ဢိင်ၼိူဝ် ပဵၼ်ပၼ်ႁႃ လွင်ႈသိုၵ်းတႆး 2 ၸုမ်း ၶဵင်ႈၶႅင်ၵၢၼ်သိုၵ်းတေႃႇၵၼ်၊ တိုၵ်းယိုဝ်းၵၼ်သေ ၵူၼ်းဝၢၼ်ႈ ၼႂ်းဢိူင်ႇ ၵုင်းသေႃႉတင်း ဢိူင်ႇၼွင်ဢၢင် လႆႈပၢႆႈၽေးသိုၵ်းဢွၵ်ႇမႃးထႅင်ႈ ႁူဝ်ၵူၼ်း ႁိမ်း 300 ၵေႃႉ။
ဝၼ်းတီႈ 24/01/2019 ယၢမ်းၵၢင်ဝၼ်း 11:30 မူင်း ၵူၼ်းဝၢၼ်ႈလူင်ဝၢႆ ဢိူင်ႇၵုင်းသေႃႉတင်း ဝၢၼ်ႈၽၵ်းၼၢမ်လႄႈ ဝၢၼ်ႈသႅၼ်ပၢႆး ဢိူင်ႇၼွင်ဢၢင် ႁူဝ်ၵူၼ်း 290 ၵေႃႉ ဢွၼ်ၵၼ်ပၢႆႈမႃးသွၼ်ႈဝႆႉတီႈဝတ်ႉၼႃးၵၢင် ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။
ၵူၼ်းပၢႆႈၽေးသိုၵ်း တီႈသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းဝၼ်းတီႈ 24 ယၢမ်းဝၢႆးဝၼ်းၵူၺ်းၼင်ႇၵဝ်ႇ ၵူၼ်း ဝၢၼ်ႈလူင်ဝၢႆ ဢိူင်ႇၵုင်းသေႃႉ ႁူဝ်ၵူၼ်း 75 ၵေႃႉ ဢၼ်ပၢႆႈမႃးသွၼ်ႈဝႆႉတီႈဝတ်ႉၼွင်ဢၢင်ၼၼ်ႉ ၶိုၼ်းဢွၼ်ၵၼ်ပွၵ်ႈ မိူဝ်းၶိုၼ်းႁိူၼ်းယေးၽႂ်မၼ်းယဝ်ႉ။ ၵူၼ်းပၢႆႈၽေးသိုၵ်းတႄႉ မိူဝ်းမိူဝ်းမႃးမႃးၶႃႈ။ မၢင်ဝၢၼ်ႈ ပွၵ်ႈမိူဝ်းႁဵတ်းၵၢၼ်ၵၢင် ဝၼ်းသေ ၵၢင်ၶမ်ႈသမ်ႉ ပွၵ်ႈမႃးၼွၼ်းတီႈဝတ်ႉၵေႃႈမီး။ ဝၼ်းၼိုင်ႈလႄႈဝၼ်းၼိုင်ႈတႄႉ သဵၼ်ႈသၢႆမၢႆႁူဝ်ၵူၼ်းတႄႉ ဢမ်ႇမိူၼ် ၵၼ် ၶိုၼ်ႈၶိုၼ်ႈလူင်းလူင်း” ဝႃႈၼႆ။
ၵူၼ်းပၢႆႈၽေးသိုၵ်းၸိူဝ်းၼႆႉ မႃးသွၼ်ႈယူႇတီႈဝတ်ႉႁိမ်းၽၢၵ်ႇလိူၼ်သၢဝ်းဝၼ်းယဝ်ႉလႄႈ ၶူဝ်းႁႆႈ၊ ၶူဝ်းသူၼ်ဢမ်ႇလႆႈ ၵဵပ်းလႆႈၵဵဝ်ႇသင်။ ၵွပ်ႈၼၼ်လႄႈ ၸင်ႇဢွၼ်ၵၼ်ၶႂ်ႈပွၵ်ႈမိူဝ်းႁဵတ်းၵၢၼ်ငၢၼ်းၶိုၼ်း ဝႃႈၼႆ။
ၸၢႆးဢွၼ်ႇ ၵူၼ်းတႃႈလူင် ဢၼ်ႁွတ်ႈၽႅဝ်ဝႆႉတီႈၼႃးမၢၵ်ႇၶေႃလၢတ်ႈတီႈၽူႈတွႆႇႁွၵ်ႈဝႃႈ “ ၼႂ်းလိူၼ်သွင်လိူၼ်ၼႆႉ ၵူၺ်း လႆႈပၢႆႈ 4-5 ပွၵ်ႈယဝ်ႉလူး။ သဵင်ၵွင်ႈၼႆႉ မၢင်ပွၵ်ႈတႅၵ်ႇၼွၵ်ႈဝၢၼ်ႈ၊ လႆႈယိၼ်းသဵင်ၵွင်ႈယူႇၾၢႆႇလဵဝ် ဢမ်ႇမီး ဢၼ်ယိုဝ်းတွပ်ႇ။ မၢင်ပွၵ်ႈပေႃးထၢင်ႇပဵၼ်ပၢင်တိုၵ်းတႄႉ သမ်ႉဢမ်ႇပဵၼ် မၢင်ပွၵ်ႈဢမ်ႇထၢင်ႇပဵၼ်ပၢင်တိုၵ်း သမ်ႉ ပဵၼ်။ ယူႇယၢပ်ႇၼႃႇယဝ်ႉၶႃႈ” ဝႃႈၼႆ။
တေႃႈလဵဝ် ၵူၼ်းပၢႆႈၽေးသိုၵ်း ဢၼ်မီးတီႈသီႇပေႃႉသမ်ႉ မီးတီႈဝတ်ႉၼႃးမၢၵ်ႇၶေႃ ၸၢႆး 194 ၵေႃႉ၊ ယိင်း 365 ၵေႃႉ ႁူမ်ႈ 559 ၵေႃႉ၊ ႁူင်းႁေႃ တူၼ်ႈၵႃႈ ၸၢႆး 6 ၵေႃႉ၊ ယိင်း 13 ၵေႃႉ ႁူမ်ႈ 19 ၵေႃႉ။ ဝတ်ႉၼွင်ဢၢင် ၸၢႆး 7 ၵေႃႉ၊ ယိင်း 8 ၵေႃႉ ႁူမ်ႈ 15 ၵေႃႉလႄႈ ၵျွင်းၶရိတ်ႊယၼ်ႇ လီသူး ၸၢႆး 45 ၵေႃႉ၊ ယိင်း 53 ၵေႃႉ ႁူမ်ႈ 98 ၵေႃႉ တင်းမူတ်း ႁူမ်ႈၵၼ် 691 ၵေႃႉ။
ၵူၼ်းပၢႆႈၽေးသိုၵ်း ဢၼ်လႆႈပၢႆႈဢွၵ်ႇမႃးသမ်ႉ ၼႂ်းဢိူင်ႇၼႃးမၢၵ်ၶေႃ ဝၢၼ်ႈၼႂ်းလူင်၊ ဝၢၼ်ႈတူၼ်ႈၵႅင်း၊ ဝၢၼ်ႈႁူဝ်ၼႃး၊ ဝၢၼ်ႈႁူမ်ႈ၊ ဝၢၼ်ႈတႃႈလူင်၊ ဝၢၼ်ႈၶၢႆးႁဵဝ်း။ ဢိူင်ႇၼမ်ႉယၢင်းသမ်ႉ ဝၢၼ်ႈၵဵတ်းၽူၼ်လႄႈ ဢိူင်ႇၵုင်းသေႃႉ ဝၢၼ်ႈလူင်ဝၢႆ၊ ဝၢၼ်ႈလွႆမွၵ်ႇ၊ ဝၢၼ်ႈသၢႆးၶၢဝ် ၸိူဝ်းၼႆႉ။
