ပီႈၼွင်ႉတႆးလႅင် သၢၼ်ၶတ်းလွင်ႈပီႈၼွင်ႉၶၢင် ပိုၼ်ၽၢဝ်ႇတေၵေႃႇတင်ႈမိူင်းလွတ်ႈလႅဝ်းသဝ်းၶေႃၶၢင် တုၵ်းယွၼ်းႁႂ်ႈ ယုၵ်ႉလိူၵ်ႈပူတ်းပႅတ်ႈၶေႃႈပိုၼ်ၽၢဝ်ႇၼၼ်ႉ ဝႃႈၼႆ။

ဝၼ်းတီႈ 18-19/01/2019 ယူႇတီႈၸုမ်းၵူၼ်းၼုမ်ႇတႆးလႅင်၊ ပႃႇတီႇတႆးလႅင် ႁူမ်ႈၵၼ် ဢွၵ်ႇၶေႃႈပိုၼ်ၽၢဝ်ႇ သၢၼ် ၶတ်းႁၢဝ်ႈႁႅင်း ၶေႃႈပိုၼ်ၽၢဝ်ႇ ဢၼ်ၸၢဝ်းၶၢင် ဢွၵ်ႇမႃးမိူဝ်ႈ 14/01/2019 ဝႃႈ တေၵေႃႇတင်ႈ မိူင်းသဝ်းၶေႃလွတ်ႈ လႅဝ်းၶၢင်ၼႆၼၼ်ႉ။

ၼႂ်းလိၵ်ႈပိုၼ်ၽၢဝ်ႇ ပီႈၼွင်ႉတႆးလႅင်ၼၼ်ႉ ပႃးဝႆႉဝႃႈ “ ၼႂ်းမိူင်းႁူမ်ႈတုမ်တွၼ်ႈၼိူဝ် ၼႂ်းၸႄႈမိူင်းၶၢင်ၼၼ်ႉ ပီႈၼွင်ႉ တႆးလႅင်၊ တႆးလူင်၊ တႆးၼိူဝ်၊ တႆးၶမ်းတီႈ၊ တႆးသႃ၊ တႆးၵတူးလႄႈ တႆးၵၼၢၼ်း ယူႇသဝ်းဝႆႉတင်းၼမ်။ မိူဝ်ႈလိၵ်ႈႁူမ်ႈမၢႆ ပၢင်လူင် 1947 ၼၼ်ႉ ယူႇတီႈလူင်ပွင်ၸိုင်ႈ(ၽသပလ) ၶွတ်ႇၽွတ်ႈမိူင်းၶၢင်ၼႆသေတႃႉ ပႃးသဵင်ၵၢင်ၸႂ်ပီႈၼွင်ႉၶၢင် ဢိတ်းဢွၼ်ႇၵူၺ်း။ ဢမ်ႇပႃးသဵင်ၵၢင်ၸႂ်ပီႈၼွင်ႉတႆး ဢၼ်ယူႇသဝ်းၼႂ်းမိူင်းၶၢင်။ တေႃႇထိုင်ယၢမ်းလဵဝ်ၼႂ်းမိူင်းၶၢင်ၼႆႉ ႁူဝ်ၵူၼ်းပီႈၼွင်ႉတႆးၼမ်လိူဝ်ပီႈၼွင်ႉၶၢင်။ ယွၼ်ႉၼၼ် လွင်ႈဢၼ်ပီႈၼွင်ႉၶၢင် ပိုၼ်ၽၢဝ်ႇ တေၵေႃႇတင်ႈမိူင်းလွတ်ႈ လႅဝ်းသဝ်းၶေႃၶၢင်ၼၼ်ႉ ယွၼ်ႉဝႃႈ ပဵၼ်ၵၢင်ၸႂ် ၸုမ်းၶၢင်ၶဝ်ၵူၺ်းလႄႈ မၼ်းတေၸၢင်ႈတုမ်ႉတိူဝ်ႉ ၵိူတ်ႇပဵၼ်မႃး လွင်ႈပၼ်ႁႃၸၢဝ်းၶိူဝ်းၼင်ႇ ၵၼ်လႄႈ တေပဵၼ်မႃးလွင်ႈဢမ်ႇၵတ်းယဵၼ်ၼိမ်သဝ်းသေ တေၸၢင်ႈပဵၼ်ၽွၼ်းႁၢႆႉ တေႃႇၵၼ် ၵွပ်ႈၼႆ ႁႂ်ႈယုၵ်ႉလိူၵ်ႈပူတ်းထွၼ်ၶေႃႈပိုၼ်ၽၢဝ်ႇၼႆႉၶိုၼ်းဝႆးဝႆး” ဝႃႈၼႆ။

ၼႂ်းၶေႃႈပိုၼ်ၽၢဝ်ႇတပ်ႉသိုၵ်းတႆးလႅင်ၵေႃႈ ဢွၵ်ႇဝႆႉဝႃႈ “ တေႃႈလဵဝ် တႆးဢၼ်ယူႇၼႂ်းမိူင်းၶၢင်လႄႈ တပ်ႉသိုၵ်းတႆးလႅင် ဢုပ်ႇဢူဝ်း ထွမ်ႇသဵင်ၵၢင်ၸႂ်ၵၼ်သေ တွၼ်ႈတႃႇမိူင်းႁူမ်ႈတုမ်တေဢမ်ႇတႅၵ်ႇယၢႆႈၼၼ်ႉ ၵိုင်ႇၽၢတ်ႇဢွၵ်ႇၸႄႈမိူင်း ၶၢင်ၵေႃႈ တေၽၢတ်ႇဢွၵ်ႇ ဢွၵ်ႇၶေႃႈပိုၼ်ၽၢဝ်ႇဝႆႉၼင်ႇၼႆ” ဝႃႈၼႆ။

ၵဵဝ်ႇလူၺ်ႈလွင်ႈၶေႃႈပိုၼ်ၽၢဝ်ႇ တႃႇတေၵေႃႇတင်ႈမိူင်းလွတ်ႈလႅဝ်းသဝ်းၶေႃၶၢင်ၼၼ်ႉ ယူႇတီႈၽူႈဢွၼ်ႁူဝ် ၸုမ်း တူင်ႉၼိုင်တူင်ႇဝူင်းၶၢင် ႁဵတ်းပၢင်ၵုမ်ၵၼ်တီႈၸႄႈဝဵင်းၵဵင်းမႆႇ ၸိုင်ႈထႆး တႄႇဢဝ် ဝၼ်းတီႈ 12-14/01/2019 သေ ႁူမ်ႈ ၵၼ်ဢွၵ်ႇၶေႃႈပိုၼ်ၽၢဝ်ႇ တေၵေႃႇတင်ႈမိူင်းလွတ်ႈလႅဝ်းသဝ်းၶေႃၶၢင် ဝႃႈၼႆ။