သိုၵ်း SSPP တင်း RCSS ၶဵင်ႈၶႅင်ၵၢၼ်သိုၵ်းတေႃႇၵၼ်သေ ၵူၼ်းမိူင်း 104 ၵေႃႉ ဢွၼ်ၵၼ်ပၢႆႈမႃးသွၼ်ႈ တီႈၼွင် သိမ်ႇ ၸႄႈဝဵင်းၵျွၵ်ႉမႄး။

မိူဝ်ႈၼႆႉ ဝၼ်းတီႈ 24/01/2019 ယၢမ်းဝၢႆးဝၼ်း ၽူႈတႅၼ်းသၽႃးပႃႇတီႇႁူဝ်သိူဝ် ၵျွၵ်ႉမႄး တင်း ၽူႈမီးပုၼ်ႈၽွၼ်း ၼႂ်း ႁွင်ႈၵၢၼ်လူင်ပွင်ၸိုင်ႈ တေႁူမ်ႈၵၼ် ၵႂႃႇတေႃႇဢဝ် ၵူၼ်းပၢႆႈၽေးသိုၵ်း ဢၼ်ၵႂႃႇသွၼ်ႈဝႆႉ တီႈဝတ်ႉၼွင်သိမ်ႇ ဢိူင်ႇ ၼွင်သိမ်ႇ ၸႄႈဝဵင်းၵျွၵ်ႉမႄးသေ တေၶၢႆႉတေႃႉၶဝ်ႈမႃးဝႆႉတီႈၼႂ်းဝဵင်း ဝႃႈၼႆ။

ၸၢႆးထုၼ်းဝိၼ်း ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ၵမ်ႉ ႁဝ်းၶႃႈ တေဢွၼ်ၵၼ်ၵႂႃႇႁပ်ႉ ၵူၼ်းပၢႆႈၽေးသိုၵ်း တီႈဝတ်ႉၼွင်သိမ်ႇ တေဢဝ်မႃးဝႆႉတီႈၼႂ်းဝဵင်းၵျွၵ်ႉမႄးၼႆႉၶႃႈ။ တေဝႆႉတီႈလႂ်ဢၼ်ဝႃႈၼၼ်ႉ ပႆႇႁူႉ။ ၵမ်ႉပေႃးမႃးၽႅဝ်ၼႆ တေဢုပ်ႇတၢင်းၸဝ်ႈၶူး(ၽူႈၵွၼ်းဝတ်ႉ) သေ ၸင်ႇႁၢင်ႈႁႅၼ်း ပၼ်ႇ” ဝႃႈၼႆ။

သိုပ်ႇလၢတ်ႈဝႃႈ “ ဝၢၼ်ႈတႃႈလူင်ၼႆႉ မၼ်းမီးဝႆႉ 2 ဝၢၼ်ႈ ၾၢႆႇဢွၵ်ႇၼမ်ႉတူႈ ပဵၼ်ဝၢၼ်ႈတႃႈလူင် ဢၼ်ယူႇၼႂ်း ၸႄႈ ဝဵင်းသီႇပေႃႉ၊ ၾၢႆႇတူၵ်းၼမ်ႉတူႈသမ်ႉ ယူႇၼႂ်းၸႄႈဝဵင်းၵျွၵ်ႉမႄး။ တီႈၼၼ်ႈၼၼ်ႉ မၼ်းပဵၼ်တီႈတႃႈႁိူဝ်း ၶၢမ်ႈၼမ်ႉ တူႈ။ တွၼ်ႈတႃႇ လွင်ႈၵိၼ်ယႅမ်ႉ ၵူၼ်းပၢႆႈၽေးသိုၵ်းတႄႉ ယွၼ်ႉဝႃႈ တီႈဝတ်ႉၼွင်သိမ်ႇၼၼ်ႉ ၵႆဝဵင်းဝႆႉလႄႈ လွင်ႈ ၵိၼ်ယႅမ်ႉတႃႇၵူၼ်းပၢႆႈၽေးႁဝ်းၶႃးတႄႉ လႅပ်ႈၶၢတ်ႇဝႆႉ။ ယွၼ်ႉၼၼ်လႄႈ ႁဝ်းၶႃႈတေၶၢႆႉမႃးဝႆႉတီႈဝဵင်းဢဝ်။ တေႃႈ လဵဝ် ႁဝ်းၶႃႈတိုၵ်ႉႁၢင်ႈႁႅၼ်းၵၼ်ယူႇၶႃႈ။ ၵႃးတႃႇတေၵႂႃႇႁပ်ႉၼၼ်ႉ တိုၵ်ႉႁႃယူႇ” ဝႃႈၼႆ။

ဝတ်ႉၼွင်သိမ်ႇ ဢိူင်ႇၼွင်သိမ်ႇၼႆႉ မီးၾၢႆႇၸဵင်ႇၸၢၼ်းဝၼ်းဢွၵ်ႇ ဝဵင်းၵျွၵ်ႉမႄး ယၢၼ်ၵႆဝဵင်းမွၵ်ႈ 30 လၵ်းပၢႆ ဝႃႈၼႆ။

ၵူၼ်းပၢႆႈၽေးသိုၵ်း ဝၢၼ်ႈတႃႈလူင်ၼႆႉ ဢွၼ်ၵၼ်ပၢႆႈဢွၵ်ႇမႃး မိူဝ်ႈဝၼ်းတီႈ 22 လိူၼ်ၼႆႉ။ မိူဝ်ႈၶမ်ႈဝႃး ဝၼ်းတီႈ 23 သမ်ႉ ၵပ်းသိုပ်ႇတီႈၽူႈတႅၼ်းသၽႃးၸႄႈဝဵင်းၵျွၵ်ႉမႄးသေ မိူဝ်ႈၼႆႉ ဝၼ်းတီႈ 24 ယူႇတီႈၽူႈတႅၼ်းသၽႃး ၵျွၵ်ႉမႄး တင်း ၽူႈမီးပုၼ်ႈၽွၼ်း ႁွင်ႈၵၢၼ်လူင်ပွင်ၸိုင်ႈ တေဢွၼ်ၵၼ်ၵႂႃႇႁပ်ႉဢဝ်မႃး ၵူၼ်းပၢႆႈၽေးသိုၵ်း ဢၼ်မီးဝႆႉတီႈ ဝတ်ႉၼွင်သိမ်ႇၼၼ်ႉ ၶၢႆႉမႃးဝႆႉတီႈ ၼႂ်းဝဵင်း ဝႃႈၼႆ။

မိူဝ်ႈဝၼ်းတီႈ 22/01/2019 ၼၼ်ႉ သိုၵ်း SSPP တင်း RCSS ပဵၼ်ပၢင်တိုၵ်းၵၼ်ႁၢဝ်ႈႁႅင်းသေ ၵူၼ်းဝၢၼ်ႈတႃႈလူင် ဢွၼ်ၵၼ်ပၢႆႈ ၸိူဝ်းႁွတ်ႈၽႅဝ်ၵႂႃႇတၢင်း ၼႃးမၢၵ်ႇၶေႃၵေႃႈမီး ၸိူဝ်းပၢႆႈမႃးတၢင်းၵျွၵ်ႉမႄး ၵေႃႈမီး ဝႃႈၼႆ။