တင်ႈတႄႇပီ 2008 မႃးတေႃႇယၢမ်းလဵဝ် ၶွမ်ႊပၼီႊၶုတ်းထၢၼ်ႇႁိၼ် ၼႂ်းဢိူင်ႇပၢင်ၵွၼ် – ပၢင်ၸၢမ်ၼၼ်ႉ တုမ်ႉတိူဝ်ႉ ပၢႆးယူႇလီၵူၼ်းဝၢၼ်ႈမႃးဝၼ်းယဝ်ႉဝၼ်း ဝႃႈၼႆ။
မိူင်ထၢၼ်ႇႁိၼ်ၼႆႉ ၶုတ်းၼႂ်းၵႄႈဢိူင်ႇပၢင်ၵွၼ်-ပၢင်ၸၢမ်ၼၼ်ႉ တုမ်ႉယွၼ်ႈၵူၼ်းဝၢၼ်ႈၼႂ်းထုင်ႉၼၼ်ႉသေဢမ်ႇၵႃး တုမ်ႉယွၼ်ႈပႃးဝၢၼ်ႈၸိူဝ်းယူႇႁိမ်းၸမ်ဝၢၼ်ႈဢိူင်ႇပၢၼ်းမႃႉ၊ ပဵင်းၸဵၼ်ႈ ၸိူဝ်းၼႆႉ။ သဵၼ်ႈတၢင်းလူႉၵွႆယွၼ်ႉၵႃးတၢင်ႇ ထၢၼ်ႇႁိၼ်၊ ၼမ်ႉၵိၼ်ၼမ်ႉၸႂ်ႉယၢပ်ႇ- ယွၼ်ႉၼမ်ႉထၢၼ်ႇႁိၼ်လႆၶဝ်ႈလႄႈမီးလွင်ႈယၢပ်ႇလၢႆလၢႆလွင်ႈ။
ၸၢႆးထုၼ်းဝိၼ်း ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “လွင်ႈၼႆႉ ပီၼွင်ႉတၢင်း မိူင်းတၢင်ႈၵေႃႈ လွမ်မႆႈၸႂ် ယွၼ်ႉဝႃႈ တူင်ႈႁႆႈၼႃး ၵူၼ်းဝၢၼ်ႈႁဝ်းၶႃႈသမ်ႉ မီးဝႆႉတၢင်းတႂ်ႈ ဢၼ်ၶဝ်ၶုတ်းထၢၼ်ႇႁိၼ် ၼၼ်ႉလႄႈ ၵူဝ်ၼမ်ႉထၢၼ်ႇႁိၼ် ဢၼ်ၶဝ်ၶုတ်းၼၼ်ႉ လႆၶဝ်ႈၼႂ်းၼမ်ႉမိူင်းတၢင်ႈ။ ယွၼ်ႉဝႃႈ မႄႈၼမ်ႉၼၼ်ႉ ၵူၼ်းဝၢၼ်ႈၵူၼ်းမိူင်းလႆႈပိုင်ႈဢိင် ၸႂ်ႉလဵင်ႉတူင်ႈၼႃးတင်းၼမ်” ဝႃႈၼႆ။
ယွၼ်ႉၼၼ်လႄႈ ယူႇတီႈၵူၼ်းၼုမ်ႇတင်း ၵူၼ်းဝၢၼ်ႈ ႁူမ်ႈၵၼ်သေ တုၵ်းယွၼ်းႁႂ်ႈၵိုတ်းပႅတ်ႈ ၵၢၼ်ၶုတ်းထၢၼ်ႇႁိၼ် ၼႆႉ ဝႃႈၼႆ။
ၵူၼ်းမိူင်းပိုၼ်ႉတီႈ ၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ၶွမ်ႊပၼီႊ ဢၼ်မႃးၶုတ်းထၢၼ်ႇႁိၼ်တီႈၼၼ်ႈၼၼ်ႉ ပဵၼ် ၶွမ်ႊပၼီႊၶႄႇၼႆဝႃႇ။ ၶဝ်ၶုတ်းမႃး မီးၶၢဝ်းတၢင်းႁိုင်မွၵ်ႈ 10 ပီပၢႆယဝ်ႉ။ တေႃႈလဵဝ် ၶဝ်ပေႃးၶုတ်းထႅင်ႈတီႈမႂ်ႇ/ လုၵ်းမႂ်ႇ ထႅင်ႈယဝ်ႉ။ ယူႇတီႈႁဝ်းၶႃႈ ၵူၼ်းဝၢၼ်ႈတႄႉ မႆႈၸႂ် ၼမ်ႉထၢၼ်ႇႁိၼ် ဢၼ်ၶဝ်ၶုတ်းၼၼ်ႉ လႆၶဝ်ႈၼႂ်း ၼမ်ႉ ႁွင်ႈသေ တေၸၢင်ႈၵႂႃႇတုမ်ႉတိူဝ်ႉ သူၼ်ႁႆႈၼႃး ၸိူဝ်းဢၼ်မီးဝႆႉ ပႃႈတႂ်ႈထၢၼ်ႇႁိၼ် ဢၼ်ၶဝ်ၶုတ်းၼၼ်ႉ။ ထႅင်ႈလွင်ႈၼိုင်ႈ ၵေႃႈ ၶဝ်မႃးၶုတ်းဢဝ်ထၢၼ်ႇႁိၼ်တီႈၼၼ်ႈၼၼ်ႉ မၼ်းႁိုင် သဵၼ်ႈတႃႈသၢႆတၢင်းၵေႃႈလူႉ ၶဝ်ဢမ်ႇႁဵတ်းလုမ်းလႃး သၢင်ႈပၼ်သင်။ ယူႇတီႈၵူၼ်းဝၢၼ်ႈ ဢွၼ်ၵၼ်ၵႂႃႇတၵ်ႉယူႇ ဢၼ်သူၶုတ်းထႅင်ႈၼၼ်ႉ သူဢမ်ႇလႆႈသိုဝ်ႉဝႆႉလူး သူ သမ်ႉၶုတ်းႁဵတ်းသင်ထႅင်ႈ။ ၵမ်းၼႆႉ ၶွမ်ႊပၼီႊတွပ်ႇဝႃႈ ႁဝ်းဢမ်ႇဢဝ်ၼိူဝ်လိၼ်သူလူး ႁဝ်းၶုတ်းဢဝ်တႂ်ႈလိၼ်ၵူၺ်း ၼႄႇ” ဝႃႈၼႆ။
ၶွမ်ႊပၼီႊ ဢၼ်မႃးၶုတ်းထၢၼ်ႇႁိၼ်တီႈဢိူင်ႇပၢၼ်းမႃႉ-ပဵင်းၸဵၼ်ႈၼႆႉ တႄႇၶုတ်းမႃး မိူဝ်ႈပီ 2008 တေႃႇထိုင် ယၢမ်း လဵဝ် တိုၵ်ႉသိုပ်ႇၶုတ်းယူႇ ပႆႇၵိုတ်းယင်ႉသင် မီးၶၢဝ်းတၢင်း 10 ပီပၢႆယဝ်ႉ ဝႃႈၼႆ။ ဢိူင်ႇပၢၼ်းမႃႉ- ပဵင်းၸဵၼ်ႈၼႆႉ ယူႇၼႂ်း ၵႄႈၵၢင်ဢိူင်ႇပၢင်ၵွၼ်-ပၢင်ၸၢမ် မီးၼိူဝ်သဵၼ်ႈတၢင်း ၵျွၵ်ႉမႄး – မိူင်းၵုတ်ႈ ယၢၼ်ၵႆဝဵင်း ၵျွၵ်ႉမႄး မွၵ်ႈ 20 လၵ်းပၢႆ။
