မေႃႁွင့်ၵႂၢမ်းတႆး ၸၢႆးၸိူင်းႁၢၼ် ႁၢင်ႈႁႅၼ်းတေၶဝ်ႈထတ်းပၢႆးယူႇလီတီႈမိူင်းထႆး ယွၼ့်တၢင်းပဵၼ်တၢႆၽၢၵ်ႇၾၢႆႇသၢႆ့။
ဝၼ်းတီႈ 24/01/2019 မေႃႁွင့်ၵႂၢမ်းတႆး ၸၢႆးၸိူင်းႁၢၼ်လႄႈ လုၵ်ႈလၢင်းၼၢင်းမေးဢိၵ်ႇပီႈၼွင့် ႁၢင်ႈႁႅၼ်း ၶပ်းၶိုင် တေၶဝ်ႈယူတ်းယႃတူဝ်တီႈမိူင်းထႆး ယွၼ့်ပၢႆးယူႇလီဢမ်ႇတဵမ်ထူၼ်ႈ တိၼ်မိုဝ်းၾၢႆႇသၢႆ့ဢမ်ႇႁူ့ၼိူဝ့် (တၢႆၽၢၵ်ႇ) တႄႇပဵၼ်မႃးမိူဝ်ႈႁၢင်ပီ 2018 ။
ၸၢႆးၸိူင်းႁၢၼ် လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ယိၼ်းၸူမ်းယႂ်ႇၼမ်ထိုင် ၽူႈသူင်ႁၵ့်ၽဵင်းၵႂၢမ်းႁဝ်း ဢၼ်မႆႈၸႂ်ၸွမ်းလႄႈ ပၼ်ႁႅင်းၸႂ်မႃးယူႇဢေႃႈ။ ဢၼ်ၶႂ်ႈၾၢၵ်ႇထိုင်ၽူႈႁွင့်ၵႂၢမ်းပၢၼ်မႂ်ႇတႄ့ ႁႂ်ႈဢွၼ်ၵၼ်ၶတ်းၸႂ်ၵႂႃႇ ႁႂ်ႈဢွၼ်ၸုၵ်းၼိူဝ်ၵၢၼ်ၾိင်ႈငႄႈၸိူဝ့်ၶိူဝ်း ၵၢၼ်ယူႇၵၢၼ်ၵိၼ်ႁဝ်းသေ ႁဵတ်းသၢင်ႈၵႂႃႇ ယႃႇႁႂ်ႈၵႂၢမ်းတႆး ထုင်းတႆးႁဝ်းလႆႈလူ့ႁၢႆ ႁႂ်ႈမေႃလိူၵ်ႈဢဝ်လွၼ့်မွၼ်းၵႂၢမ်းတႆးႁဝ်း တႅမ်ႈဢွၵ်ႇႁွင့်ဢွၵ်ႇ။ ၶိူဝ်းပိူၼ်ႈၶိုတ်းၵၢပ်ႈ ၼႃႇၼႆသေယိူင်ႈပိူၼ်ႈတိၵ်းတိၵ်းတႄ့ဢမ်ထုၵ်ႇလီပဵၼ်။ ႁႂ်ႈႁၼ်ၵႃႈၶၼ်ၸိူဝ့်ၶိူဝ်းတႆးသေ ႁွင့်ၵႂၢမ်းပူၵ်းတိုၼ်ႇ ၵႂႃႇသေၵမ်း ” ဝႃႈၼႆ။
ၸၢႆးၸိူင်းႁၢၼ်ၼႆ့ ၵိူတ်ႇမိူဝ်ႈဝၼ်းတီႈ 27/05/1975 ပဵၼ်လုၵ်ႈၸၢႆး လုင်းၸၢႆးသၢင်ႇၺုၼ့်လႄႈ ပႃႈၼၢင်းၸိင်ႇ ၺုၼ့် မီးပီႈၼွင့်ႁူမ်ႈတွင့် 3 ၵေႃ့ ၸၢႆးၸိူင်းႁၢၼ်၊ ၼၢင်းမွၼ်းႁွမ်၊ ၸၢႆးၼေႃႇၶိူဝ်း။ ၵိူတ်ႇတီႈဝၢၼ်ႈၸၢတ်ႈ ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ။ တႄႇၶဝ်ႈဝူင်းၵၢၼ်ပၢႆးမွၼ်းမိူဝ်ႈ 1997 ႁွင့် ဢွၵ်ႇၽဵင်းၵႂၢမ်း 4 Albums မိူၼ်ၼင်ႇၵၢင်ၸႂ်ၶႃႈႁွင့်ၵႂၢမ်း၊ ႁွင့်ၵႂၢမ်းသူင်ႇထိုင်၊ သၢဝ်သၢမ်ၸဵင်ႇၶမ်း၊ ပေ့ၸႂ်ၵွပ်ႈ ၼမ့်ယၢတ်ႇ ၸိူဝ်းၼႆ့ ဢၼ်ႁွင့်ၸွမ်း ပိူၼ်ႈၵေႃႈမီးယူႇဝႃႈၼႆ။
