ၵူၼ်းၼုမ်ႇဢၼ်မႃးၵိၼ်ၶဝ်ႈၵိၼ်လဝ်ႈ တီႈႁၢၼ်ႉၶၢႆၼိူဝ်ႉယၢင်ႈ ပွၵ်ႉမႄႈၶၢဝ် ၸႄႈဝဵင်းတႃႈၶီႈလဵၵ်းၼၼ်ႉ ၽိတ်းမေႃး ၵၼ်သေ ထိုင် တီႈပေႃးလႆႈယိုဝ်းၵၼ် ၵူၼ်းယိုဝ်းၼၼ်ႉ ပဵၼ်ၽႂ် ၵေႃႉလႂ် တေႃႇထိုင်ယၢမ်းလဵဝ် ပႆႇတီႉလႆႈ။

မိူဝ်းဝၼ်းတီႈ 21/01/2019 ယၢမ်းၵၢင်ၶိုၼ်း မွၵ်ႈ 1 မူင်းပၢႆၼၼ်ႉ ၵူၼ်းၼုမ်ႇဢၼ်မႃးၼင်ႈၵိၼ်လဝ်ႈ၊ ၵိၼ်ၼိူဝ်ႉယၢင်ႈ တီႈ ပွၵ်ႉမႄႈၶၢဝ် ၸႄႈဝဵင်းတႃႈၶီႈလဵၵ်းၼၼ်ႉ တုမ်ႉတိူဝ်ႉသႂ်ႇၵၼ် သေယိုဝ်းၵၼ် ၵေႃႉၼိုင်ႈမၢတ်ႇၸဵပ်း၊ ၵေႃႉယိုဝ်း ၼၼ်ႉ ပၢႆႈလွတ်ႈဝႆႉ ဝႃႈၼႆ။

ၵူၼ်းဝၢၼ်ႈပွၵ်ႉမႄႈၶၢဝ် ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ လႆႈငိၼ်းတႄႉ လႅပ်ႈတေမဝ်းလဝ်ႈသေ တုမ်ႉၽႃႇသႂ်ႇ ၵၼ်/ ၽိတ်းမေႃးၵၼ် လႆႈငိၼ်းဝႃႈ ၵေႃႉယိုဝ်းၼၼ်ႉ ပဵၼ်ၸၢဝ်းထႆး တေႃႈလဵဝ် ၸဝ်ႈၼႃႈတီႈၶဝ် တိုၵ်ႉၵူတ်ႇထတ်း လွင်ႈပဵၼ်မၼ်းယူႇ ပႆႇတီႉၺွပ်းလႆႈ ပၢႆႈလွတ်ႈဝႆႉ ၵေႃႉထုၵ်ႇၺႃးၵွင်ႈယိုဝ်းသႂ်ႇၼၼ်ႉ ပဵၼ်ၸၢဝ်းၶႄႇ” ဝႃႈၼႆ။

ၵူၼ်းၼုမ်ႇ ဢၼ်မႃးၼင်ႈၵိၼ် တီႈႁၢၼ်ႉၶၢႆၼိူဝ်ႉယၢင်ႈ ပွၵ်ႉမႄႈၶၢဝ်ၼၼ်ႉ ပဵၼ်ၵူၼ်းၼုမ်ႇ ဢႃယု မွၵ်ႈ 20 ပီ ထိုင် 28 ပီ။

ၵေႃႉဢၼ်ၺႃးယိုဝ်းၼၼ်ႉ တေႃႈလဵဝ် လႆႈသူင်ႇယူတ်းယႃတူဝ်တၢင်းၾင်ႇထႆးယဝ်ႉ။ ၵူၼ်းၵေႃႉယိုဝ်းၼၼ်ႉ ပဵၼ်ၽႂ် ၵေႃႉလႂ် ဢၼ်ဝႃႈၼၼ်ႉ ၾၢႆႇပလိၵ်ႈ တိုၵ်ႉၵူတ်ႇထတ်းယူႇ။

တေႃႈလဵဝ် ယူႇတီႈၸဝ်ႈၼႃႈတီႈပလိၵ်ႈ လႆႈပိုတ်ႇဢမူႉ/ၶၻီႊ တီႈႁူင်းပလိၵ်ႈၸႄႈဝဵင်းတႃႈၶီႈလဵၵ်းဝႆႉယဝ်ႉ ၸွမ်းၼင်ႇ ပၵ်းပိူင်မၢႆမီႈဝၢၼ်ႈမိူင်းမီးၼၼ်ႉ တေဢဝ်လိူင်ႈလၢဝ်းၵႂႃႇ ဝႃႈၼႆ။