ပၢင်တွပ်ႇလိၵ်ႈႁူင်းႁဵၼ်းထမ်မ (Sunday Dhamma School) တီႈဝဵင်းလွႆၶေႃ ၸႄႈမိူင်းယၢင်းလႅင် ၸတ်းႁဵတ်းပဵၼ် ပွၵ်ႈၵမ်း 4။ ပီၼႆႉ လုၵ်ႈႁဵၼ်း လႄႈ ၵူၼ်းၼုမ်ႇတႆး ၶဝ်ႈတွပ်ႇလိၵ်ႈၼမ်လိူဝ်ၵူႈပီ။
ပၢင်တွပ်ႇလိၵ်ႈ ႁူမ်ႈၵၼ် ၸတ်းႁဵတ်း တီႈဝတ်ႉၵျွင်း သီရိမင်ၵလႃႇ ဝၢၼ်ႈဝွၼ်သူမ်ႈ ၼႂ်းဝၼ်းလိူၼ်ၵမ်မူၼ်း 20/01/2019 ပီၼႆႉ လုၵ်ႈႁဵၼ်းၶဝ်ႈတွပ်ႇလိၵ်ႈ မီး 108 ၵေႃႉ ဝႃႈၼႆ။
ၶူးပူင်သွၼ် တီႈႁူင်းႁဵၼ်း ထမ်မ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပီၼႆႉ လွင်ႈလၢၵ်ႇလၢႆးမၼ်းဢၼ်ၼိုင်ႈတႄႉ တႅမ်ႈတွပ်ႇလႄႈ ၶူၼ်ႉၶႆႈ(တွပ်ႇသူပ်း) ႁူမ်ႈၵၼ်သေတွပ်ႇ။ တင်းမူတ်း လုၵ်ႈႁဵၼ်းမီး 208 ၵေႃႉ။ ၼႂ်းၼၼ်ႉ ဢၼ်မႃး တွပ်ႇမီး 108 ၵေႃႉ။ လုၵ်ႈႁဵၼ်း ဢၼ်ၵိုတ်းၸိူဝ်းၼၼ်ႉသမ်ႉ ယွၼ်ႉၶဝ်တိုၵ်ႉလဵၵ်ႉယူႇလႄႈ ဢမ်ႇလႆႈမႃးတွပ်ႇၶႃႈ။ ပီၼႆႉ တေလႆႈဝႃႈ လုၵ်ႈႁဵၼ်းဢၼ်မႃးတွပ်ႇလိၵ်ႈၼႆႉ ၼမ်လိူဝ်သေပီပူၼ်ႉ။ လွင်ႈလီႁၢၼ်ႉၸႂ်ထႅင်ႈဢၼ်ၼိုင်ႈတႄႉ ႁဝ်းၶႃႈ ဢမ်ႇမီးလွင်ႈၸႅၵ်ႇယႅၵ်ႈ ဝၢၼ်ႈၽႂ် ဝၢၼ်ႈမၼ်းသေ လႆႈႁဵၼ်းႁူမ်ႈၵၼ် တွပ်ႇႁူမ်ႈၵၼ်ၵႂႃႇ။ ပၢင်တွပ်ႇလိၵ်ႈၼႆႉ ႁဝ်းၶႃႈ ၸတ်းႁဵတ်း 3 တီႈ” ဝႃႈၼႆ။
ႁူင်းႁဵၼ်းထမ်မ တီႈဝဵင်းလွႆၶေႃ ၼႂ်းပီ 2018-2019 ၼႆႉ ၶူးပူင်သွၼ် တင်းမူတ်း မီး 10 ၵေႃႉ၊ လုၵ်ႈႁဵၼ်း တင်းမူတ်းမီး 208 ၵေႃႉ။ ပီၼႆႉ လုၵ်ႈႁဵၼ်း ဢၼ်ၶဝ်ႈတွပ်ႇလိၵ်ႈသမ်ႉ မီး 108 ၵေႃႉ ပဵၼ်ပၢင်တွပ်ႇလိၵ်ႈ ႁူင်းႁဵၼ်းထမ်မ ၵမ်းထူၼ်ႈ 4 တွၼ်ႈတႃႇ ပီႈၼွင်ႉတႆးဝဵင်းလွႆၶေႃ။
ႁူင်းႁဵၼ်းထမ်မ (Sunday Dhamma School) တီႈဝဵင်းလွႆၶေႃၼႆႉ တႄႇပိုတ်ႇပူင်သွၼ် မိူဝ်ႈပီ 2018 လိူၼ်ၵျုႊလၢႆႊ ဝၼ်းတီႈ 22 ထိုင် ပီ 2019 လိူၼ်ၵျႅၼ်ႊၼိဝ်ႊရီႊ ဝၼ်းတီႈ 20။ ပိုတ်ႇပၢင်သွၼ်တီႈ ဝတ်ႉဝိႁၢရ်လူင် သီရိမင် ၵလႃႇ ဝၢၼ်ႈဝွၼ်သူမ်ႈ၊ ဝတ်ႉဝိႁၢရ်လူင်ဢွင်ႇမင်ႇၵလႃႇ ဝၢၼ်ႈလိၼ်ၽုင်ႇလူင်လႄႈ ဝတ်ႉဝိႁၢရ်လူင်ထမ်မသုၶ ဝၢၼ်ႈ ၵုၼ်ၼႃး ဝဵင်းလွႆၶေႃ ၸႄႈမိူင်းယၢင်းလႅင်၊ ၼိုင်ႈဝူင်ႈလႂ် ပူင်သွၼ်ပၼ်ၼိုင်ႈဝၼ်း၊ ဝၼ်းပူင်သွၼ် ပၼ်သမ်ႉ ဝၼ်းဢႃးတိတ်ႉ တင်းမူတ်း ဝၼ်းပူင်သွၼ်ပၼ်ၵႂႃႇသမ်ႉ မီး 21 ဝၼ်း ဝႃႈၼႆ။
