ပၢႆႉတၢင်းၶဝ်ႈၸူး ပၢင်ပွႆးတၢင်ႇယွတ်ႈၸွမ်သႅင် ၵွင်းမူး ယွၼ်းသူးတဵမ်ထူၼ်ႈ မင်ႇၵလႃႇၸုမ်ႈမိူင်း (ၵွင်းမူးမႄႈမၢႆႈ) တီႈၵုၼ်ၵၢင်ၼွင်ၽႃ ဢၼ်တေၸတ်းႁဵတ်းပၢင်ပွႆးလူင် တၢင်ႇယွတ်ႈၸွမ်သႅင် ၼႂ်းဝၼ်းလိူၼ်ၸဵင်မူၼ်းၼၼ်ႉ ပိုတ်ႇပၢႆႉတၢင်းၶဝ်ႈယဝ်ႉတူဝ်ႈၵႂႃႇလီငၢမ်း။

ဢၼ်ၸတ်းပၢင်ပွႆးလူင် တၢင်ႇယွတ်ႈၸွမ်သႅင် ၸေႇၻီႇ/ၵွင်းမူး ယွၼ်းသူးတဵမ်ထူၼ်ႈ မင်ႇၵလႃႇၸုမ်ႈမိူင်း ပွၵ်ႈၵမ်းၼႆႉ (လိူၼ်ၸဵင်မူၼ်း ဝၼ်းတီႈ 03/12/2017) ၽူႈဢွၼ်ႁူဝ်ၼမ်းၼႃႈ ပဵၼ်မုၵ်ႉၸုမ်းလူင်သင်ၶၸိုင်ႈတႆး တင်း ၸဝ်ႈၶူးဝႃးဝုၼ်းၸုမ်ႉ ဢိၵ်ႇပီႈၼွင်ႉမိူင်းၶူဝ်ၶမ်း (ၶူဝ်လမ်)တင်းသဵင်ႈ။ မိူဝ်ႈဝၼ်းဢႃးတိတ်ႉတီႈ 26/11/2017 ၽူႈၵွၼ်းတိူင်းသိုၵ်းဝၼ်းဢွၵ်ႇၵၢင် (ရပၶ) ၶူဝ်လမ်၊ ၸွမ်ႁၢၼ်တၢၼ်းလၢႆႇ ဢွၼ်ႁူဝ်လုၵ်ႈၼွင်ႉၸုမ်းၸိူဝ်း ပႃးၸဵမ်ၶႃႈႁၢပ်ႇၵၢၼ်ၶုၼ်မၢၼ်ႈၵမ်ႈၽွင်ႈ မႃးပိုတ်ႇပၢႆႉတၢင်းၶဝ်ႈပၢင်ပွႆး ယဝ်ႉတူဝ်ႈၵႂႃႇလီငၢမ်း-ၼႆယဝ်ႉ။

တေႇၻီႇ/ၵွင်းမူး တီႈၵုၼ်ၼွင်ၽႃ ဢၼ်တေတၢင်ႇယွတ်ႈၸွမ်သႅင် ပွၵ်ႈၵမ်းၼႆႉ တင်းမူတ်းမီး 2 သူႇ။ သူႇၼိုင်ႈပဵၼ် ၵွင်းမူးမင်ႇၵလႃႇၸုမ်ႈမိူင်း ယွၼ်းသူးတဵမ်ထူၼ်ႈ ဢၼ်ႁွင်ႉဝႃႈ ၵွင်းမူးမႄႈမၢႆႈ တၢင်းသုင် 80 ပေႇ၊ ယွတ်ႈၸွမ်သႅင် ဢၼ်တေတၢင်ႇၼႆႉတၢင်းသုင်မီး 2 ပေႇ။ ထႅင်ႈသူႇၼိုင်ႈ ပဵၼ်ၵွင်းမူႇဢွၼ်ႇတီႈထမ်ႈရသေး ဢၼ်မီးႁိမ်းၼၼ်ႉ တၢင်းသုင်ႇၸေႇၻီႇ 44 ပေႇ၊ ထီးမၼ်းသုင် 18 ၼိဝ်ႉ။ ၸဝ်ႈတႃႇၼလူင် ယွတ်ႈၸွမ်သႅင် ပဵၼ်မႄႈၸၢင်းၶမ်း တင်းမႄႈၸၢင်းသူၺ်ႇဢိင်ႇ ဝဵင်းၶူဝ်ၶမ်း-ၼႆယဝ်ႉ။

ထႅင်ႈလွင်ႈၼိုင်ႈ လုင်းၸၢႆးသေႃးၽိတ ပႃႈၸၢင်းဢုင်ႇ လႆႈႁပ်ႉပဵၼ်ၸဝ်ႈတႃႇၼလူင် ႁဵတ်းလိၵ်ႈလူင် ပိုၼ်းၼွင်ၽႃ ပဵၼ်လင်ႇၵႃႇသေ ဢၢၼ်းၸႅၵ်ႇလူႇတၢၼ်း ပၼ်ပီႈၼွင်ႉမႃးၶဝ်ႈႁူမ်ႈပၢင်ပွႆး။ လိၵ်ႈလူင်လင်ႇၵႃႇၼႆႉ တင်းမူတ်းမီး 6 ၵၼ် ၸရေးၵွၼ်း ၶမ်းၸိုၼ်ႈ ဝဵင်းၵႃလီႉ ၵေႃႉၸိုဝ်ႈသဵင်ယႂ်ႇမႃး မိူဝ်ႈႁေႃးပိုၼ်းလိူၼ်သီႇ ႁူဝ်လိုင်း ပဵၼ်ၽူႈႁေႃးလင်ႇၵႃႇ၊ လႆႈဢတ်းႁၢင်ႈသဵင်ဝႆႉသေ တတ်းတေႃႇယဝ်ႉ လႆႈသင်ႇဢတ်း/တီႉဢွၵ်ႇ တႃႇ 1,000 ၸုမ်ႇ၊ ၼိုင်ႈၸုမ်းမီး 3 ၽႅၼ်ႇ၊ ၵႃႈၶၼ်ၼိုင်ႈၸုမ်ႇၼိုင်ႈႁဵင်ပျႃးၼင်ႇၵဝ်ႇ၊ ၽူႈလႂ်ၽႂ်ၶႂ်ႈၸွႆႈႁွမ်းတၢၼ်းငိုၼ်း ပဵၼ်ၸဝ်ႈတႃႇၼၸွမ်းၵေႃႈလႆႈ- ၼႆယဝ်ႉ။

ဢွၼ်ၼႃႈၼႆႉ ၸဵမ်မိူဝ်ႈၼွင်ၽႃပႆႇမီးၶူဝ်ၵၢႆႇၶဝ်ႈၸူးၼၼ်ႉ တႃႇတေမႄးၵေႃႇၵုမ်းလုမ်းလႃးၼႆႉ တူဝ်လုင်းၸၢင်း သေႃးၽိတ-ပႃႈၸၢင်းဢုင်ႇ ၵႂႃႇလဝ်ႈလၢတ်ႈထိုင်တီႈၸဝ်ႈဝုၼ်းၸုမ်ႉ။ ၸဝ်ႈဝုၼ်းၸုမ်ႉၵေႃႈ လၢတ်ႈမႃးဝႃႈ ႁဝ်းၸဝ်ႈဝုၼ်းၸုမ်ႉ တေႁဵတ်းၶူဝ်/ၵၢႆႇၶူဝ်ၶဝ်ႈၸူးသေ ၵေႃႇၵုမ်းလုမ်းလႃးၵူၺ်း။ မၼ်းၸဝ်ႈလၢတ်ႈမႃးၸိူင်ႉၼႆသေ ၸင်ႇပဵၼ်ၵေႃႇလုမ်းလႃးမႃး ႁၢၼ်ႉတေႃႇထိုင်ပဵၼ်မႃးပၢင်ပွႆးတၢင်ႇ ယွတ်ႈၸွမ်သႅင် ပွၵ်ႈၼႆႉ-ၼႆယဝ်ႉ။

ၵုၼ်ၵၢင်ၼမ်ႉ ၼွင်ၽႃ တီႈဢၼ်မီးၸေႇၻီႇ/ၵွင်းမူး ယွၼ်းသူးတဵမ်ထူၼ်ႈမင်ႇၵလႃႇၸုမ်ႈမိူင်း (ၵွင်းမူးမႄႈမၢႆႈ) ၼႆႉ ယူႇၼႂ်းဢိူင်ႇႁူဝ်ၼွင် ၵိင်ႇၸႄႈဝဵင်းၶူဝ်လမ် (ၶူဝ်ၶမ်း)၊ ၸႄႈဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း။ ယူႇၾၢႆႇၸဵင်ႇႁွင်ႇဝၼ်းဢွၵ်ႇဝဵင်းၶူဝ်ၶမ်း မွၵ်ႈ 10 လၵ်း၊ မီးၾၢႆႇဢွၵ်ႇတၢင်းၵႃးၶူဝ်လမ်-ၵုၼ်ႁဵင်။

ၵုၼ်တီႈၼႆႈလႄႈ ၸေႇၻီႇ/ၵွင်းမူးတင်းသဵင်ႈၼႆႉ သင်ၶၸဝ်ႈဢိၵ်ႇပီႈၼွင်ႉမိူင်းၶူဝ်ၶမ်း (ၶူဝ်လမ်) လႆႈဢဝ်မွပ်ႈလူႇတၢၼ်းပၼ်တီႈ မုၵ်ႉၸုမ်းလူင်သင်ၶၸိုင်ႈတႆး ဝဵင်းပၢင်လူင်ဝႆႉ ပဵၼ်လိၼ်/ၶူဝ်းၶွင်သႃသၼႃယဝ်ႉ လႆႈႁူႉၼင်ႇၼႆ။