်းယွၼ်းမႃးသေ ႁႂ်ႈၸွႆႈႁႃ ပၼ် ထႅင်ႈၼႆလႄႈ ယူႇတီႈၸုမ်းလမ်ၼမ်ႉ လႆႈဢွၼ်ၵၼ်မႃးလမ်ႁႃထႅင်ႈၵမ်းၼိုင်ႈ။ ဢၼ်မႃးၵမ်းၼႆႉ တေလႆႈဝႃႈ ပဵၼ်ပွၵ်ႈ ၵမ်း 2 ယဝ်ႉ။ ဢၼ်ၼၢင်းၶူဝ်ႊရီႊယိူဝ်ႊၸူမ်ၼမ်ႉတူႈႁၢႆၵႂႃႇၼၼ်ႉ ၸမ်ႁိမ်း 3 လိူၼ်ယဝ်ႉ” ဝႃႈၼႆ။
ၵၢၼ်လမ်ၼမ်ႉလူင်းႁႃတူဝ် ၼၢင်းၶူဝ်ႊရီႊယိူဝ်ႊ ပွၵ်ႈၵမ်းၼႆႉ တေၸႂ်ႉၶၢဝ်းယၢမ်း မွၵ်ႈ 10 ဝၼ်းသေႁႃ ဝႃႈၼႆ။
Ms. Houng Young Heo ဢႃယု 40 ပီပၢႆၼႆႉ ပဵၼ်ၵူၼ်းမိူင်းၶူဝ်ႊရီႊယိူဝ်ႊၸၢၼ်း မႃးဢႅဝ်ႇယဵမ်ႈ ဝဵင်းသီႇပေႃႉ၊ လူင်း လဵၼ်ႈ ၼမ်ႉ တူႈသေ လႆႈၸူမ်ၼမ်ႉၵႂႃႇ မိူဝ်ႈဝၼ်းတီႈ 23/11/2018 တေႃႇထိုင်ယၢမ်းလဵဝ် ဢမ်ႇႁၼ်တူဝ်တၢႆ လိပ်း ဝႃႈၼႆ။
