သိုၵ်း RCSS တင်း SSPP မီးပၼ်ႁႃၵၼ်လႄႈ ၵူၼ်းဝၢၼ်ႈတႃႈလူင် ဢၼ်ပၢႆႈမႃးသွၼ်ႈဝႆႉတီႈ ဝတ်ႉၼွင်သိမ်ႇ ႁူဝ်ၵူၼ်း 104 ၵေႃႉၼၼ်ႉ မႆႈၸႂ်ၵၢၼ်သူၼ်ႁႆႈၼႃး မၢၵ်ႇၶဝ်ႈတဝ်ႈၼမ်ႉပႆႇလႆႈၵဵပ်းလႄႈ ၶႂ်ႈဢွၼ်ၵၼ်ပွၵ်ႈ ၶိုၼ်းဝၢၼ်ႈ ၼႃႇယဝ်ႉ ဝႃႈၼႆ။
ဝၼ်းတီႈ 22/01/2019 သိုၵ်း RCSS တင်း SSPP ပဵၼ်ပၢင်တိုၵ်းၵၼ် တီႈဝၢၼ်ႈတႃႈလူင် ဢိူင်ႇၼႃးမၢၵ်ႇၶေႃ ၸႄႈ ဝဵင်းသီႇပေႃႉ ၸိုင်ႈတႆးပွတ်းႁွင်ႇသေ ၵူၼ်းဝၢၼ်ႈတႃႈလူင် ၾၢႆႇတူၵ်းၼမ်ႉတူႈ ၼႂ်းၸႄႈဝဵင်းၵျွၵ်ႉမႄး ႁူဝ်ၵူၼ်း 104 ၵေႃႉ လႆႈဢွၼ်ၵၼ်ပၢႆႈမႃးသွၼ်ႈဝႆႉတီႈဝတ်ႉၼွင်သိမ်ႇ ဢိူင်ႇၼွင်သိမ်ႇ ၸႄႈဝဵင်းၵျွၵ်ႉမႄးၼၼ်ႉ ၶႂ်ႈဢွၼ်ၵၼ် ပွၵ်ႈ မိူဝ်းႁိူၼ်းၵၼ်ၶိုၼ်းၼႃႇယဝ်ႉ” ဝႃႈၼႆ။
ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈဝတ်ႉၼွင်သိမ်ႇ လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈၵိၼ်ယႅမ်ႉတႄႉ ဢမ်ႇပေႃး မႆႈၸႂ်ၶႃႈ ။ ဢၼ်ႁဝ်းၶႃႈမႆႈၸႂ်တီႈသုတ်းတႄႉ လွင်ႈသူၼ်ႁႆႈၼႃးႁဝ်း ဢၼ်ၵိုတ်းဝႆႉတၢင်းလင်ၼၼ်ႉဢေႃႈ” ဝႃႈၼႆ။
ၸၢႆးထုၼ်းဝိၼ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်း ပၢႆႈၽေးသိုၵ်းႁဝ်းၶႃႈ တီႈဝတ်ႉၼွင်သိမ်ႇၼၼ်ႉ ႁႂ်ႈလူင်းမႃးတီႈပုင်ႇဝူဝ်းသေ ၵူၺ်းၵႃႈ ၵူၼ်းပၢႆႈၽေးႁဝ်းဢမ်ႇလူင်းမႃး ၶႃႈ။ တေယူႇတီႈဝတ်ႉၼွင်သိမ်ႇတူၺ်း 2-3 ဝၼ်းၵွၼ်ႇ။ သင်ဝႃႈ ငဝ်းလၢႆးဢမ်ႇလီၸိုင် တေမႃးတၢင်းဝဵင်း။ သင်ဝႃႈ ငဝ်း လၢႆးလီၵေႃႈ တေၼႅတ်ႈဢွၼ်ၵၼ်ပွၵ်ႈမိူဝ်းၶိုၼ်းၼႆၶႃႈ။ ၵူၼ်းပၢႆၽေးႁဝ်းၶႃႈ ဢွၼ်ၵၼ်မႆႈၸႂ် ၵၢၼ်တီႈႁိူၼ်းၶႃႈဢေႃႈ။ တွၼ်ႈတႃႇ ၵူၼ်းပၢႆႈၽေးသိုၵ်း တေမႃးတီႈဝဵင်းၼၼ်ႉ ႁဝ်းၶႃႈႁၢင်ႈႁႅၼ်းဝႆႉ ဢုပ်ႇဝႆႉတင်းၸဝ်ႈသြႃႇၶဝ်ဝႆႉမူတ်းယဝ်ႉ။ သင်ဝႃႈ ပဵၼ်မႃးၵိုင်ႉၵၢင်ႉၸိုင် ႁဝ်းၶႃႈတေၼႅတ်ႈၵႂႃႇႁပ်ႉဢဝ်မႃးၵမ်းလဵဝ်” ဝႃႈၼႆ။
ဝၢၼ်ႈတႃႈလူင်ၼႆႉ မီးဝႆႉ 2 ဝၢၼ်ႈ ၾၢႆႇဢွၵ်ႇၼမ်ႉတူႈ ပဵၼ်ဝၢၼ်ႈတႃႈလူင် ဢၼ်ယူႇၼႂ်း ၸႄႈ ဝဵင်းသီႇပေႃႉ၊ ၾၢႆႇတူၵ်း ၼမ်ႉတူႈသမ်ႉ ယူႇၼႂ်းၸႄႈဝဵင်းၵျွၵ်ႉမႄး။ တီႈၼၼ်ႈၼၼ်ႉ မၼ်းပဵၼ်တီႈတႃႈႁိူဝ်း ၶၢမ်ႈၼမ်ႉတူႈ ဝႃႈၼႆ။
ဢိင်ၼိူဝ်သိုၵ်း RCSS တင်း SSPP ယိုဝ်းၵၼ်သေ ၵူၼ်းဝၢၼ်ႈ ၼႂ်းၸႄႈဝဵင်းသီႇပေႃႉ- ၵျွၵ်ႉမႄး လႆႈဢွၼ်ၵၼ်ပၢႆႈ ၽေးသိုၵ်း ဢွၵ်ႇမႃး ၼပ်ႉႁူဝ်ပၢၵ်ႇ ၵုမ်ႇပၢႆႈၵႂႃႇ ပၢႆႈမႃး-လႆႈပၢႆႈ 5 ၵမ်းယဝ်ႉ ဝႃႈၼႆ။
