ပၢင်ပွႆးယုၵ်ႉယွင်ႈ ၸဝ်ႈၶူးမေႃတႆးလႄႈ ယုၵ်ႉယွင်ႈလုင်းဢေႃးၸေႇယ ၵေႃႉဢွၼ်ႁူဝ်ၵေႃႇတင်ႈၸၢတ်ႈသႅင်းတႆး ၸတ်း ႁဵတ်းယဝ်ႉတူဝ်ႈလီငၢမ်းၵႂႃႇ တႃႇၶၢဝ်းတၢင်း 3 ဝၼ်း။
ပီၼႆႉ ဢႃယုၸုမ်းၸၢတ်ႈသႅင်းတႆး ဝဵင်းသီႇပေႃႉ ၶွပ်ႈတဵမ် 75 ပီ ပီၵွၼ်းသႅင်ၼႆလႄႈ ဝၼ်းတီႈ 21-23/01/2019 လုၵ်ႈ ၼွင်ႉပွင်ႈပၢႆလႄႈ ၵူၼ်းမိူင်းသီႇပေႃႉ ႁူမ်ႈၵၼ်ၸတ်းႁဵတ်း ပၢင်ပွႆးယုၵ်ႉယွင်ႈဢဝ်မုၼ်။ ၸတ်းႁဵတ်းတီႈဝတ်ႉ/ ၵျွင်းလူင် ဢွင်ႇမင်ႇၵလႃႇၽူဝ်းတေႃႇ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။
လုင်းၸၢႆးမႅတ်ႉဢွင်ႇ ၵႅမ်ႁူဝ်ပဝ်ႈလႄႈ ၽူႈပွင်ၵၢၼ် ပွင်ပဵၼ်ပၢင်ပွႆး လၢတ်ႈတီႈၽူႈတွႆႇႁွၵ်ႈဝႃႈ“ ပၢင်ပွႆးႁဝ်းၶႃႈ ဢၼ် ၸတ်းႁဵတ်းယဝ်ႉၵႂႃႇ တႃႇၶၢဝ်းတၢင်း 3 ဝၼ်း ပဵၼ်ဢၼ်ၶႅမ်ႉလႅပ်ႈလီငၢမ်း ယူႇတီႈလုင်းဢေႃးၸေႇယႁဝ်း လႆႈ ဢွၼ် ႁဵတ်းသၢင်ႈမႃး ဢဝ်ၵုင်ႇဢဝ်မုၼ်ၸွမ်းမၼ်းၸဝ်ႈတႄႉတႄႉၶႃႈ။ ဢၼ်လုင်းႁဝ်းဢွၼ်ႁဵတ်းမႃးၼၼ်ႉ တေၶတ်းၸႂ် သိုပ်ႇႁဵတ်းသၢင်ႈၶိုပ်ႈၼႃႈၵႂႃႇထႅင်ႈ။ လိူဝ်ၼၼ်ႉ ၼင်ႇႁိုဝ် ၵူၼ်းၼုမ်ႇႁဝ်း ၸိူဝ်းတေၶိုၼ်ႈမႃးတၢင်းလင်ၼၼ်ႉ ႁႂ်ႈၶဝ် မီးႁႅင်းတူဝ်၊ ႁႅင်းၸႂ်၊ ႁႅင်းဢွၵ်းသေ ၶတ်းၸႂ်ႁဵတ်းသၢင်ႈၵႂႃႇ၊ တုၵ်းယွၼ်းႁႂ်ႈၵူၼ်းၼုမ်ႇၶဝ် ဢွၼ်ၵၼ်ႁၵ်ႉသႃမႅတ်ႇ ပႅင်းၵႂႃႇ။ ၸၢတ်ႈသႅင်းတႆးၼႆႉ ပေႃးလၢတ်ႈသိုဝ်ႈသိုဝ်ႈ မၼ်းဢမ်ႇၸႂ်ႈဝႃႈ ႁဵတ်းမႃးမိူဝ်ႈၸူဝ်ႈၶၢဝ်းၼႆႉၵူၺ်း လွင်ႈၼႆႉ ႁႂ်ႈႁူႉပွင်ႇၸႂ်ၵၼ် မီးမႃးၸဵမ်မိူဝ်ႈပၢၼ်ၸဝ်ႈၾႃႉႁဝ်းၶႃႈ ၸဝ်ႈၵျႃႇသႅင် ပၼ်ၶႂၢင်ႉတီႈလုင်းဢေႃးၸေႇယ တႃႇတင်ႈ ၸုမ်းၸၢတ်ႈသႅင်းတႆး” ဝႃႈၼႆ။
ပၢင်ပွႆးယုၵ်ႉယွင်ႈၸဝ်ႈၶူးမေႃတႆးလႄႈ လုင်းဢေႃးၸေႇယ ၸုမ်းၸၢတ်ႈသႅင်းတႆး ထူၼ်ႈထိုင် 75 ပီ (ပီ ၵွၼ်းသႅင်) ၼႆႉ မီးပီႈၼွင်ႉတီႈၸမ်ၵႆလႄႈ ၵူၼ်းမိူင်းသီႇပေႃႉ မႃးၶဝ်ႈႁူမ်ႈ တင်းၼမ်လၢႆ ဝႃႈၼႆ။
မိူဝ်ႈဝၼ်းပိုတ်ႇပၢင်ပွႆး ဝၼ်းတီႈ 21 ၼၼ်ႉ ပိုတ်ႇပၢင်/ ၵႅတ်းမႆလၢႆႈ၊ ပိုတ်ႇႁွင်ႈၼႄပိုၼ်း ႁူင်းႁဵၼ်းထမ်မ၊ သပ်းလႅင်း ၼႄ လွင်ႈတီႈဢၼ်လႆႈၸတ်းႁဵတ်းပၢင်ပွႆး၊ ႁေႃးလိၵ်ႈလူင် ဢၼ်ၸဝ်ႈၵၢင်းသိူဝ်တႅမ်ႈဝႆႉ။
ဝၼ်းတီႈ 22 သမ်ႉ ယၢမ်းၵၢင်ၼႂ် ပၢင်တၢၼ်ႈ/ ဢုပ်ႇၶႆႈ ပိုၼ်းၸဝ်ႈၶူးမေႃတႆးလႄႈ ပိုၼ်းလုင်းဢေႃးၸေႇယ ဝၢႆးဝၼ်း သမ်ႉ ၼႄတၢင်းၵႃႈ ၼူၵ်ႉတူဝ်း၊ တွၼ်ႈၵၢင်ၶမ်ႈသမ်ႉ ၸဝ်ႈၶူးသုၶမ်း မႃးပွၼ်ႈထမ်း(ႁေႃႈတြႃး)။
ဝၼ်းလိုၼ်းသုတ်း ဝၼ်းတီႈ 23 သမ်ႉ မွၵ်ႇထိုင်ၸဝ်ႈပၢႆးမွၼ်းတႆး ၸိူဝ်းမီး ဢႃယု 60 ပီ ၶိုၼ်ႈၼိူဝ်/ ၵၼ်ႇတေႃး/ လူႇ တၢၼ်း။ ထိုင်ယၢမ်းဝၢႆးဝၼ်းမႃးသမ်ႉ ဢွၼ်ၵၼ်ၵႂႃႇဝၢင်းၶူဝ်ႉမွၵ်ႇ တီႈၶုမ်လုင်းဢေႃးၸေႇယ ႁူမ်ႈၵၼ် လူႇတၢၼ်း ယၢတ်ႇၼမ်ႉၵႂႃႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ