ႁႅင်းၵၢၼ်ယၢၼ်မိူင်း ၸိူဝ်းဢမ်ႇၸွမ်းပၵ်းပိူင်မၢႆမီႈ ႁႅင်းၵၢၼ် မိူင်းထႆးၼၼ်ႉ ၺႃးၸဝ်ႈၼႃႈတီႈပလိၵ်ႈထႆး တီႉၺွပ်း သူင်ႇပွၵ်ႈတၢင်းလႅၼ်လိၼ် ၼႂ်းလိူၼ်ၵျႅၼ်ႊၼိဝ်ႊရီႊၼႆႉၵူၺ်း မီးၵႂႃႇ ယဝ်ႉ ႁူဝ်ၵူၼ်း 140 ၵေႃႉ။
ဝၼ်းတီႈ 24/01/2019 ယၢမ်းဝၢႆးဝၼ်း 2:30 မူင်း ပလိၵ်ႈထႆး သူင်ႇမွပ်ႈတူဝ်ႁႅင်း ၵၢၼ်ပၼ်တီႈၸဝ်ႈၼႃႈတီႈပလိၵ်ႈ ၽူႈ မီးပုၼ်ႈၽွၼ်း တၢင်းၾင်ႇတႃႈၶီႈလဵၵ်း တီႈၶူဝ်မိုတ်ႈၵိုတ်းမၢႆ 2 လႅၼ်လိၼ်တႆး – ထႆး တင်းမူတ်းႁူဝ်ၵူၼ်း 12 ၵေႃႉ။ ၸၢႆး 10 ၵေႃႉ၊ ယိင်း 2 ၵေႃႉ ဝႃႈၼႆ။
သိုဝ်ႇၶၢဝ်ႇ Tachileik News Agency ဢွၵ်ႇဝႆႉဝႃႈ “ ႁႅင်းၵၢၼ်ယၢၼ်မိူင်း ဢၼ်တၢင်းၾင်ႇထႆးၶဝ် သူင်ႇပွၵ်ႈမႃးၼၼ်ႉ ယူႇတီႈၽူႈမီးပုၼ်ႈၽွၼ်း တၢင်းၾင်ႇတႃႈၶီႈလဵၵ်း လႆႈၵူတ်ႇထတ်းတူၺ်းလီလီသေ ၸွင်ႇၸႂ်ႈပဵၼ်ၵူၼ်းၼႂ်းမိူင်းႁူမ်ႈ တုမ်။ သင်ဢမ်ႇၸႂ်ႈၸိုင် ၶိုၼ်းသူင်ႇမွပ်ႈယိုၼ်ႈပၼ် တၢင်းၾင်ႇမိူင်းထႆး” ဝႃႈၼႆ။
တႄႇဢဝ်ႁူဝ်လိူၼ်ၵျႅၼ်ႊၼိဝ်ႊရီႊ 2019 ၼႆႉမႃး ၸဝ်ႈၼႃႈတီႈပလိၵ်ႈထႆး သူင်ႇတူဝ်ႁႅင်းၵၢၼ် ပွၵ်ႈမႃး တၢင်းလႅၼ် လိၼ် တႆး-ထႆး (မႄႈသၢႆ – တႃႈၶီႈလဵၵ်း) တင်းမူတ်းမီးၵႂႃႇယဝ်ႉ 140 ၵေႃႉ။ ၸၢႆး 90 ၵေႃႉ၊ ယိင်း 46 ၵေႃႉလႄႈ လုၵ်ႈ ဢွၼ်ႇ 4 ၵေႃႉ ဝႃႈၼႆ။
ပီ 2018 ပူၼ်ႉမႃးၼႆႉ ႁႅင်းၵၢၼ်ယၢၼ်မိူင်း ဢၼ်ထုၵ်ႇပလိၵ်ႈထႆး တီႉၺွပ်းသူင်ႇပွၵ်ႈလႅၼ်လိၼ်တႆး – ထႆး (တႃႈၶီႈ လဵၵ်း – မႄႈသၢႆ) မီးၵႂႃႇ ႁူဝ်ၵူၼ်း မွၵ်ႈ 1,200 ၵေႃႉ ဝႃႈၼႆ။
