ၵူၼ်းမိူင်းသီႇပေႃႉ ၵႂႃႇႁဵတ်းၵၢၼ်သူၼ်ယဵပ်ႇၺႃးမၢၵ်ႇၾင်လိၼ် တႅၵ်ႇသႂ်ႇတိူဝ်ႉၺႃးၸွမ်းၶႃ မၢတ်ႇၸဵပ်းလိူဝ်ႁႅင်းလႆႈ သူင်ႇယူတ်းယႃတူဝ်ဝႆႉတီႈႁူင်းယႃ လႃႈသဵဝ်ႈ။
ဝၼ်းတီႈ 24/01/2019 ယၢမ်းၵၢင်ၼႂ် 8 မူင်း လုင်းသီဝူး(ဦးဇီဝူး) ဢႃယု မွၵ်ႈ 60 ပီ (ၸၢဝ်းလီသူး) ၵႂႃႇႁဵတ်းၵၢၼ်သူၼ် မၼ်း ၸၢႆး ဢၼ်မီးဝႆႉတီႈဝၢၼ်ႈလွႆမွၵ်ႇ ဢိူင်ႇၵုင်းသေႃႉ ၸႄႈဝဵင်းသီႇပေႃႉၼၼ်ႉ ယဵပ်ႇၺႃးမၢၵ်ႇၾင်လိၼ်လုၵ်ႈၼိုင်ႈ တႅၵ်ႇၽူင်ႉသႂ်ႇသေ လႆႈ မၢတ်ႇၸဵပ်းႁၢဝ်ႈႁႅင်း ဝႃႈၼႆ။
ၸၢႆးဢၢႆႈၶမ်း သီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ မၼ်းၸၢႆးယဵပ်ႇၺႃးမၢၵ်ႇ ယၢမ်းၵၢင်ၼႂ် 8 မူင်း ၸုမ်းၸွႆႈထႅမ် (နယ် စည်းမခြားပရဟိတ သီေပေါ) ၵႂႃႇႁပ်ႉဢဝ်မၼ်းၸၢႆးမႃးဝႆႉတီႈႁူင်းယႃသီႇပေႃႉ။ ယွၼ်ႉမၢတ်ႇၸဵပ်းႁၢဝ်ႈႁႅင်းသေ ထိုင်မႃး ယၢမ်းၵၢင်ၶမ်ႈ 7 မူင်းပၢႆၼၼ်ႉ လႆႈသူင်ႇၵႂႃႇယူတ်းယႃတူဝ်တီႈႁူင်းယႃလႃႈသဵဝ်ႈ” ဝႃႈၼႆ။
လုင်းသီဝူး ပဵၼ်ၵူၼ်းဝၢၼ်ႈ ပွၵ်ႉၸၢင်ႈၶမ်းၸၢၼ်း မၢၵ်ႇဢၼ်တႅၵ်ႇသႂ်ႇၽူင်ႉသႂ်ႇမၼ်းၸၢႆးၼၼ်ႉ ပဵၼ်မၢၵ်ႇၽႂ်၊ ၼမ်ႉ မိုဝ်းၽႂ်ႁၢင်ႈၵၢင်ဝႆႉ ဢၼ်ဝႃႈၼၼ်ႉ ပႆႇလႆႈႁူႉ ဝႃႈၼႆ။
သိုပ်ႇလၢတ်ႈဝႃႈ “ လိူတ်ႈတူၵ်းၼမ်ၼႃႇလႄႈ လႆႈထႅင်ႈလိူတ်ႈ 2 တဝ်ႈ။ လိူဝ်ၼၼ်ႉ ႁွႆႈၵႂႃႇၸွမ်းၼႂ်းၵႃးၽွင်းဢဝ်ၵႂႃႇ သူင်ႇႁူင်းယႃလႃႈသဵဝ်ႈၼၼ်ႉ ထႅင်ႈတဝ်ႈၼိုင်ႈ” ဝႃႈၼႆ။
မိူဝ်ႈပူၼ်ႉမႃး ဝၼ်းတီႈ 22/01/2019 ၼၼ်ႉ ယွၼ်ႉသိုၵ်း SSPP တင်း RCSS ပဵၼ်ပၢင်တိုၵ်းၵၼ် တၢင်းဝၢၼ်ႈတႃႈလူင် ဢိူင်ႇၼႃးမၢၵ်ႇၶေႃ ႁၢဝ်ႈႁႅင်းသေ ၸၢႆးၵမ်ႇ ဢႃယု 22 ပီ ၵူၼ်းဝၢၼ်ႈတႃႈလူင် ၺႃးၸၢၵ်ႇမၢၵ်ႇၵွင်ႈ တိူဝ်ႉသႂ်ႇတီႈၶႃ (ႁိမ်း ႁူဝ်ၶဝ်ႇ) ၾၢႆႇသၢႆႉမၼ်းသေ လႆႈသူင်ႇယူတ်းယႃတူဝ်ဝႆႉတီႈႁူင်းယႃသီႇပေႃႉယူႇ တေႃႇထိုင်ယၢမ်းလဵဝ် ဝႃႈၼႆ။
