ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် တီႉလႆႈယႃႈမႃႉ ယႃႈမဝ်းၵမ် ၼႂ်းၸႄႈဝဵင်းမိူင်းမိတ်ႈ ၸိုင်ႈတႆးပွတ်းႁွင်ႇ ၶၼ်ငိုၼ်း မႅၼ်ႈ 4 မိုၼ်ႇ 6 ႁဵင်သႅၼ်ပျႃးပၢႆ။
ဝၼ်းတီႈ 19/01/2019 ယၢမ်းဝၢႆးဝၼ်း 4:30 မူင်း ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် မၢႆတပ်ႉ 24 လႃႈသဵဝ်ႈ တင်း ၸဝ်ႈ ၼႃႈတီႈလၢႆလၢႆၾၢႆႇ ႁူမ်ႈၵၼ်သေ ၵူတ်ႇထတ်းရူတ်ႉၵႃး တီႈၼိူဝ်သဵၼ်ႈတၢင်း မိူင်းမိတ်ႈ – မၢၼ်ႈပဵင်း ၵူတ်ႇထတ်း တီႉ လႆႈ ယႃႈၾိၼ်ႇၽိူၵ်ႇ ၼမ်ႉၼၵ်း 2.21 ၵီႊလူဝ်ႊ(ၶၼ်ငိုၼ်း 442 သႅၼ်ပျႃး)၊ ယႃႈမႃႉသမ်ႉ 2,290,000 မဵတ်ႉ( ၶၼ်ငိုၼ်း 45,800 သႅၼ်ပျႃး) လႄႈ ၾူၼ်းၼိုင်ႈလုၵ်ႈ။ ႁူမ်ႈၵၼ်တင်းမူတ်း ၶၼ်ငိုၼ်း 46,242 သႅၼ်ပျႃး ဝႃႈၼႆ။
ၵူၼ်းၵေႃႉဢၼ်တေႃႉယႃႈမဝ်းၵမ်မႃးၼႆႉ ပဵၼ်မွင်ႇဝေႇလျႅင်ႇဢွင်ႇလႄႈ မတိၼ်ႇၸႃႇၶႅင်ႇ ၵူၼ်းမၢၼ်ႈပဵင်း။
လိူဝ်ၼၼ်ႉ ၼႂ်းဝၼ်းလဵဝ်ၵၼ်ၵူၺ်းၼင်ႇၵဝ်ႇ ၾၢႆႇပလိၵ်ႈဢွၵ်ႇၶေႃႈပိုၼ်ၽၢဝ်ႇ တီႉလႆႈယႃႈမႃႉ တီႈတႃႈရူတ်ႉ ၼႃး မၢၵ်ႇၶေႃ ၸႄႈဝဵင်းလႃႈသဵဝ်ႈ ၼႂ်းရူတ်ႉၵႃး တီႉလႆႈ ယႃႈမႃႉ 430,000 မဵတ်ႉ၊ ငိုၼ်းမၢၼ်ႈ 9 သႅၼ်ပျႃးလႄႈ ၾူၼ်းၼိုင်ႈ လုၵ်ႈ ႁူမ်ႈၵၼ်တင်းမူတ်း မႅၼ်ႈငိုၼ်း 8,600 သႅၼ်ပျႃး ဝႃႈၼႆ။
ၽူႈၵေႃႉဢၼ်တေႃႉယႃႈမႃးပဵၼ် မွင်ႇလႅင်ႇမိၼ်းထုၼ်း။ ၺႃးပလိၵ်ႈတီႉၺွပ်းဝႆႉယဝ်ႉ ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၾၢႆႇပလိၵ်ႈၽူႈမီးပုၼ်ႈၽွၼ်းၶဝ် လႆႈပိုတ်ႇဢမူႉ/ၶၻီႊဢဝ်လိူင်ႈလၢဝ်း ၸွမ်းၼင်ႇပၵ်းပိူင် မၢႆမီႈဝၢၼ်ႈမိူင်းမီးၼၼ်ႉ ဝႃႈၼႆ။
