ၵေႃလိၵ်ႈလၢႆးလႄႈ ၾိင်ႈငႄႈတႆး ထုင်ႉလွႆႁူဝ်သိူဝ် ၸတ်းႁဵတ်းပၢင်ပွႆးႁူမ်ၸူမ်းႁပ်ႉတွၼ်ႈ ပီမႂ်ႇတႆး ပွၵ်ႈႁႅၵ်ႈ ၵူၼ်းၶဝ်ႈႁူမ်ႈၵိုၼ်းၼမ်။

ဝၼ်းတီႈ 25 – 26 /11/2017 ၵေႃလိၵ်ႈလၢႆးလႄႈၾိင်ႈငႄႈတႆး ထုင်ႉလွႆႁူဝ်သိူဝ် ၸတ်းႁဵတ်းပၢင်ပွႆး ႁူမ်ၸူမ်းႁပ်ႉတွၼ်ႈပီမႂ်ႇတႆး 2112 ၼီႈ တီႈဝိႁၢရ် (ၵျွင်း) လွႆႁူဝ်သိူဝ် ဢိူင်ႇထုင်ႉလွႆႁူဝ်သိူဝ် ၸႄႈဝဵင်း မၢၼ်ႈၸေႊ လႅၼ်လိၼ်တႆး – ၶၢင် မီးၵေႃလိၵ်ႈလၢႆး မူႇၸေႊ၊ ၵူတ်ႉၶၢႆ၊ ၼမ်ႉၶမ်း၊ ၸေႊလၢၼ်ႉဢိၵ်ႇ ပီႈၼွင်ႉတီႈၸမ်ၵႆၶဝ်ႈႁူမ်ႈတင်းၼမ်။

လုင်းသႅင်ႁိူင်းသၢင်ႇဢေး ႁူဝ်ပဝ်ႈၵေႃလိၵ်ႈလၢႆး ထုင်ႉလွႆႁူဝ်သိူဝ် လၢတ်ႈဝႃႈ – “ မီးတၢင်းၸူမ်းသိူဝ်း ဢၼ်ၵေႃလိၵ်ႈလၢႆးလႄႈ ပီႈၼွင်ႉတီႈၸမ် တီႈၵႆမႃးၶဝ်ႈႁူမ်ႈ ပၢင်ပွႆးပွၵ်ႈၼႆႉ ပဵၼ်ၵမ်းဢွၼ်တၢင်း သုတ်း ယိူင်းဢၢၼ်းတႄႉၼင်ႇႁိုဝ်ပီႈၼွင်ႉတႆးလႄႈၸၢဝ်းၶိူဝ်းၼႂ်းမိူင်းတႆး တေမီးလွင်ႈဢွမ်ႇလွမ်ႈ ၽွမ်ႉၵၼ် ဢဝ်ၵၼ်ဝႃႈ ပႃးၵၼ်ပဵၼ် ၵွင်ႉသၢၼ်ႁူမ်ႈၵၢၼ်ၵၼ်ၵႂႃႇမိူဝ်းၼႃႈ ” ဝႃႈၼႆ။

ၼႂ်းပၢင်ၵႅဝ်ႈ ပၢင်ပွႆးၼႆႉ မီးပၢင်တြႃး၊ ပၢင်ၵိၼ်ၶဝ်ႈႁူမ်ႈမူႇ၊ တၢင်းၵႃႈပီႈၼွင်ႉထုင်ႉလွႆႁူဝ်သိူဝ်၊ ႁွင်ႉၽဵင်း ၵႂၢမ်းၸိူဝ်းၼႆႉ မီးၽူႈႁွင်ႉၵႂၢမ်းၸိုဝ်ႈသဵင်ယႂ်ႇ ၸၢႆးလၢဝ်သႂ်၊ ၸၢႆးဢူးလၢႆး၊ ၸၢႆးသႃႇဢွင်ႇ၊ ၸၢႆးထႅၼ်ႈ လႅဝ်း၊ ၼၢင်းလၢဝ်ၼုမ်ႇႁွမ်၊ ၸၢႆးဢွင်ႇဢူး၊ ၸၢႆးသၢႆၾူၼ်၊ ၸၢႆးဢွၼ်ႇႁၵ်ႉ၊ ယိင်းယိင်းၶိူဝ်း၊ ၸၢႆးၸွမ် လၢဝ်ၶိူဝ်း၊ ၼၢင်းၶဵဝ်ယုမ်ႉဝၼ်းလႄႈ ၸုမ်းႁႆႇတိုင်ႈပဵၼ် ႁႅင်းသၢမ်ႁႅင်း ၸိူဝ်းၼႆႉ။

ပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး 2112 ၼီႈၼႆႉ ၼႂ်းမိူင်းတႆး ၸတ်းႁဵတ်းလၢႆၸႄႈဝဵင်း လိူဝ်ၼၼ်ႉ ၼွၵ်ႈမိူင်းဢၼ်ပီႈၼွင်ႉတႆးယူႇသဝ်းၵေႃႈ ၸတ်းႁဵတ်းလၢႆတီႈ တွၼ်ႈတႃႇထုင်ႉလွႆႁူဝ်သိူဝ်တႄႉ ပီၼႆႉ ပဵၼ်ပီဢွၼ်တၢင်းသုတ်းဝႃႈၼႆ။

Photo by ၶၢဝ်ႇလွတ်ႈလႅဝ်း